زواج سوداناس

محاسن تطير عيشتها



شارك الموضوع :

الفيسبوك ومواقع التواصل الاجتماعي تضج بسيرة شخصية مجهولة، تدعي محاسن، ما أن تدخل إلى أي موقع أو قروب فى الواتساب إلا وتجد محاسن حَاضرةً، أصبت بالفضول البالغ، ولجأت إلى محرك البحث (قوقل)، ما أن كتبت اسم محاسن حتى أكمل لى الجملة بـ (محاسن كُبِّي حرجل)، معقولة ياخ (قوقل) ذاته (فسدت أخلاقه)، وإذا بي أجد أن محاسن صاحبة الحرجل، أغنية لفنان لأول مرة اسمع به يدعى (شهاب الدناقلة) هو صاحب الكلمات والألحان والأداء،

وحتى تكون فى الصورة عزيزي القارىء هذه هي حكاية محاسن وفقاً لكلمات الأغنية: (لو ما شفتو يمكن أموت لو شفتو بتبرجل محاسن كُبِّي جبنة ومحاسن كُبِّي حرجل، محاسن جيبي موية، إن شاء موية نار، من شفت الحبيب قليبي فيه احتار، سماحة ما عادية تقيف قدامها تخجل، محاسن كُبِّي حرجل، محاسن كُبِّي شيرية، كباية كبايتين يمكن يحن عليّ يمكن قليبه يلين، الريدو جنني وأنا ما داير أعقل، محاسن كُبِّي حلبة، إن شاء الله سم هاري، أنا بقولها كدا كدا رب، أنا بشوتها ضفاري، أنا بريح ضميري، كدا وكدا البحصل يحصل محاسن، كُبِّي جبنة وخليني أهدأ وأروق لو مرة بجنبي خلي القليب مهرود، داير أصارحه بريدي وما داير استعجل). هذا هي قصة محاسن التي سارت بها ركبان المواقع الإسفيرية.

كلمات الأغنية ما عايز أقول (هابطة) لأني بكون ظلمت (الهبوط)، لكن يمكن تفكيك الكلمات على هذا النحو، أولاً من يريد شرب الحرجل والحلبة يكون مُصاباً باضطرابات في المعدة، وإذا كان المُغني يحب محاسن كل هذا الحب، (الجاب طمام البطن شنو)، الأمر الثاني (القلوب لا تهرد) وإنما تجرح، وما يهرد هي الملابس يا عزيزي شهاب الدناقلة، وما قدرت استوعب دخول موية النار والسم الهاري في هذه اللحظات الرومانسية، ويا عزيزي عندما استمعت لأغنيتك تذكّرت الشخصية الوهمية التي ضجت بها وسائل التواصل الاجتماعي الفنان علي كبك، ومن وجهة نظري الشخصية شعر علي كبك مُتماسك وأفضل من شعرك هذا، فأغنيته الشهيرة (اشرط ليك هدومي) وهي من ألحان الفنان (حسن طلس) تقول:
“اشرط ليك هدومي، واعمل فيها جاني،
لمن تابي ريدتي، وتنسي زمن حناني، ياما عشقتك انتي، وأهديتك أغاني،
وياما مرقنا سوووووا، وكملنا التسالي، أكلنا الدوم ودقة، ساهرنا الليالي وسكّانا الحرامي، وعشناها الأماني بي ريدي وغرامي، فجأة قسيتي إنتي، وحبيتي المحامي، نسيتي هواي وريدي، وسبتي سماع كلامي”.

أغنية علي كبك هذه أبلغ وأكثر تماسكاً من هذه الأغنية الركيكة مَعنىً ومضموناً، لأن علي كبك عبّر عمن يجيش بخاطره بعد أن تركته محبوبته وظفر بها مُحامٍ، فقرر أن يشرط (هدومه حُزناً) على فراقها، ويا عزيزي الدناقلة (فضحتنا فضيحة) في قوقل أسي في داعي، الناس في شنو وأنت في شنو..؟! محاسن تطير عيشتها..!

بقلم
ياسر عبد الله

شارك الموضوع :

تعليقات الفيسبوك

تعليقات


3 التعليقات

      1. 1
        شكري

        والله تطير عيشتنا نحن البنقرأ كلام زي ده..

        الرد
      2. 2
        محاسن فضل

        سلاااام للجميع بصراحة موضوع محاسن عامل ضجة ف مواقع التواصل هل الناس بقت ماعندها موضوع تتحدث عنها وعاوزة تقضي وقت فراغها ام الحاصل شنو بالضبط هههعهه والله رفع الحظر عن السودان ما آخد كل الوقت دا

        الرد
      3. 3
        صابر عيسي

        يا فردة…ويا حبه…وياخوووه…وي مان..وياآصلي
        #وياصاحبـــي👍
        تعالو ي ناس نتفاهم شويه بلغتنا ولهجتنا وبساطتنا
        عن الزوووله الحنتكلم عنها دي 😌😳

        اللهيي #آمنا__وأختنا_ست_الشاآإي🍵🍮

        آي ست الشاااي وست القهوه ست كيفنا ومزاجنا
        يلا ي ناس الاصليه الجات فارشه ومولعه الكانون اوالشعله وحاضن الناروالسخانه دي اليوم كلو والله م عشان عاجبا الشغل مع انو الشغل شريف يكفي انو كسب حلال وعرق جبين..لكن راعوو للظروف الاجبرتا وخلتا تقعدالقعده دي ..يلا في واحده بتكون بتربي في ايتام وم عندها كافل واحده بتكون ظروف اهلها م كويسه بتدفع ايجار وبتعول اخوان في البتعلم وفي البتعالج ووو.. الخ كل الظروف دي في وشها وماعندها غير صندوقا دا وهي لسه مبتسمه وصامده…
        #يلا_الزيت_شنو
        م دام هي في مقام أمنا او اختنا يبقي ابسط حاجه ممكن نقدما ليهم #الاحترام عشان هي والله م ناقصه.. ياخ تعال اقعد اتونس مع اصحابك بآدب وزؤق واسلوب وراعي لآلفاظك عشان الكلمه الانت م بترضاها تسمعا امك او اختك م تسمعها للزوله دي برضو هي عندها نفس الشعور والاحساس…شنو ي فرده المويه م جابوها ليك عاادي ياخ قوم اشرب من الحفاظه وتعال المشكله وين ..القهوه اتآخرت اي يمكن في عشره قدامك وهي يدها واحده اصبر ياخ …دفعت وباقي ليك جنيه اوجنيهين وم رجعت ليك والله م قاصده تسترهنك بكون م عندها فكه والقومه زاتو صعبه ويمكن نست اكسر الحنك عادي..الكلام كتير وم بخلص بس والله ي ناس مرات ف حاجات مننا كشباب بتزعل يااخ راعي للحجه دي آحيانا في واحده بتلقاها تقيله شويه والقومه صعبه عليها يااخ خليك راجل وانت زول شاب قوم شيل منها القهوه قبل م تقوم هي ودا كلو في ميزان حسناتك انت لانو اسلوبك الجميل بيزرع حاجه حلووه في نفوس الاخرين…

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *