زواج سوداناس

تشكيل وزاري



شارك الموضوع :

في بلاد (الماق واق) ..دي جارة (الواق واق) ..أعلن عن تشكيل وزاري جديد ..طال الزمن ولم يكشف عن أسماء الوزراء الجدد ..حالة من الترقب في بيت سعادة الوزير1 ..يخرج ابنه منزعجا من غرفته ..يصرخ بأعلى صوته (موبايلي الشالوا منو من الشاحن ) ..تسرع والدته وهي تشير له بأن يخفض صوته ..تقول بصوت أقرب الى الهمس (هسس ..ابوك معاهو سعادة الوزير زميله في الصالون ..الموبايلات كلها معاهم ..حتى حقي انا)
الابن مندهشا: ليه ؟؟ في شنو؟ حملة تفتيش ؟؟
الأم : لا ..قالوا التشكيل الوزاري بعد يومين ..ادعي معاي أبوك يخلوهو في مكانه ..يارب العالمين تستجيب لي دعواتنا
الابن : والموبايل حقي دخلو شنو في التشكيل الوزاري الجديد ؟؟
الام : ..أديناهم الأرقام كلها الفي البيت ..حقات ابوك التلاتة ..حقي انا واخواتك وكمان حقك ..الشبكة ما معروفة يا ولدي ..انت بس أدعي أبوك يثبتوهو في مكانه.
مشهد ثاني:
السيد الوزير1 ..معه ضيفه الوزير 2..الاثنان يجلسان معا ..امام كل منهما سلة بها مجموعة من الهواتف النقالة ..يبدو عليهما القلق واضحا ..يقلب كل منهما احد الهواتف ليتاكد من انه يعمل …
السيد الوزير 1: انا بس لو خلوني الدورة دي ..تاني ما عايزشئ ..بعتزل وبتفرغ لي شركاتي ..انا ذاتي تعبت من كترة السفريات ..ياخي الزول ما يقعد يومين ..يقوم يضطر لي سفرة تاني.
الوزير 2 : والله انت احتمال كبير يخلوك ..ليك يا دوب عشرة سنوات ..ما مسكت غير تلاتة وزارات ..لسه باقي ليك كتير ..لكن أنا في مصادر رجحت انو ابقى والي في واحد من الولايات.
الوزير1: يا زول أي حاجة ..طوالي تقبل ..تخيل امبارح اتصل بي الفاتح قال لي حزبهم حيشارك في الحكومة ..وبيسألني أفضل يقبل بي والي ولا وزير دولة ؟؟ ..انا قلت ليهو والي أحسن ليك ..مخصصات ممتازة ..لكن وزير دولة دا تقعد تقالع بي جاي وبي جاي.
الوزير 2: صحي والله ..بمناسبة الفاتح دي ..ياخي قالوا ليك في شيخ ختري بشكل ..الزول لو قاعد في الوزارة كم كمين سنة مافي واحد يقدر يهبشوا؟؟ ينط من كرسي لي كرسي ..زي ما عايز .
الوزير 1: دا وين دا ؟ الحقني بي تلفونو ..هسه دي نمشي ليهو.
الوزير2: بس قالوا طاقيته كبيرة شديد .
الوزير 1: مهما كانت ..نحن بندفع ..دي وزارة مش لعب …انا ما عايز كتير ..بس الدورة دي وخلاص …ومن ثم يكمل في سره (بس اكمل بيت المرا التالتة دي واتخارج طوالي). ..
يبداءن في لملمة الموبايلات استعدادا للتحرك الى الفكي (أبو طاقية) ..عندما يفتح باب الصالون ..ويدخل الأبن مندفعا ..(يا أبوي جيب موبايلي ..أفتح التلفزيون ..اسمع البيان الرسمي ..قالوا المرة دي الوزراء كلهم حيستوردوا بدلهم روبوتات من الصين )…الوزيران ..يتبادلان نظرات الحيرة ..
فجأة يقول الوزير 1 : يلا بسرعة …نمشي نلقى لينا فرقة ..في توكيلات استيراد الروبوتات.

د. ناهد قرناص

شارك الموضوع :

تعليقات الفيسبوك

تعليقات


1 التعليقات

      1. 1
        عباس

        لو بشبش ده قاعد أي زول عندو فرصة يبقي وزير حتي ادم بتاع الدكان..

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *