مقالات متنوعة
الذين شطفوا النملة ….
وأنا هنا أقصد الشياطين الحقيقية ، تلك التي خلقت من نار وتوسوس في صدور العباد ، وليس المعنى مجازي لو خطر هذا على بالكم ، فهم أيضا يجتمعون في البرلمان ….
في تلك الليلة إجتمع الشيطان (ساطور) مع رفاقه … ساطور هذا لمن لا يعرفه ، هو الذي كلفه البوص الكبير ( وكلكم تعرفون البوص الكبير طبعا ) بمهمة الإشراف على شياطين هذه البلاد ، وهو شيطان قديم وخبير وتخصصه هو العنف والحروب ، ويقال والله أعلم إنه أول من وسوس لحداد ليصنع ساطورا … البرلمان كان خاليا في تلك الساعة ولا أحد من البشر كان بأمكانه تخيل ما يجري بداخله … مئات من الشياطين الذين هم ممثلين لعدة دوائر مختلفة نيابة عن ملايين الشياطيين الأخرى الموزعين على مساحة المليون ميل سابقا … قبل أن تبتدئ الجلسة ، وقبل أن يفتح ساطور فمه ، قام شيطان معارض وصاح :
– أنا أعترض
نظر له ساطور بدهشة وتساؤل :
– خير يا أخ ؟ نحن ما قلنا حاجة لسه
قال الشيطان :
– ناس البلد دي إنقسمو لنصين صح ؟ طيب ليه نحن رفضنا لأخوانا الفي النص التاني يجو يحضرو الإجتماع ده معانا ؟ نحن إنقسمنا برضو ؟
قال له ساطور بصبر نافد :
– الكلام ده قولو للبوص الكبير ، هو قال خليهم هناك عشان يعملو بعثة خاصة للدولة الجديدة
– والبوص الكبير ده وين ؟ ليه ما بيعبرنا ؟ وخاتينا في آخر إهتماماتو
قال له ساطور وقد بدأ يغضب وتتصاعد النيران من عينيه :
– ألزم أدبك يا زول
– أنا ما زول أنا شيطان
– ولو … البوص الكبير حاليا مشغول في سوريا ، أنا قلت ليه خليني أمشي هناك رفض … أجلس وخلينا نبدأ الجلسة
وبدأت الجلسة ….
كلام ممل لا داعي لسرده عن صعوبات الحياة الآن ، وكيف أن الرواتب لا تكفي لمعيشة الشياطين ، وأن الدائرة الضيقة المتنفذة حول ساطور هي التي ترفل في النعيم وتحظى بكافة الإمتيازات ألخ ألخ .. وكما ترون حتى الشياطين تعانى من هذا الداء …. وفي النهاية قام شيطان معارض وصرح :
– للأسف يا سادة نحن أنتهينا خلاص والبشر بقو ما فاضين لينا ، تصدق أنا لي قرابة السنة بتعلم من البرلماني الانا موكل إني أوسوس ليه وأعلمو
قال له ساطور :
– لأنك حمار … لو طورت تقنيات الوسوسة بتاعتك ، وأتبعت أحدث الطرق العالمية زي ما أنا بعمل كنت نجحت
قال له الشيطان العارض ساخرا :
– وريتنا الشطف النملة منو
نظر له ساطور وقال :
– أيه الأساليب السوقية دي؟
– سعادتك ده تشبيه بشري جديد كناية عن الحاجة الجديدة الماسبقك ليها زول
– ههههههههههههه يعني هم فاكرين إنو تشطيف النملة صعب ؟
وأشار لشيطان المخابرات الذي يرافقه ، فأسرع هذا وأحضر نملة صغيرة ووضعها أمام ساطور … رفع ساطور يديه وأشار للنملة فكبر حجمها حتى صارت بحجم حمار ، فقال ساطور:
– جيب لي طشت
وبمنتهى الإستفزاز نظر للمعارض وشرع يشطف أرجل النملة حتى أنتهى وسط ذهول الشياطين ، وحين فرغ قال :
– ها .. عايزني أسرح للبعوضة كمان ؟ يلا الجلسة أنتهت وخلو النملة دي هنا للبشر عشان يفهمو حاجة
وأنصرفت الشياطين….
وفي الصباح جاء شيا… أحم ، أعضاء البرلمان ليجدو النملة العملاقة في وسط قاعتهم … تصايحوا من الدهشة ، ولكن رئيس البرلمان هلل وكبر وقال بأعلى صوته في المايكروفون :
– دي معجزة يا سادة … أمس أنا بعد صليت العشاء إستخرت ربنا في موضوع ضريبة الموية الجديدة ، وضريبة نفخ لساتك العربات ورفع الدعم عن الهواء الطلق ، ودي ياها البشارة … نحن لازم نمشي القانون ده .. الله أكبر
– الله أكبررررررررر
وفي الأيام التالية تحولت النملة لأشهر مخلوق في البلاد … ألبسوها فانلة بيضاء مرسوم عليها شجرة خضراء وطافوا بها المدن والقرى وجمعوا الأتباع والأموال وفرضوا الضرائب ورفعوا الدعم …. كل هذا وساطور ينظر بغيظ من مكانه الذي لا يراه منه الناس ، وعندما أشتد به الغيظ سأل مساعده :
– عايز أتصل بالبوص الكبير … عامل خدمة ؟
ناوله الشيطان هاتفه فأتصل بالبوص قائلا :
– سيادتك ، أنا أطالب بنقلي من البلد دي
رد عليه البوص بوقار :
– إستحمل يأأبني إستحمل .. أنا ساعدتهم وجبتهم للحكم وبنو القصور والفلل وبعد ده كلو كتبو عليها ( هذا من فضل ربي ) .. إستحمل
– سيادتك أنا شطفت ليهم النملة عديل كده
– أها هم عملو شنو ؟
أجابه ساطور وهو يكاد يبكي من القهر :
– ديل أدوها رقم وطني عدييييل
الكاتب الساخر : د.حامد موسى بشير
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة