زواج سوداناس

مقارنة لمريض اصيب في حادث سيارة في السعودية واخر في السودان



شارك الموضوع :

انا اشتغلت في السودان 3 سنة واسي في السعودية لي سنة انا بخت ليك مقارنة بسيطة لي مريض عامل حادث سيارة في السعودية وفي السودان وانت احكم براك ودة ما قصة ولا خيال دي حاجة انا مريت بيها.. اول ما حصل الحادث في السعودية الاسعاف بجي علي طول وفيه مسعفين مدربين و الاسعاف مجهز بكامل الادوية المنقذة للحياة و الاجهزة اللازمة و بصل في زمن قياسي وبتم عمل الاسعافات الاولية للمريض و بتواصل الاسعاف باللاسلكي مع المستشفي بيبن تفاصيل الحالة و الشي المتوقع و الحاجات المحتاجينها.. يعني بقول ليك شاب 32 سنة كسر في الحوض و اصابة في الراس و نزيف و هكذا و المفروض يتجهز 5 وحدات دم و اتصلو باخصائي العظام ( الغالبا حيكون سوداني) و اخصائي المخ و الاعصاب (غالبا برضو حيكون سوداني) وجهزو الاشعة المقطعية و الرنين و ادو خبر لي ناس العملية عشان يكونو جاهزين.. المريض لما يصل بعد ربع ساعة طبيب الطواري و الاصابات العمومي ( وغالبا برضو سوداني) لانو لا درجتو العلمية و لا معرفتو ولا واجبو في وصفو الوظيفي بسمح انو يتعامل مع حالة زي دي فدورو بكون انو يستقبل الحالة ويستدعي الاخصائيين المجهزنهم من قبييل.. بتلقي في نفس اللحظة اربعة ممرضات واقفات في راس العيان يركبو الفراشة ولو دايرين قسطرة بولية ويقيسو العلامات الحيوية المحاليل الوريدية و الدم بكون جاهز ركب طوالي عشان تلحق النزيف في 10 دقايق بودو الاشعة بعملو رنين ولا اشعة مقطعية و بقدرو ( الاستشاريين و الاخصائيين وليس العمومي المسكين) يحددو المشكلة بالظبط شنو و يدخلوه غرفة العمليات في اقل من نص ساعة ويكونو واقفين في العملية استشاري عظام و استشاري جراحة و استشاري تخدير غير عدد من الاخصائيين و اشياء اخري مفيدة بعداك بطلع من العملية طوالي بودوه العناية المكثفة عشان يتنوم فيها تحت متابعة استشاري التخدير و العناية المكثفة و غالبا و الله حيكون (سوداني) وكل العلاجات مجانا و كل الاحتياجات متوفرة و الدنيا عسل و الامور باسطة و بعد اسبوعين العيان ببقا انصح مني ومنك..

تعال نشوف عيان بتاع حادث في السودان اول شي بكون مجدوع تحت العربية المفرومة نص ساعة و الناس تعافر و تجرجر عشان تطلعو وبعد مرقو بشيلوه زي شوال البصل ولا الفحم وبجدعو في اقرب بكسي ورا… غالبا لو في اصابة في الظهر او العنق حيكونو ضاعفوها 5 مرات لانو في طريقة معينة للتعامل مع مريض الاصابة المتعددة و ناسنا ديل مستحيل يكونو عارفنها وحكومتك ما عندها اسعاف كافي لانو قعد توديه غزة وبعداك بكون مجدوع في البكسي مسافة الشارع ساعة كاملة ضارباه الشمس و الدقداق و دمو كابي في البكسي لحدي ما يجيبو الحوادث.. اها بعد كدة جو داخلين الحوادث فيها 20 عيان و3 دكاترة عمومين لانو الباقين حكومتك صدرتهم السعودية مع النبق بقوم واحد من ال3 ديل بجي علي المريض و ال500 مرافق المعاه لمن يفجهم دي دنيا براها و بعداك تبدا الماساة اول شي انت كطبيب ما مسموح ليك تتعامل مع مريض اصابة الا باورنيك تمانية ( دي قوانين حكومتك كدة) ولا بعداك تخش السجن انت وتاخد تهمة قتل لو اتعاملت معاه بدون الاورنيك بمشي جيش المرافقين للمكتب حق الشرطة بلقا العساكر مافي و جيش المرافقين دة كلو بعمل حميييل و بجي راجع يدق جرس للدكاترة عشان العساكر مافيشين طبعا لا المرافق لا الدكتور بقدر اتكلم مع عسكري لانو سيد بلد وكدة و زرارة قميصو اهم من عين الدكتور لو قعت زرارتو تخش سجن ستة شهور لكن لو قديت عين دكتور يبقي يستاهل لانو دكتور مستهتر وما ببتسم في وش المريض المهم العسكري مافي و الخطا في وش الدكتور القااااعد منتظر العسكري مع المرافقين و بعد حضرة سيادتو يجي من الجبنة مرافقينك الحمشين ديل زاتهم خشمهم ما بفتحو معاه وبعتبرو دة اهمال من الدكتور لانو المفروض هو يشوفو بدون اورنيك 8 لانو الطب مهنة انسانية تشوف العيان وبعداك انت كطبيب خش السجن مافي زول عندو بيك شغلة شايف كيف.. المهم بعد جنابو يجي ويملا الاورنيك الممرضين بكونو 4 وفي 30 عيان اها الحل شنو اي زول شايف انو عيانو دة اهم زول ولو خليتو مشيت منو المفروض يدقك طوالي فما في حل للمساكين ديل الا يتقسمو اي واحد يقسم نفسو علي 7 ولا جيبو الممرضين حقننا الفي السعودية ولا صحي بنصدرهم برضو مع النبق و الدكاترة المهم ركبو الفراشة و مشو الصيدلية عشان يفتشو الدرب قامو لقوه مافي اضطروا مشو اشتروه بي قروشهم من برة جوك راجعين بعد نص ساعة تاني اها دايرين فحوصات في المستشفي مافي يقومو ال500 مرافق يطلعو يعملوا الفحوصات برة دي برضو بتاخد نص ساعة غير بنك الدم البكونو مغطينو اتنين و هم بخدم مستشفي الطواري حقتا بتشوف الف مريض و بعداك دايرين اشعة مقطعية في المستشفي مافي دايرين رنين في المستشفي مافي محتاج عملية لكن الا تتعمل في مستشفي شرق النيل ولا الزيتونة لانو ما متوفرة.. مافي اخصائي لانو كلهم في السعودية.. مافي سرير يرقد فيه المريض لانو كسرو الخرطوم و العيانين كلهم بقوا يجو امدرمان و المستشفي وسخانة لانو شركة النضافة المتعاقدين معاها للمستشفي بتكون حقت شيخ مجاهد اشتغلت ما اشتغلت مافي زول بسالا و الاكسجين قاطع ومافي دربات و عادي.. المهم بعداك بتقول للمريض الا نحولك بقومو اهلو بمشو مستشفي سين الخاص بي تقرير بالحالة بقومو ناس المستشفي الخاص بقولو ليهم الا تدفعو 40 مليون تامين حتي ندخل العيان و دة كلو والعيان مجدوع في النقالة في الحوادث بقومو بعملوا اجتماع سريع وبفتشو تبرعات و ببيعو دهب مرتو عشان يلموا المبلغ المطلوب و دة كلو و العيان مجدوع في النقالة و بعداك بجوك راجعين تقوم تتصل بالاسعاف المركزي عشان يجو يشيلو العيان و انت عارف انو نحن عاصمة في كم مليون و بخدمو فيها كم اسعاف فممكن الاسعاف يجيك بعد ساعتين لانو اسعافاتنا بتسعف في اهل غزة و دة كلو و العيان مجدوع في النقالة بعد 5 ساعات و نص من الجرجرة يقوم عيانك يموت في النقالة و طبعا انت في الرواية دي كلها ما شايف زول غلطان الا الطبيب العمومي القاعد في الطواري عشان كدة بتقوم تدقو و تجي تكتب في الفيس اهمال و خطا طبي و يجي الناشط اسعد التاي يقول علي الطبيب مستهتر وصاري وشو والمفروض يدقو.. غلطان و الله عشان قاعد في بلد زي ويستاهل الدق المفروض يخلي الطواري من البداية فاضية عشان العيان بعد يموت نشوف جيس المرافقين ديل بقدروا يتشطرو علي القراصين الكبار ولا بسكتوا كالعادة.

د. راشد الطيب

شارك الموضوع :

تعليقات الفيسبوك

تعليقات


5 التعليقات

إنتقل إلى نموذج التعليقات

      1. 1
        الواضح

        كلام طيب يا دكتور . . لكن سؤال بالجنبة كدة . . انت كطبيب هل بتتعامل مع المرضي في السعودية بي تفس شنقة النخرة وقلة الادب البتعامل بيها المريض المسكين دا في السودان ؟؟؟؟ طبعا حا تقول في السعودية بيدفعوا لي اكتر . وانا معاك . لكن دا ما ياهو مستوي الاجور في بلدك وزي ما الناس التانية بتؤدي وظايفا من غير قرضمة وتعالي مفروض سيادتك برضو تعمل كدة. يا اخي في السودان الدكتور تجيهو في عيادتو وتدفع قروشك وبعد كدة يقل ادبو وينهرك . انت قايل الناس دي بتمشي مصر ليه .عشان المعاملة الراقية . الخيز هنا ما بيسمح اشرح ليك زيادة واضرب ليك امثلة

        الرد
      2. 2
        الخريف

        كفاية ما تضرب مثل تاني أنت مالك جنك ضرب. .عشان هو طبيب. ..التعامل تحكمه قوانين وهو أكيد في البداية تعامله ممتاز لكن تردي الأحوال جميعها أكيد أثر عليه

        الرد
      3. 3
        صبر ايوب

        السلام عليكم ورحمة الله تعالي وبركاته
        والله المحزن في الموضوع التعليقات البتقول الوضع تمام وزي السعودية وكدة. انا أربعيني العمر وشفنا زمن نميري وزمن الأحزاب والله بالنسبة للحاصل ده كان جنة بس برضو كان الجانب الخاص بالمستشفيات تعبان وكانت في اخطاء ومستشفي الحياة واحدة منهم في بحري.
        ياخي حاجة تحير زي البشير وناس الحركات المسلحة والمعارضة الكل عايز مصلحة نفسو ديل معقولة الواحد يقدر نهاية يومو ينوم ضميرو مرتاح.
        مشكلة السودان في مواطنيه يعني إنتا وانا وهم المشكلة كل واحد عامل فيها بفهم أحسن من التاني والدليل تلاقي صنايعي ينظرلمهندس في مجالو. بلد الرشوة وعدم الضمير بقا فيها شطارة والواحد اول ناس يسرقهم بكون قريبوا المغترب.
        مع الأسف نحنا دايرين وطنية مع علاج نفسي وآسف للتنظير 😁

        الرد
      4. 4
        احمد

        قلناها من قبل ولازلنا نكررها بان الأطباء اصبحو احقر شريحة وظيفية فى السودان. ..عدم كفاءة عدم التزام بأخلاقيات المهنة اخطاء طبية بالجملة وفوق ده تعالى وترفع فى الفاضى. ..عشان المواطنين ليهم حق يفقدو اعصابهم عندما يجدوا الاستخفاف واللامبالاة داخل المستشفيات…
        ..الواحد يتخرج اليوم بعد ستة شهور تلقاهو بقى نائب اخصائى…وتسال عن طبيعة المرض او الدواء يقول ليك انت عاوز تورينى شغلى…
        اطباء يفتقدون الى ابسط مهارات التواصل، من ابسط حقوق المريض ان ياخد فكرة عن مرضة وطبيعة العلاج، دلنى على طبيب واحد يفعل هذا اللهم الا القلة المتخصصة والتى يزيد رسم المقابلة فى العيادة الى الى اكثر من مليون..اما البقية الباقية فهى لاتفعل ربما لعدم معرفة او لانشغالهم بالجلكسيات والونسة الفارغة مع البنات والممرضات.
        عشان كده لمن نقول بانهم اتفه شريحة وظيفية فى السودان لم نكن نبالغ.
        انا ما عارف التفاصيل الحقيقة لما حدث بمستشفى امدرمان لانو كل الروايات الصادرة كانت من مصدر واحد هو جهة الاطباء ومن يساندونهم…لكن الرواية السائدة في الاسافير نشير الى ان الطبيب المناوب غادر المستشفى قبل وصول الطبيب الاخر…بالإضافة الى الاصرار على اورنيك 8…كل هذا والمريض المطعون فى حالة نزيف مستمر.

        على كل هذه ليست الحالة الأولى ولن تكون الاخير…ولن نستطيع ان تتعاطف مع الأطباء طالما ان 80% من سكان المقابر هم نتاج لأخطاء

        الرد
      5. 5
        محمد الوضاح الخضر

        انا بقول ليكم ليش الطبيب عندنا وقح وقليل أدب ببساطه لأنه يعتقد أنه من الصفوة كون كل سوداني بتمنى ولدو يبقي دكتور ف المتخرج من كلية الطب عندنا ينشأ معه هذا الشعور ويكبر رويدا رويدا ويصبح نرجسي أما الجانب الثاني فهو قصور الوسائل التعليمية في إيصال مهارات التعامل مع المريض خصوصا في الجوانب النفسيه في خلق جو ألفه بين المريض والطبيب والسبب الثالث تقصير من الدوله

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *