كوش نيوز .. أخبار السودان بين يديك

الحاضر يكلم الغائب.. الحايم يكلم النايم: الزعيم راغب في الجمع بين الأختين



شارك الموضوع :

الحاضر يكلم الغائب.. الحايم يكلم النايم: الزعيم راغب في الجمع بين الأختين

[JUSTIFY]
المريخ عريس درع الوطن.. الأول بالطول.. التاني بالعرض.. الثالث هز الأرض

* لم يفاجئ فوز المريخ بلقب بطولة كأس السودان إلا الحالمين والمحلقين في فضاءات الأوهام، ممن لعبوا المباراة مقدماً في أعمدتهم وصفحاتهم، وقطعوا بفوز الهلال فيها.

* كنا نقرأ كتاباتهم عن أن المباراة محسومة لصالح الهلال ونضحك مما نقرأ، لأننا نعلم يقيناً أن الفريق الذي حقق الثنائية وظفر بلقب الممتاز وكأس السودان في الموسم السابق، ونال لقب بطولة سيكافا في أصعب الظروف، وبعد أن خاض البطولة بلا إعداد قادر على ممارسة عادته القديمة، ومستعد للفوز على الهلال بأي مجموعة يدفع بها برهان.

* هزم الإعلام الأزرق فريقه نفسياً عندما أوهم لاعبيه بأن الكأس مضمون للهلال وأن الفوز على المريخ سيتحقق بأقل مجهود، لذلك عجز لاعبو الهلال عن العودة للمباراة وانهاروا نفسياً بعد أن تقدم عليهم المريخ بالهدف الثاني.

* في المقابل كانت العزيمة حاضرة في نفوس فرسان الأحمر، لذلك لم يتأثروا بتفوق الهلال المظهري عليهم في مطلع المباراة، ولم يهزهم هدف ولدنا بكري المدينة المبكر!

* تقدم الهلال بهدف فلم يستغرق الأمر من لاعبي المريخ سوى خمس دقائق فقط لمعادلة النتيجة.

* في الحصة الثانية وضح الفرق بين نفسية لاعبي الفريقين، واتضحت قيمة لاعبي المريخ الكبار بقيادة الحارس المتميز جمال سالم الذي حفظ لفريقته فرصته في الفوز بيقظته وهدوئه وقوة أدائه في اللحظات التي تفوق فيها الهلال على المريخ في وسط الملعب خلال الشوط الأول.

* الحديث نفسه ينطبق على المصري أيمن سعيد الذي لعب دوراً كبيراً في حسم النتيجة وترجيح الكفة الحمراء بتسجيله للهدف الثاني وصناعته لرصاصة الرحمة.

* لم يكن أداء المريخ في مجمله نموذجياً، لكنه ككل الفرق الكبيرة عرف كيف يفوز وظفر بالكأس بأقل مجهود.

* لن نقول إن مهمة المريخ أمام الهلال في قمة الدوري سهلة وميسورة، لأن مباريات الديربي تظل مفتوحةً على كل الاحتمالات دوماً.

* لكننا نجزم بأن مهمة الهلال في مباراة قمة الدوري ستكون أصعب بكثير من مهمته في نهائي الكأس، لأن المريخ سيدخل اللقاء المقبل بمعنويات أعلى، وبثقة أوفر، بخلاف العامل الجماهيري المؤثر في مباريات القمة، بالإضافة إلى أن المريخ سيسترد خدمات لاعب مؤثر بقيمة رمضان عجب.

* لن يلعب المريخ قمة الدوري بذات المستوى الذي بدأ به قمة الكأس، وسيضغط خصمه بلا رأفة منذ مطلع المباراة، وقد أثبتت مباراة أمس الأول أن فريق الهلال الحالي لا يقوى على تحمل الضغوط، وأنه يعاني من مشاكل كبيرة في خطه الخلفي وحراسته، بخلاف جودة أداء الخط الخلفي والحراسة في المريخ.

* لقن فرسان المريخ إعلام الهلال درساً قاسياً بالثلاثية الحارقة قبل أن يجرعوا الفرقة الزرقاء علقم الهزيمة.

* لن نقع في ذات الفخ الذي وقع فيه إعلام الهلال قبل مباراة أمس الأول، لكننا نقول بكل ثقة إن مهمة الهلال في قمة الدوري ستكون مضاعفة الصعوبة، وإنه مرشح لتلقي هزيمة ثانية في ظرف أسبوعٍ واحد، ولو حدث ذلك فستتفجر الخلافات في الساحة الهلالية لأن إعلام الهلال لم يهيئ جماهيره لاحتمال خسارة اللقبين مطلقاً!

* بالنسبة إلى المريخ لديه كأس في الجيب الخلفي.. والثاني في الملعب!

* بالنسبة إلى الوصيف لقب ضاع.. والآخر مهدد بالضياع.. الموسم كله مهدد بالفشل!

* قالوا المريخ ضعيف.. خموا وصروا!!

* كان الدرس قاسي اترصد.. من أب زرد!!

ما يطلبه المكردنون في الأرض!!

* بعد انتهاء عقد الورغنة والكلتشة والسكوهة يطيب لنا أن نقدم لكم حلقة من برنامج ما يطلبه المكردونون!

* أول أغنية.. نشيد للرشيد!

* أداء أطفال (روضة ماما فطومة): (واحد هو ربي.. اتنين ماما وبابا.. تلاتة هم أخواتي.. دخلوا في شبكاتي)!

* لن يفوتنا أن نعيد بث أهازيج الصفوة القديمة: (في كمبالا وفي السودان.. تلاتة تلاتة في كل مكان)!

* بناءً على رغبة حبيبنا إيفوسا الأجلح نقدم أغنية الرائع الراحل أحمد المصطفى: (هديلك جن تلاتة.. شوفوا حبيتي ياتا.. أريدها وأريد حلاتها.. أنا دستوري نازل في الخرطوم تلاتة)!

* يسعدنا بعد العرض الهزيل المقدم من الكاردينال لأولادنا مطلقي السراح أن نهديهم أغنية (تلاتة أعوام قضيتها آلام.. في الثانوي العام.. أنا يا حرف اللام)!

* قبل الختام يسعدنا أن نقدم للصفوة أغنية الفنانة المبدعة (فائزة ضفر): (للقون الأول أهديك يا سموأل.. وبالقون التاني أهنيك يا تهاني.. وبالقون التالت سعيدين خالس يا أبو فارس!

* أغنية الختام للفنانة (فطومة المدينة)، ونهديها للكارينال في دبي وإيفوسا الأجلح في السعودية وجماهير الوصيف المحبوسة في زنازين الفرح الأحمر، ولطيور الهلال المهاجرة من المعبرة للمفخرة، وللأرباب وياسر عبد الفتاح في جدة، ولهمشري في البحرين، ولبالكو في الدوحة، (بعد الشكوى والطيران.. الوصيف مالو زعلان.. قالوا النجمة في الميدان.. تلاتة غالبة فلان.. والفرحة عمت المكان.. والزفة بالألوان)!

* لا خوة لا جنتلمان!

* يا كوتش يا برهان.. الهلال مالو كحيان؟

تلاتات

* يا وصيفاب.. الكورة غالبة ومغلوب!

* لذلك حذار من الحماقات.. وحذار من حليفة الطلاق (بالتلاتة)!

* تحتوي روشتة الدكتور راجي (أخصائي أمراض الهلال) على 3 حبات!

* الأولى بالطول.. التانية بالعرض.. التالتة هزت الأرض!

* سؤال بريء لمحمد عبد الماجد، أيهم الأجمل في أهداف الزعيم التلاتة!

* الأول أم التاني أم التالت؟

* شكوى جااااهزة لكبسور .. قال أيه: هدف الزعيم الثالث فيه غش تجاري.. أوضح من تزوير فيتا!

* أوحى أيمن لدفاع الوصيف بأنه سيسدد الكرة في المرمى مباشرة، ومررها لراجي.. وعينك ما تشوف إلا النور.. يا كبسور!!

* ده غش وللا ما غش يا كبسور؟

* الشكوى صحيحة والشهود موجودون.. كاميرات قناة قوون، عموم من شهدوا موقعة ذات التلاتات، والحكم وديد، ومدافعو الوصيف وإعلام الركشة!

* الشكوى مضمونة 300 المية!

* ليه يا أيمن تعمل كدة.. تغش الوصايفة بالشكل ده؟

* انتو ما عارفين.. المصري من يومو غشاش؟؟

* قالوا الزعيم تعبان.. وراهم الطفى النور منو!

* (ثلاثة) جمالات طمأنت الصفوة وأشاعت الفرحة.. جمال أبو عنجة.. جمال الوالي.. وجمال سالم!

* حتى اللحظة المحصول الأحمر ثلاثة كؤوس: رديف وسيكافا والسودان.

* الربط المقدر لكؤوس الزعيم مثنى وثلاث ورباع!

* قالوا (عزام حمام)، مبروك للوصيف الخفيف.. دخل زمرة الحمام التمام!

* ما فيش فرق بين الوصيف وبندر الصومالي!

قالوا وقلنا

* في ليلة ختام عرس السودان فاز الزعيم على الوصيف بالثلاثة، وحقق لقبه الثالث على التوالي!

* أيه حكاية التلاتات دي يا الرشيد علي ضفر؟

* الحبيب يس علي يس قال لو كنت في مكان المريخاب لما شهدت المباراة لأن الكرة ستدخل شباك جمال الوالي قبل شباك جمال سالم!

* بعد ضربة ذات التلاتات كتب عن صعود الميرغني!

* أمس كتبت جريدة الرشيد علي ضفر: (عنتر كتلو أعمى)!

* يعني عنتركم راح في حق الله؟

* يعني مات وشبع موت؟

* طيب نحن نتلت منو في نهائي الدوري يا الرشيد علي ضفر؟

* يا كافي البلا عنتركم ده مات كم مرة؟

* مازيمبي كتلو.. وفيتا كتلو.. والزعيم كندكو وكردنو وكفنو!

* عنتركم ده عندو كم روح يا وصايفة؟

* يا فوزي يا أسد.. الزعيم قلب البلد!

* في أعمى بجيب تلاتة أقوان؟

* لو كان مفتح كان جاب كم؟

خذوا حذركم.. الضرب محمدكم

* حصد الزعيم اللقب الثالث.. والمريخاب ما شبعوا!

* يجب على لاعبي المريخ ألا يتوهموا أنهم أرضوا قاعدتهم!

* لن يكتمل الفرح الأحمر ولن يحدث الرضا إلا بعد أن يكتمل الربط المقدر.

* كأس الدوري عندنا مقدم على كأس السودان.

* ثلاثية نجيب محفوظ لن تكفينا في قمة الممتاز.

* لاعبو المريخ كانوا بعيدين عن الإجادة في لقاء أمس الأول.

* فازوا على الوصيف الكحيان بأقل مجهود.

* مطلوب منهم أن يقدموا أفضل ما عندهم في لقاء حصاد الممتاز.

* نحن بالتلاتة يا دوب ابتدينا!

* الخصم تعبان.. ميت وشبعان موت!

* قالت فاطمة الصادق لا يمكن لعاقل أن يصدق هذه النتيجة لأن الوصيف راقد مستشفى!

* وقالت: الشوط الأول انتهى بتقدم الهلال بهدف بكري المدينة!

* ألحقوا المستشارة طشت شبكة!

* شطبت قون ضفر!

* قون قلع الضفر كمان بتنسي يا فطومة؟

آخر الحقائق

* قال الرشيد هزيمة الهلال كبوة فارس!

* فارس ولدك.. وللا فارس بلا جواد.. وللا فارس ونجود؟

* أبو القاسم مزمل فرحان.. وفارس الرشيد المسكين نام زعلان!

* الحاضر يكلم الغائب.. النايم يحدث الحايم!

* بكرة امتحانات نهائي كأس السودان!

* الامتحان يوم (الثلاثاء) وزمنه تلاتة ساعات!

* ما بتصدقوني لو قلت ليكم (التلاتاء) طلعت صدفة!!!

* رقم جلوس الرشيد علي ضفر 333!

* رقم جلوس أيمن عبد الماجد تلاتة وتلاتين!

* رقم جلوس خالد عبد العاطي 33 في 33!

* ذكروا جداول الضرب كويس!

* ركزوا معانا علي جدول تلاتة!

* تلاتة في تلاتة تساوي تلاتة زايد تلاتة زايد تلاتة!

* لو ما قريتوا كويس حا نوريكم تلت التلاتة كم!

* علي قول البرير: الزععيم شال تلاتة أتلات كؤوس الموسم!

* عندنا ليكم دورس خصوصية.. الحصة بي تلاتة ألف!

* الامتحان في القاعة رقم تلاتة!

* المراقبون: الأستاذ ضفر والأستاذ أيمن والأستاذ راجي!

* مشرف التصحيح الأستاذ برهان.. أخصائي خلع الأظافر!

* يوجد ترحيل من وإلى مقر الامتحان.. الرسوم تلتمية جنيه!

* خصصت هيئة امتحانات السودان (تلاتة) وجبات لكل ممتحن!

* وكمان عندنا تلاتة مشروبات مجانية لكل طالب راسب!!

* عصير فيتا.. وعصير فييرا.. وعصير تلاتة في واحد!

* عصير (تلاتة في واحد) ده مكون من تفاح راجي وبرتقال ضفر وموز أيمن!

* عصير صحي ومركّز!

* سمعنا تحت تحت قالوا المكردنين في الكأس غيروا تلاتة إطارات لبص الهلال!

* لو غيروا اللساتك الأربعة والإسبير كان انتهت خمسة!

* البص الأزرق زي الفريق الأزرق.. الاتنين مضروبين في التنك!

* والاتنين محتاجين عَمَرة وصنفرة وضفرة وبوهية!

* سمعنا قالوا حا يبيعوا البص لأنه ملجن.. ويشتروا ركشة!

* الرشيد.. الرشيد.. الركشة فيها كم لستك؟

* الهلالاب احتجوا علي رش الملعب!

* رش الملعب هين.. المصيبة في رش التلاتات!

* قالوا كأس سيكافا هيافة.. قلنا درع الوطن آخر قيافة!!

* سيكافا زون.. وكأس محلي!

* السنة الجاية نهائي الكأس وين؟

* ناوين نفسحكم بالتلاتة!

* لمعلوميتكم: الدوري الممتاز برضو بطولتنا المفضلة!

* المريخاب ما عندهمش خيار وفقوس.. بين الكؤوس!

* جميع البطولات عندنا مفضلة!

* ما تنسوا تودعوا أولادنا قبل نهاية مباراة قمة الدوري!

* حاشاهم ما قصروا معاكم!

* ولدنا احترمنا.. رفض ينفذ رقصة العقرب بعد القون اليتيم!

* سجل فينا وأبى يكاوينا!

* كلك ذوق ومفهومية يا مدينة!

* العقرب فيها كم نقطة؟ إبراهيم فيها كم راجي؟ عوض فيها كم أيمن؟

* وأيمن فيها كم نقطة؟ وضفر فيها كم ركشة؟

* والركشة فيها كم لستك؟

* تاني قولوا المريخ تعبان!

* حذرناكم ما سمعتوا الكلام!

* الكورة الجاية العجب الصغير محمدكم!

* رمضان أحلى الأقوان!

* رمضان عجب.. ما رمضان أحمد السيد!

* في الممتاز دخلوها وصقيرها حام.. ووانغا الكيني عندو كلام!

* الإعصار في عقر الدار!

* مطلوب من الصفوة أن تحضر بكثافة لمؤازرة الأبطال في تدريب اليوم!

* المهمة لم تنته بعد!

* لسه عندنا كاس في الملعب.

* في الدوري الكاس.. الكأس كاسنا!

* يا مأمون أبو شيبة أحسب صاح!

* الزعيم حصل على لقب كأس السودان 23 مرة، مقابل 7 فقط للوصيف الخفيف.

* كأس السودان لم يبدأ في التسعينات!

* خبر الأمس: هلال الكاردينال.. سهل المنال!

* خبر اليوم: ضفر دخل أيمن عبد الماجد في ضفرو!

* آخر خبر: بص الهلال ماركة (تاتا).. شايل تلاتة!!
[/JUSTIFY]

مزمل ابو القاسم – كبد الحقيقة
صحيفة الصدى

شارك الموضوع :

2 التعليقات

      1. 1

        فرحة لن تطول باذن الله
        ثم اجمل الاهداف لو كنت محق فهو هدف بكرى
        ثم الا تستحى الهلال كان الافضل وهدف ضفر تسلل لا يفوت على اى حكم مبتدى

        الرد
      2. 2

        إتفسح يا بتاع الروضة، هدفك الأول تسلل راعي الضان في الخلاء إستعجب من الحكم المريخي . لو ضربة الجزاء صدقت كان تكون في الإنعاش مع سلك حتى اللحظة.

        الرد

    أضف تعليق

    لن يتم نشر عنوان بريدك الإلكتروني. الحقول الإلزامية مشار إليها بـ *

    This site uses Akismet to reduce spam. Learn how your comment data is processed.