كوش نيوز .. أخبار السودان بين يديك

الدنيا فرندقس



شارك الموضوع :

[JUSTIFY]

الدنيا فرندقس

الاستثمار جنن الناس.. العندو جنيه يفكر انو يستثمرو.. العندو صاحب ساكت يفكر انو يستثمرو ويربح من وراهو.. الحياة بقت حكاية صعبة.. فكرت لو ربنا أداني قروش.. اعمل مجمع طبي.. كل حاجة فيهو تكون تبعي، أول حاجة من الحوش ابدأ.. أسوي مواقف للعربيات بقروش.. الدخول ساكت بجنيه.. تكون تبعي.. أجيب لي نيمتين كبار اغزهن قدام المجمع.. واتعاقد مع ستات شاي.. يجن يبيعن الشاي قدام المجمع.. واتعاقد مع ست ودع ومع فكي اسوي ليهو راكوبة جنب المجمع.. جوا المجمع كل التخصصات.. اجزخانة اللت حبوب وحقن وجنبها اجزخانة شعبية.. فيها كل شي.. جردقة محريب حرجل مر حجازي.. كل شي.. واكتب على يافطة المستوصف.. مجمع(الدنيا فرندقس الطبي).. جميع التخصصات.. توجد حنانة ومشاطة.. وكوافير.. ساونا، حمام مغربي وتركي.. وحمام طشت وجردل وكوز..

تجهيز عرايس.. نجهز العروس لحدي ما تضهب علي العريس وعلي ابوها وامها.. تحويل رصيد، اسكراتشات، اكسسوارات موبايلات، حبوب تسمين. (.. ما زال الشحن مستمرا.. تشاهدونه غدا.. تشاهدونه الآن.. من الأمس.. و.. جضوم الغد)..

قطع غيار بني آدمين.. (كبد.. كلاوي.. قلوب.. مصارين.. كوارع..) كريمات قدر ظروفك.. نظلط الوشي.. والايدين والكرعين.. نزرع الشعر (شعر ناس.. شعر غنم.. ضنب حصان.. شعر دقن قرد)..

نشتري ونبيع ونستبدل الشُفع.. لو أي زول مرتو ولدت ليهو شافع أو شافعة وشافها ما نافعة معاهو نبدلها ليهو وهو واقف.. كمان لو زهجان منو وداير يبيعو نشتريهو.. طهورة شُفع (بالأقساط المريحة).. نحنط الجثث.. نبيع الجثث لطلاب كليات الطب.. كما توجد مقابر ملحقة بالمجمع.. (درجة أولى وتانية وتالتة).. يوجد لدينا خيم وكراسي للبكيات عليها خصم خمسة وعشرين في المية لأي زول يموت عندنا..

بالمجمع أقسام حديثة.. قسم الكي بالمناجل والسيخ.. قسم الحجامة.. قسم الفصادة.. قسم القطايع والفلايت.. كما يوجد قسم الوخز بالمسامير.. ترأسه اخصائية الطعّين الدكتورة (شهاو.. شي.. شخخخخخخخ).. والتي كان اسمها الدكتورة (شهد شيخ الدين).. ولما مشت اتخصصت في الصين غيرت اسمها.. لــ شهاو.. شي.. شخخخخخ.. وتعتبر الدكتورة شخخخخخخ من أندر الاطباء في العالم للوخز بالمسامير.. كما يوجد قسم للتخدير باستخدام تقنية التخدير بالعتلة.. المرضان يقعد ونغفلو ونقول ليهو عاين الطيرة ديييييك.. اول ما يتلفت نديهو بالعتلة في قفاهو.. يتخدر اقل شي تلاتة ايام.. والجراحين يسرحوا فيهو.. ودا بيكفينا شر مشاكل التخدير العادي الكتل ناس كتااار..

وأيضا أضيف إلى قسم الأسنان تقنية قلع الضرس بواسطة الكراكة الهايدروليك.. ندفن الزول الضرسو موجعو في حفرة لحدي راسو.. وتجي الكراكة توكر سنونا في الضرس الدايرين نقلعو ونشغلها.. في اقل من دقيقة الضرس يتقلع وممكن كمان يكون معاهو الحنك هدية من إدارة المجمع..

كما اضيف قسم البصيرة ام حمد لطب وجراحة العضام.. يرأسه الدكتور رضراض أبو مسطرة.. وهو من اكفأ الأطباء، اتخصص في المانيا.. سبعطلشر سنة وهو قاعد يتخصص في علاج وجراحة عضيم الشيطان.. لحدي ما الشيطان زهج وحرد وقال ليهو مش العضيم دا؟ أها.. خليتو ليك..

[/JUSTIFY]

الباب البجيب الريح- صحيفة اليوم التالي

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.