زواج سوداناس

اوعى تغير المحطة



شارك الموضوع :

(الفراش الحائر) ظهر على وجه رونالدو في ستاد دو فرانس في نهائي الامم الاوروبية
لو شفتوا ليكم (مسيرة) مريخية تطالب بعودة اسامة ونسى ما تستغربوا
المريخ لو لعب امام عبدالقادر (هلال) براهو السنة دي ما بفوز عليه
كوستى قادرة على ان ترفع الفارق بين الهلال والوصيف الى (15) نقطة
صلاح (نمر) مفروض تسموه صلاح (كرت) في اي مباراة عندو (كرت)
مباراة البرتغال وفرنسا ..عنكبة كان فاكرها (فيلم اجنبي)..المباراة كلها منتظر الفاصل الاعلاني

من اول السطر
عيد الضحية باقى ليه شهرين ، يعني (60) يوم – اي زول يشوف ليه (خروف) في الشارع الايامات دي يمسكو ويتصور معاهو (سيلفي).

الظروف ما معروفة.

فهم السؤال
في التسجيلات الاخيرة – قالوا في سمسار جاب ليه لاعب لادارة النادي وقال ليهم والله عندي ليكم (رأس حربة) ما عندو اي حاجة غير يكسر (تلج) للمدير الفني للفريق.

مدلك الفريق قال للسمسار ..هو بدل ما يكسر (تلج) للمدير الفني ..ما يكسر (تلج) لرئيس النادي..عشان يختصر المسافة.

اصلا فريقنا دا تشكيلتو بيضعها رئيس النادي…المدير الفني قاعد ساي جايبنو مخصوص عشان يمسك (صبارة) الموية …انتوا قايلنو ماسك الفريق.

الزول دا ماسك (الصبارة).

عبدالقادر هلال لو لعبتوا قدامو السنة دي بغلبكم
احلى ما في هذا الموسم ان فريق المريخ بـ (28) عضو …عجز من الانتصار على اي (هلال) واجهه.

هلال الفاشر فشل المريخ في الانتصار عليه في الفاشر وفي ام درمان.

رسمي وودي …عجزوا ان يحققوا انتصار عليه.

هذا الى جانب انتصار الهلال الاب على المريخ في قمة الممتاز الاخيرة …وانتصار هلال الابيض على المريخ وتعادل (الوصيف) بعد ذلك مع هلال كادوقلي.

جماعتكم ديل بي طريقتهم دي لو لعبوا مع الوزير عبدالقادر هلال ..رئيس نادي الهلال السابق ..ما بقدروا يغلبوه.

يغلبوه كيف مع ناس عنكبة وصلاح نمر ديل.

والله السنة دي ناس الـ (28) عضو …(بص الوالي) متعونا عديل كدا.

اصلو ما قصروا معانا.

حكاية غريبة شوية
ناس ريال مدريد قالوا الايامات دي ساكين الفرنسي (بول بوجبا)…قلت ليهم لو عاوزين تسجلوا (بوجبا) إلّا جمال الوالي يكون رئيسكم …بسجلوا ليكم.

ناس ريال مدريد قالوا لي نحن عاوزين نسجل (بوجبا) وإلّا عاوزين نعمل لينا (طابق ثالث).

جمال الوالي غايتو (الطابق الثالث) ما بقصر ليكم فيه.

حالة شبه
انا ما عارف لكن الاتحاد الافريقي لو عندو سلطة على (ميسي) كان وقفو ليكم (6) شهور زي علاءالدين يوسف ..بعد ان فاز رونالدو ببطولة الامم الاوروبية.

ميسي – رونالدو خلاهو ليك زي (مصعب عمر) من شدة الاحراج.

مصعب شنو؟.

يمين ميسي الايامات دي زي بكري المدينة ..نفسياتو تعبانة شديد …عشان كدا نحن قررنا نعمل (هاشتاق) لدعم ميسي تحت عنوان (كلنا ميسي).

انتوا قايلين بكري المدينة براهو!!.

اقلب الصفحة
يا ناس المريخ لو ح تمشوا تلعبوا الاسبوع القادم في كوستي ..شيلوا معاكم (احذية المطر) وشماعات للهزيمة.

قالوا ليك الايامات دي المطر في كوستى حدها (النخرة).

وانتوا شكشاكة ساكت قاعدة تجهجهكم.

لو ما شلتوا احذية المطر …اوعكم تنسوا (الشماعة).

كرسي فاضي
الكلام دا ما يطلع من الصفحات دي …عشان ما نحرج لينا زول ساكت.

قالوا محمد عبدالمنعم عنكبة لمن مباراة البرتغال وفرنسا انتهت، هو قائل نفسو بحضر ليه في (فيلم اجنبي).

زولكم حسب كورتو – ما قايل في كورة كدا…فاكرها (فيلم اجنبي).

عليكم الله ما تقولوا فيه حاجة.

عنكبة المباراة كلها قاعد منتظر (الفاصل الاعلاني).

فراش عثمان حسين (الحائر) في ستاد دو فرانس
في الاخبار العالمية : ((خلال المباراة النهائية لبطولة الأمم الأوروبية التي جمعت البرتغال وفرنسا، مساء الأحد، لفتت أنظار الملايين من المشاهدين أسراب من الفراش غزت ملعب فرنسا في العاصمة باريس. ولعل اللقطة الأبرز في المباراة، التي انتهت لمصلحة البرتغاليين بهدف نظيف، كانت وقوف فراشة بين حاجبي رونالدو بعد إصابته وقبيل خروجه من المباراة باكيا. فما سر غزو هذه الأسراب من الفراش؟ الخبير في أحد مؤسسات مراقبة وحماية الفراش في بريطانيا، ريتشار فوكس قال لصحيفة الغارديان إن هذا النوع من الفراش الذي غزا ملعب فرنسا ليلة النهائي من الأنواع المهاجرة. وقال فوكس ( يجب على فراشات هذا النوع أن تغادر مواطنها مهاجرة، وتختار هبوب الرياح المناسبة لتطير على ارتفاعات مختلفة لتحقيق السرعة القصوى لدى الهجرة). ومن المعروف أن الفراش ينجذب إلى الأنوار. وخلال الطقس الدافئ في باريس مساء الأحد، كانت أضواء ستاد دو فرانس بمثابة فخ كبير لسرب الفراش المهاجر، مما جذب العشرات منها إلى أرضية الملعب قبل انطلاقة المباراة. وأشار فوكس إلى أن ملعب المباراة كان في اتجاه الريح التي تحمل الفراشات المهاجرة والتي تتجه عادة من الجنوب والجنوب الغربي، مما تسبب بغزو الفراشات للملعب قبيل المباراة. لكن ما إن صفّر الحكم الإنجليزي مارك كلاتينبرغ بداية المباراة، وبدأ 22 لاعبا بالحركة على أرض الملعب، بدأت تلك الفراشات بالهرب والتحليق من أرض الملعب باتجاه الأعلى)).

انا الخبر دا ما عندي ليه تعليق …لكن احب اقول لاخونا فوكس ان عثمان حسين غنى قبل اكثر من نصف قرن لهذا الفراش اغنية (الفراش الحائر).

وقد كان الفراش حائر في وجه رونالدو.

انتوا يا دوب عاوزين تكتشفوا الذرة.

والله فعلا ما عندكم رأس!!.

نجمة مربع ارسال
في واحد من ناسنا الكبار …قال لي مفروض ناس الهلال وقت يفتتحوا (الجوهرة الزرقاء) يجيبوا في حفل الافتتاح (انصاف مدني).

قلت ليه : ليه ؟…تلاتة طوابق نجيب ليها (انصاف مدني)..بالغت معانا يا ود الناس.

قال لي : ايوا خلوهم يجيبوا (انصاف مدني) – عشان المريخاب ديل ما يطقوكم عين.

ذكرى خالدة
تذكروا لمن (شابولا) جاب ليه قون في المريخ ..انا ما عارف حصل عليكم شنو؟…لكن انا (العدس) القدامي نصو لقيتو بقى (سمك).

سبحانه مغير (الاعداس).

حكاية هذا المساء
والله يا شيبوب الله شافك …الله مرقك من ناس عنكبة ومصعب عمر وصلاح نمر ديل.

انت عارف يا شيبوب لو كنت بتلعب في المريخ الى وقتنا هذا ، كان ح تكون على افضل حال موقوف ومجمد نشاطك لمدة (6) شهور زي علاءالدين يوسف وبكري المدينة.

لو ما وقفك الاتحاد الافريقي ح يوقفك مجلس المريخ.

اصلو ما كنت بتمرق منها.

مسلسل تركي
افضل طريقة يتخارجوا بيها ناس الولاية من الخريف هذا الموسم …اي مطرة تهطل في الخرطوم يقولوا دي ما مطرة …دي كلام جرايد ساكت.

شوف عيني المطرة النزلت اول امس …ما سمعت بيها إلّا في (الجرايد).

كوارع بالشطة
مريخابي لقيتو واقف في موقف جاكسون وبكورك بي اعلى صوته وبقول يا رب الاتحاد الافريقي يوقف مصعب عمر وعنكبة وعطرون وصلاح نمر.

مريخابي عاقل والله.

وينها (الكوارع) هنا؟.

صلعة (سنتر) وجلحات (ناصية)
زول عندو (صلعة) كبيرة ما عارف يعمل بيها شنو؟.

عمل ليه قدرة فول …قالوا ليه هسع قدرة الفول دي عاوزة ليها (صلعة) قدر دي ..(جلحات) ساكت بتمرقك.

عمل ليه (ركشة) – قالوا ليه اصلو ما في علاقة بين الصلعة والركشة – ما تقعد تلخبط لينا ساكت…صلعتك دي بص ابورجيلة كتيرة عليه.

فتح ليه (بقالة) – قالوا ليه (الصلعة) كتيرة على بقالتك دي…(طحنية) ما عندك.

اخر حاجة زولكم وقف قدام المرايا …وقال احسن يبقى (مدير فني) …الصلعة دي صلعة (مدير فني) عديل كدا.

النبق النبق
رغيفتين بقت بجنيه.

تاني …الجنيه فيه رغيفتين فقط.

عادي تاني وقت تطلب ليك (رغيفة) زيادة في مطعم …يقولوا ليك انتظر (السيستم).

وعادي جدا بعد ما تشترى ليك (رغيفة) من الفرن ..تنتظر (كرتها) 4 شهور.

رسالة فاضية
الدكتور قال ليه تاني لا تاكل عدس ولا ملاح قرع ..ولا بامية مفروكة…

قال للدكتور والله يا دكتور اول مرة تقول ليك حاجة فيها فايدة …لو عارفك شاطر كدا ..كان جبت (المدام) معاي.

اقيف في الصف
الفارق بين الهلال والمريخ بعد مباريات المريخ في كوستي ممكن يصل الى (15) نقطة اذا خسر المريخ امام الرهيب وامام الرابطة.

لو اتعادل في المباراتين الفارق ح يكون (13) نقطة.

لو خسر في وحدة وفاز في واحدة …الفارق ح يكون (12) نقطة.

يعني اصلو ما عندنا مشكلة.

لو فاز في المباراتين …الفارق ح يظل (9) نقاط.

يعني اصلو ما خسرانة معانا.

نحمدك يا رب.

لكن نقول ليكم منذ الآن …لو خسرتو اي نقطة في كوستي …تاني الجوهرة الزرقاء دي إلّا تدخلوها بي (فيزا).

كمان نحن بنلعب وإلّا بنلعب.

حكاية هذا النهار
يا طه سليمان بقيت تمثل وتغني وتقدم برامج ..ما فاضل ليك يا طه بعد كدا إلّا تفتح ليك (بقالة) في حلتنا.

اصلو ما خليت شيء.

حصة رياضيات
بي صراحة كدا ومن غير زعل ..الفنانين الجابهم السر احمد قدور السنة دي في برنامج (اغاني واغاني)…الواحد لو عندو (سماية) ما بجيبهم فيها.

الناس ديل السنة دي يكونوا دخلوا (اغاني واغاني) بالقرعة.

او اتلخبطت الاشياء على السر قدور ..وما قدر يفرز بين الجمهور والفنانين…عندي احساس احمد بركات دا يكون من الجمهور.

صاقعة ناصية
عندنا عمنا وقعت فيه (صاقعة) – زول صعب ما بتفاهم ولا بقبل الحقارة ..قال ما ترفعوني …بقوم براي.

عمنا لغاية الآن ما قام.

نعمل ليه شنو عاد؟.

دقت في العراضة
محسن سيد لو استمر بي (فانيلتو) دي …بلحق ليكم المريخ العاصمي مريخ كوستي..

تذكروا وقت محسن سيد في كل مباراة مع مريخ كوستي بقول فيها بتفاءل بي فانيلتي بقوم بتغلب ..لمن وضع مريخ كوستي في مؤخرة ترتيب اندية الممتاز.

هسع الزول دا شغال مع مريخ ام درمان بي نفس (الفانلة).

اقصد بي نفس (النظرية).

حكايات في منتهى القسوة
ناس المريخ لو عارفين دا كلو بيحصل ليهم مع مجلس جمال الوالي (28 عضو) كان مسكوا في اسامة ونسي بي اصابعهم العشرة.

بعد مباريات المريخ في كوستي …خايف الجماعة ديل يعملوا ليهم (مسيرة) لعودة اسامة ونسى.

او على الاقل يعملوا ليهم (وقفة) امام منزل اسامة ونسى.

حصة عربي
سألت لي من بطيخة…عمك قال لي سعرها 130 جنيه.

قلت ليه طيب يا حاج بطيختك دي معاها (قطع غيار).

مفروض تبيعها لي بي سعرها دا بي (اسبيراتها) – الظروف ما معروفة.

عليك الله هسع (الظروف) الدخلها في الموضوع دا شنو؟.

منطق فرنسي
بطولة الامم الافريقية اثبتت ان (الديوك) عمرها ما تبقى (نسور).

هام ومستعجل
رمضان القادم باقى ليه عشرة شهور و19 يوم …

نحن عندنا ناس من استعجالهم …تتصوروا قاعدين يعوسوا في (الحلو مر) من الآن.

يا جماعة اصبروا شوية…الناس (الستوت) ما صاموه.

خاص وضروري
قالوا بعملوا مول تجاري ضخم.

ونادي اسري في الحتانة.

وفندق خمسة نجوم.

عليكم امان الله …لغاية الآن ما شفنا منهم شيء غير (الايقافات).

هسع دا خريف يتقشفوا فيه.

الجو دا جو سمك ما جو (تقشف).

كلام عادي
المريخاب ديل لو بفكروا صاح يندمجوا مع مريخ نيالا ..عشان يضمنوا المركز التاني ويضيقوا الخناق على الاهلي شندي والخرطوم الوطني.

مريخ نيالا ما كعب معاكم – احسن ليكم من مريخ الفاشر.

فكرة مختلفة
لمن يقولوا لي تشكيلة المريخ فيها صلاح نمر وعطرون ومصعب عمر ومحمد الرشيد وابراهيم جعفر وابراهيم محجوب وعنكبة وعبده جابر والوك …بقول ليهم دا زي الحافلة المليانة وما فيها سواق.

الركاب كلهم قاعدين – عدا السواق.

التداوي بالاقوان
يا بكري المدينة لو كنت في الهلال إلى الآن كنت على الاقل طلعت ليك بي (دكان) في الجوهرة الزرقاء.

على اسوأ الفروض كان عملت ليك (دكان).

شاحن جلاكسي
اعتقد ان صلاح نمر الموسم القادم الاتحاد الافريقي سوف يجمد نشاطه سنة كاملة.

هسع الكلام دا عندو علاقة بي شاحن الجلاكسي لو ما حركات منكم.

صالون حلاقة
حليل زمن بكري المدينة بكون قاعد في (المقصورة) ناس مزمل ابوالقاسم يطلعوه ليك نجم المباراة.

ومامون ابوشيبة بقول في ضربة جزاء مع بكري المدينة الحكم لم يحتسبها.

وبكري قاعد في المقصورة.

طشاش شديد
لو السر احمد قدور كان عضو ضمن اعضاء لجنة تسيير المريخ …كان السر قدور شبك ليك صلاح نمر …هائل يا صلاح…

وعطرون ….هائل يا عطرون..

ومصعب عمر ذاتو كان قال ليه هائل يا مصعب.

قصة زي البامية المفروكة
شافها في شريط فيديو …عجبتو اتقدم ليها.

بعد (6) شهور من عرسو ..قال ليها والله انا كنت قايل (الشرائط) دي خداعة بس في (المحترفين)…

الشرائط دي اتاريها في (العرس) ذاتها خداعة.

العروسة طلعت ليه ماسورة زي (كريم الحسن).

جدادة الخلا
صلاح نمر بقى يشكل عنصر (الخبرة) في المريخ.

دا زي (الضيف) البجيك في البيت …اليوم التالت بتلقاه داخل في (عراقيك) وبفتش في شاحن الموبايل.

مواهب خارج نطاق الخدمة
يخيل لي ان المشكلة التى نعاني منها ..والتى ادت الي ذلك (الجفاف والتصحر) في الابداع تتمثل في ضعف (الاجتهاد والمثابرة)…لا ضعف (الموهبة والذكاء).
في الوسط الفني الكثير من اصحاب المواهب الجيدة ..والقديرة …لكن كل الموهوبين هنا منزوع منهم (فيتامين) الاجتهاد…هم جميعا عطّلوا ماكينة المثابرة والعمل وانتظروا في بيوتهم تحسبا للحظ والصدف وخدمة الظروف.
وبعضهم اعتبر انه محارب …وان الدنيا ما بتدي حريف.
اعمل أي مسابقة (هاتفية) واعلن عن جوائز ضخمة …كل الناس – كل الشباب سوف يشاركوا في تلك المسابقة وينتظروا الخلاص عبر (الجائزة) المعلن عنها.
كلهم سوف يبنوا كهوف من الاحلام والامال في انتظار الجائزة.
التلفونات علمتنا الخمول ..والحصول على المعلومة والتواصل بدون اجتهاد.
المعلومة التى تحصل عليها بدون اجتهاد ..او تصل اليها عبر (قوقل) تفسد القدرة ..وتحبط الهمة.
اصبحنا نتحرك بدون (رغبة) ..حتى الرغبة غابت عنا …واصبحنا نكتفي جميعا باجر المناولة.
بعد ان كنا لا نرضي إلا بالثريا ..اصبحنا نرضي باجر المناولة ..ثم نذهب بعد هذا ونحن (منهكين) من التعب والرهق.
نال من اجسادنا حتى تعب (المناولة)…يبدو ان (الضللة) لم تترك لنا شيئا نكافح به.
حتى (الكلاب) في الاحياء ..اصبحت تمارس (النبيح) وهي راقدة في ضلها ..ومغمضة عين ومفتحة عين.
الحرامي يجي ويفوت فيها ..وهي بتهز في (ذيلها).
أي شيء اصبح كاسد …وغير قابل للعمل.
الفرق بين الفنانين في هذا الزمن بمختلف انتاجاتهم والفنانين في الزمن الماضي ان فناني الزمن الماضي اكثر اجتهادا ومثابرة وقوة.
اما فنانين هذا الزمن فانهم يكتفوا بالظهور في (نجوم الغد)…ثم يذهبوا مأسوفا على مواهبهم.
اقصى امانيهم ان يظهروا في برنامج (اغاني واغاني).
لذا اصبح كل شهر يظهر 30 فنانا …حتى اذا اكتمل العام ..اختفوا جميعا من الساحة ..وتلاشوا كما يتلاشى (الزبد).
تفوق الجيل الماضي لم يكن بسبب تدفق مواهبهم ..وانما كان بسبب اجتهادهم وتعبهم واصرارهم على بلوغ اهدافهم التى يدفعون اعمارهم وحياتهم في سبيل تحقيقها.
لو وجد هذا الجيل حظه من (الاجتهاد) لوصل الثريا ولنافس حتى عباقرة العصور الماضية بكل ما فيهم من ألق وابداع.
هم من ناحية الموهبة والذكاء …لا تنقصهم شيء في هذا الجانب.
هذا الجيل ..فقد حظه في (الاجتهاد) …وتعود بسبب (تقنية) العصر و(تكنلوجيا) هذا الزمان على ان يحصل على أي شيء جاهز ..بدون ان يتعب او يجد او حتى يسعى.
التكنلوجيا الحديثة ..عطلت فينا الاحساس بالتعب ..والرهق من اجل الوصول للاهداف التى نرسمها لحياتنا.
قرأت قبل فترة عن المخترع العظيم (اديسون) الذي خدم الانسانية في مجالات مختلفة وقدم لها الكثير من الاختراعات.
توماس ألفا إديسون (1847 – 1931م) مخترع أمريكي…فصله ناظر المدرسة بعد 3 شهور من التحاقه بالمدرسة بسبب بلادته وتخلفه العقلي (حسب اعتقاد ناظر المدرسة).
الغريب انه مع ذلك الاتهام الذي قرن باديسون في طفولته استطاع ان يخدم الانسانية باختراعاته الكثيرة ..التى نذكر منها على سبيل المثال (البارق الطابع والهاتف الناقل الفحمي والميكرفون والفونوغراف والمصباح الكهربائي).
يقال ان (اديسون) كان يسهر الليل كله ..ولا ينوم حتى يهجم النوم عليه فينوم بغير ارادته في مقعده.
وهن عظمه بسبب عمله واجتهاده وبحثه المستمر وحاصره الداء بسبب الجهد الذي كان يبذله من اجل اختراعاته.
توماس اديسون كان يؤمن بالعمل والاجتهاد والكد والتعب ..وكان يقول : (ان النجاح في الحياة 99% “عرق” كناية عن الجهد والنصب – و1% “وحي” كناية عن الذكاء والبعقرية).
أي اننا لا نحتاج من الذكاء والعبقرية والموهبة اكثر من 1% …بهذه النسبة الضئيلة يمكن ان تصل لقمة النجاح ..فقط اذا تعبت واجتهدت.
مطلوب من كل شعراء العصر الحالي وكل الاصوات الشابة والملحنين الجدد المزيد من الاجتهاد ..لا المزيد من الموهبة او الذكاء.
اذا تفحصت سيرة أي مبدع في الزمن الماضي سوف تجد ان ذلك المبدع كافح واجتهد ووجد الكثير من العناء في سبيل ان يصبح (نجما) وان ينفع الناس بابداعه.
أي مبدع في العصور الماضية …بدأ من (الصفر) ثم سار في طريق فيه الكثير من المخاطر والاشواك ..حتى وصل في النهاية الى هدفه النبيل ..واتفق الناس من بعد على موهبته وابداعه.
هذا الجيل ..لا يريد ان يبذل أي شيء …بل حتى واقع الحياة الحالي ..هربوا منه بالمخدرات والخمور.
اننا نمتلك الان الكثير من المواهب النادرة والعقليات الذكية والمتفتحة ..ولكن للاسف الشديد كل هذه المواهب افتقدت القدرة على العمل والاجتهاد.
أي زول عاوز يبقى (نجم) بدون ما يعمل أي حاجة …معتمدا فقط على موهبته.
والموهبة وحدها لا تكفي ..بل ان الكثير من المواهب في الفن والرياضة والسياسة والاعلام …تلاشت ..وانتهت لأن اصحابها لا يؤمنون بالعمل والاجتهاد.
أي واحد عنده (موهبة) اعتقد انه يمكنه عبر هذه الموهبة ان يصل الي ما يريد.
عاوز يقعد في بيتو ..وينتظر (النجومية) تدق على بابه …فقط لأنه واثق من انه موهوب.
افضل ان تكون تملك القدرة على الاجتهاد والعمل بدون موهبة …من ان تكون تمتلك موهبة بدون عمل واجتهاد.
ملاح قرع
رابطة اهل الهلال المركزية ترفض ايقاف بكري المدينة وعلاءالدين يوسف وتندد بذلك.

عاوزين توقفوا ليكم لاعب ..وقفوا اولادكم …اولادنا ديل (خطوط حمراء) ما في زول يقرب عليهم.

نظرية حقتي براي
اعتقد كدا لو المريخ قدم صلاح نمر عشان يلعب ليهم في (الهجوم) ح يحل بشكل مبدئي كدا مشكلة الدفاع.

اصلو ما معقول
صلاح نمر في كل مباراة ضارب ليه لاعب بونية …وماسك الكورة بي ايدو في منطقة الجزاء…وما في زول قاعد يسأله.

مع ذلك ..اعلام المريخ بهاجم في (التحكيم).

حتة في الحتة دي
عندنا قريبنا طقتو ليك كهربة …ما عملت ليه اي حاجة.

عارفين ليه؟.

عشان الكهربة جاية من سد مروي.

فكرة جديدة
جارنا شفت شديد …اشترى ليه (ساعة)…قال عاوز يقلبها (ركشة).

على كدا زولكم دا لو اشترى ليه (موبايل) بقلبو ليكم (قطر).

اتنين في الشارع
اتنين في المريخ ما بنقبل فيهم اي حاجة.

مصعب عمر (كتر خيرو).

ووالي ولاية الخرطوم الجاب لينا (28) عضو في لجنة تسيير المريخ.

مجهول الهوية
انا ما عارف …لكن لو كوستي دي فيها اي (هلال)…المريخ ما بمرق منها سالم.

شكوى جاهزة
لماذا لا يقدم مجلس المريخ شكوى في هلال كادوقلي يقول فيها المطرة التى نزلت اثناء المباراة ناس الارصاد الجوي ما عارفين عنها اي حاجة.

ولا كانوا متوقعنها.

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *