كوش نيوز .. أخبار السودان بين يديك

النانو.. ختاني في حنانو



شارك الموضوع :

[JUSTIFY]قرأت في أحد المواقع الإسفيرية.. أن شركة (سامسونج) الالكترونية.. في دفاع عن تلفزيوناتها.. الشاشات.. من أنها قد تتجسس على المشاهد.. وتنقل الدايراهو لأي جهة كانت.. وقد ذكر في تنبيه كاتباهو شركة سامسونج على الشاشة ما معناه أن الشاشة ممكن تتجسس عليك.. لمصلحة طرف ثالث ويستفيد من المعلومات التجسسية.. ويسجمك ويرمدك.. المشكلة مافي تجسس شاشة أو ريسيفر أو موبايل.. المشكلة في التكنلوجيا ذااااتا.. يعني أي حاجة رقمية ممكن تتجسس عليك.. من تلفونك الشايلو لحدي المكوة والثلاجة.. غايتو التلاجات البتجسس علينا ما بلقو فيها غير قزاز مليان موية وحلة تبيخ بامية قرونها راقدة وتدفر في بعض.. وللا شافع حد ومد متفرجخ تحتها ويبكي.. بالواضح كدا نحن قاعدين في السهلة.. أو إن طال الزمن أو قصّر ح نقعد في السهلة.. وماعندنا حاجة سر.. أي سر.. تشتري ريسيفر عشان تتفرج في العالم.. تلقى إنت ذااااااتك قاعدين يتفرجو فيك عن طريق ريسيفرك.. وصيتي للمرة التانية تقلو الهدوم.. أو إن دايرين تاخدو راحتكم ما تسعو أي حاجة رقمية.. لا تلفون ولا تلفزيون ولا رادي.. لا تلاجة.. لاغيرو.. التكنلوجيا ماشة مشي شديد.. وتطور سريع.. ونحن نصيبنا منها نفتح خشومنا ونندهش.. ونتسابق في شرا الغالي والحديث منها.. ونتبوبر.. نبقى عاقلين ونخلي البنسوي فيهو دا.. ونشتغل في الحاجات دي بحذر شديد.. والجماعة البيقفلو الأوضة وبيقيفو قدام الريسيفر ويرقصو.. ويغنو منو دي؟ أنا دي؟ بري.. بري.. بري.. باكر يلقو العالم كلو يتفرج في فديعهم ورقيصهم وممكن على الهواء مباشرة.. ونقعد في ديل ما نحن.. الرقيص هين وحلاتو.. الكلام النضم اللخر..! أها كمان النحدسكم بي نصيبة تانية جايه علينا.. تقنية النانو.. والنانو باختصار كدا معناها حاجة في منتهى الصغر.. يعني يسو ليك طيارة صغيرة جدا في حجم باعوضة.. أو حجم ضبانة.. ويطيروها وتحوم فوقك.. التحكم فيها عن بعد.. أمريكا مثلا.. ويكون مركبين ليها كاميرا في حجم راس الدبوس.. وتصورك فيديو محل ما تمشي.. وتصورك وترسل.. وانتو عارفين الضبان قاعد يباري الزول لي وين.؟

يعني في النهاية كدا مقاساتك كلها تكون في غرفة العلميات.. شوفتو البلاوي دي؟؟؟.. النضم دا ما ونسة خيال علمي.. الناس برا شغالة.. ونحن بي جاي مشغولين ببعض.. داعش وحوثيين.. وسنة وشيعة.. واقتل واضرب واخنق والبع.. والزول دا ما تخلوهو يمشي لي قدام.. والزول داك عواليق ساكت دمروهو.. نضطهد في العلماء ونقلل منامهم ونضايقهم في معايشهم عشان خلاف فكري وخلاف سياسي.. وأحيانا كجنة سااااااااكت لي الله!.. بعدين أقولكم قولة نحن عندهم حيوانات تجارب بيكضبو علينا بحقوق الإنسان ساكت ويشغلونا بيها.. ويشغلونا بي رمرام التكنلوجيا واتس اب.. وفيس بوك.. وونسة شديدة وما معروف ونستنا دي مشت على ياتو جيهة؟.. ومسلسلات مكسيكية المسلسل لي جنا الجنا حلقاتو ما تنتهي.. كل البيخترعوهو ويكونو عاوزين يجربوهو، يجربوهو فينا ونحن فرحانيين وننط.. و(دخلوها وصقيرها حام).. وما عارفين جايي علينا دخلوها وضبانها حام.. ولا بي يحتاج يدخلوها.. قاعدين عند أهلهم وضبانها حام.. حام فوقنا.. وبدايتها حسي بالطيارات البلا طيار.. غايتو تراني نضمت حسي.. وإن ما غيرنا طريقة تعاطينا مع الحياة ونظرتنا ليها.. البيبقى علينا الله لا حضرني ليهو.!!
[/JUSTIFY]

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.