زواج سوداناس

د. ناهد قرناص : العزال بيبقى عزال 2



شارك الموضوع :

وصلني في بريدي بعد نشر مقال (العزال بيبقى عزال )..بعد أن قرأته اكثر من مرة .. ..قررت نقله كاملا بدون اي اضافة ..
(دكتورة ناهد ازيك
معقول لكن قصف الجبهات ال من الصباح دا؟ الحالة كنت دايرة أقول ليك (ادينا نظرة ) ..وشوفي لينا قصة السؤال المرقنا من السودان والدول المجاورة (اها مافي جديد؟ ؟؟ ) ..حيث لا تكفي حصر النتائج والبوسترات والمؤتمرات اجابته !!
الجديد البيسألوا عليهو عارفنو طبعا ..لكن كان ما ربنا سهل نعمل شنو؟؟ البيت ما اتبنى زي ما بقولوا ..وما قد يتراءى للبعض من تعزيل وانو العرسان بنرفضهم عشان (التمطق ) ..او الضحكة الغريبة ..يكون وراها عدم ارتياح غالبا بعد الاستخارة …بعدها ما مهم تعتذري بي شنو طالما حاسة انه مافي الفة .
كمان مرات تغمضي عينيك عن الحذاء والشاي والقروش ..وتقولي ما مشكلة زي ما قلتي نبنى البيت مع بعض ..واهو في النهاية يمكن يكون أنسب ليك من حيث العمر والتخصص ونفس الكنبة ..لكن لمن يجي يقول ليك (ضروري تعملي دكتوراة؟؟ الناس ما ياها عايشة من غير دكتوراة ..والسودان مالو؟؟) ..وانتي تكوني شايلة خطاب المنحة في ايدك ..المنحة العافرتي ليها وكسرتي ضهرك في القراية والتقديمات ..المنحة البتكفي رسوم دراسية ومعيشة ليهو كمان لو جاء معاك ..ببساطة زولي أبو (50% توافق )..عايزني اتخلى عن طموحي (ال هو كان سبب اخترتي بيهو شريكك)..ليه الناس بتبخس الحاجات عشان هم ما قادرين يبقوا أحسن ؟؟او بقدر الامكان يحاولوا يرجعوك وراهم ؟؟
دا كلو كوم ..وكل من هب ودب داير يتقدم ليك طالما وصلتي عمر معين ..(على فكرة كل من هب ودب ما استحقار بالاشخاص ) لكن لما راجل بي بيتو وعيالو وبالكاد يعيشو يقول ليك انا ما عندي مانع احل ليك مشكلتك …بس ممكن اعرف المشكلة شنو هسه؟؟
بعدين يا دكتورة ممكن تشوفي لينا بي خبرتك كدا ..ليه الاسكور بينزل لي واحدة قارية ودارسة الكتاب ؟؟ ما تقولي لي عشان العمر والولادة وفوق التلاتين !..كلو بأمر ربنا ..ممكن البت تتزوج من 18 وما تنجب ..وبعدين مش السيدة خديجة رضي الله عنها تزوجت وانجبت وهي في الاربعين؟ اشمعنى ياخدوها مثال انها طلبت النبي صلى الله عليه وسلم ويتغاضوا انها انجبت بعد الاربعين؟؟ ..تحياتي واسفة ان اطلت عليك) انتهى مكتوبها ..
لا عليك يا صديقتي فقد كتبت ما يجول بخاطر الكثيرات في الضفة المقابلة ولكن تلك هي قصة اخرى ..ربما اضيف لكل ما ذكرت ..ان ادم السوداني يحصر اختياراته بعد (الصغيرون الما كبير) ..الى انها (لازم ومن كل بد ) تكون بيضاء فاقع لونها تسر الناظرين.!!!.ثم يكتب في صفحته الاسفيرية منددا باستخدام الكريمات الفاتحة للبشرة !!!!..سؤال جانبي ..لماذا يتحاشى ادم السوداني الزواج من حملة الشهادات العليا من النساء؟؟ ..سؤال صعب ..سؤال يراودني!!!

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *