رمضان جااااكم…..ملحق
الواحد فيهم مما يسمع سيره رمضان قرب يجري علي الحفاظه بقطع كوزين ويتكل عليها ويغني (ظلموني الناس وجارو علي)……
اليوم كلو من حفاظه لحفاظه!!! الكرستالات دي طول اليوم في خشومهم زي الدرب وبزازات الاطفال مساكين عاوزين يرووا قبل رمضان…..
والعجيب الاكل نهم مبالغ فيهو..الواحد قعدتوا في الصينيه تقول عاوز يكمل المقرر قبل الامتحان .وحتي بعد يشبع لو لقي طريقه يخت في جيوبوا………..!!شفقانين شفقه!!!
الشخص من ديل عاوز تجهجهوا بس قول ليهو ((رمضتن كيف)) يكره اليوم الشافك واليوم الجابوا في شارع بيتكم ويغني مع البلابل:
قلق بينا..طمم بينا…كفايه علينا …ياالعزبتنا..ترررررررررم
نوع تاني ((الكييفين)) ديل بقه معظمهم لاعندو ذره ايمان ولاحتي اماني ……….! همهم كلو سفه النهار وسجاره الضحي ..حالتهم صعبه خالص تخيل زول يصل لدرجه يتسحر بي سجاره او تمباك..!!!!!!
المدمنين ديل ياعيني من الظهر الواحد فيهم يتدردم ويتلملم وسط السرير زي الكفر الحرقوهو في مظاهرات ركبو في جبهتو ويرقد ..يحمر للشمس وهي تحمر ليهو لامن تمغرب وقبل البلحه يقطع بي سفه وحبه كبكبي او بليله…!!!
دي حاله ياجماعه وين الايمان والعباده معقوله؟؟؟ ده صيام ولا ضمنه الواحد يكون قافل ليهو بسفه زي البلاطه؟؟؟؟
غايتوا الله يصبر الناس البتصوم مع جنس الشفقانين ديل الواحد يتراجف جمبك تقول فاحصين ليهو ملاريا…!!
شخصبا وبلا فخر العبد لله صوام (جعلي صوم عديل) يعني يومين مقرونات عادي نطبقم بس بي شرط مايلم فينا واحد من جنس ديل يوشي لي معدتك يليط الدي وينشف ريقك .
لكن بصراحه ياجماعه ماملاحظين للعيادات الايام دي ؟الله يدي العافيه ..زحمه عجيبه زي معهد المرور لتعليم قباده السيارات الناس كلها عاوزه تطلع رخص عشان تفطر((تروحوا من ربنا فين!!؟؟)
لكن اكتر حاجه مشفقه الجماعه السخانه الحاصله دي ماشاء الله درجه الحراره زي صفحه الفيس البعملوا فيها لايك تواتر عجيب 45-54-55- وانت ماشي بورصه بس……..!..!.
غايتو ماعارف لكن السوق العربي سخانه ماطبيعيه دكان مكوجي بس قشه كبريته وتولع..
عربي شنو !! الناس زاتها في العربي بقت زي بناطلين الجينز اتغسلت واتكوت بقت لاشغاله بي سخانه لاحاجه اي عوامل طبيعيه ماعدا دفارالمحليه بستحملوهو..
لكن برضو حقيقه قلوبنا مع الحناكيش البضلوا الطريق لمثل دي كمينه زي ميدان جاكسون وماشابه..
عارفين قبل يومين ماشين وسط الخرطوم زحمه مبالغه بوليغ..يعني ترفع منديلك عشان تمسح عرقك تلقي جبهه زول تاني …….وعلي مااظن درجه الحراره كانت 60 درجه (فمافوقن هايت)) ..وسط المآسي دي زميل فضولي جدا معانا نبهنا لمجموعه من الشباب ..حناكيش من الجنسين ..! او من جنس واحد((بقوا زاتو مايتفرزوا))..المهم الجماعه علي وشك انها تنهار ((الناس بتسيح ياجدعان))تصدقوا الا لحقوهم بكم صباع آيسكريم
اها عاد ياجرسجيه في جنس السخانه دي يلم فيكم رمضان الا تلعبوا دسوسيه….الله يعينكم……………!!!
الكاتب الساخر : لؤي شرفي
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة