زواج سوداناس

حافظين تفاصيل الفيلم ..!!



شارك الموضوع :

شوف غيرنا قوليهوا النضِم..
مابنتلدِغ واللهِ مِنك مرتين..
ما بسري فوق أجسادنا سِم..
شعباً مُدرّع بالقيّم..
رافع شعاروا الله أكبر مُلتزِم..
ماسك صلاتو على نبيك..
صادق مُحصن بالعلِم..
خائف كتير من سيدوا قُبال الممات..
من قبلِ ما يبلى الجسِم..
خليهوا نضمك ما بفيد..
يكفينا كُل القلتوا من زمنٍ بعيد..
في رُبعِ قرنٍ أو يزيد..
نحنا خاشين الفيلِم..
حافظين تفاصيل الفيلم..
حتي البطل عارفنّوا عارفين الإسم..
كان الصبُر ترياقنا ليك..
من يوم مجيك..
رابط قِناعك في وشيك..
خايفين تجيك الطامة قُبال تستجِم..
أهلك قبيل قالوها ليك..
ماترجى زول ..
قاعد يحش بي دقنوا في الزرع الوهم..
لابُد حصادوا يكون سراب..
راقدة الأرِض أضحت يباب..
تدخُل صراع تمرُق نزاع..
والخاتمة كانت هي الخراب..
والشر بِعِم..
مُبهم كلامك يا أخي لي غيرنا ما عاد بِنفهِم..
كل الصِلات البينا كانت والرباط الكان وثيق..
أصبح ضعيف زي خيط رقيق..
ناسجاهوا في يوم عنكبوت..
بيهوا شان تبني البُيوت..
الواهنة قال رب العباد..
لينا خليهوا النضِم..
نحنا خاشنوا الفيلم..

شارك الموضوع :

تعليقات الفيسبوك

تعليقات


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *