«ما يطلبه المستمعون» ..
أغنية يطلبها الاتحاديون:
كان بدري عليك تودعني وأنا مشتاق ليك
أغنية يطلبها «الأمة»:
يا راجياني إنتي مصيرك تستنينى
أغنيه يطلبها «المؤتمر الشعبى» :
أنا الأغروني بالجنة.. وجعلت غرامهم سنة
أغنية يطلبها «الشيوعي»:
تلقاني بين الناس هنا وأنا في حقيقتي هناك وحيد
أغنية يطلبها «المؤتمر الوطني» :
أودع أودع .. أودع كيف.. أفارق أفارق.. أفارق كيف
أودعكم .. أفارقكم لالا ما بقدر
أغنية يطلبها صلاح عووضة:
كلام الناس كلو قلتوه .. بس كلامي أنا الماعرفتوه
أغنية يطلبها عثمان ميرغني:
أدل الناس على الجنة وجنات عمري ناسيها
أغنية يطلبها الطيّب مصطفى:
براي سويتا في نفسي قلبي الحب ما واعي
أغنية يطلبها مأمون حميدة:
بي عيونك تقول لي تعال وتعال .. بي قليبك تقول لي لا ما في مجال
أغنية يطلبها السموأل خلف الله:
رجعت وجيت في بعدك لقيت كل الأرض منفى
أغنية يطلبها عوض محمد عوض «بتاع جريدة الجريدة»:
كل ما سألت عليك صدوني حراسك
أغنية يطلبها مزمل أبوالقاسم:
يا حاسدين غرامنا شوفو غيري وغير حبيبي
أغنية مفضلة هذه الأيام:
والخوف يا غالي.. تسرح طوالي..
أغنية غير مفضلة هذه الأيام:
عذبني وتفنن في ألوان عذابي
أغنية بعيدة:
إن بقت طابت وجات عديل تمشي زي ما كانت قبيل
أغنية قد تصلح للبث وقد لا تصلح:
أعاين فيهو وأضحك وأمشى واجيهو راجع..
أغنية لئيمة:
والله مسكينة المحبة تمشي لي ناس ما بتقدر..
أغنية غائبة:
لا شوفتن تبل الشوق ولا رداً يطمن
أريتك تبقى طيب إنت.. أنا البي كلو هين
أغنية لا داعي لها:
بسحروك يا السمحة لو شافوا الخدود … ولا شافوا الأعين المكحولة سود
أغنية مفقودة:
تمد الإيد ونتسالم
كأنك ما نسيتني زمان.. ولا الزول القبيل خاصم
أغنية حزينة:
لقيتو واقف منتظر
أغنية هرمة:
رأس مالي دمعي ونوحي سويت بهم دكان
قول لي إيه رأسمالك علشان نكون شركان
أغنية مبتسمة:
مشاكلي بسيطة بالريدة بتُحل
أغنية مطلوبة بشدة:
ياخي فاوضني بلا زعل
أغنية عربية:
شيل ده من ده.. يرتاح ده عن ده
أغنية أفريقية:
نضحك حتى لا نسترسل في البكاء
أغنية سياسية:
عشان بمشى وبجينا .. الناس تهموه بينا
أغنية منقرضة:
النار ولعت بي كفي بطفيها
أغنية مدهشة:
أحبك يا حبيبي.. عشان إنت حبيبي.. لأنك إنت إنت.. إنت حبيبي.. يا نصيبي أنا بهواك..
أغنية متسيبة:
تعال بكرة.. أو بعد بكرة.. بس ما تنسى ميعادي
أغنية محبطة:
اليوم البمر وين نلقاهو تاني
أغنية مبشرة:
بكرة يا قلبي الحزين تلقى السعادة
أغنية الختام:
مشي أمرك يا قدر.. إنت أحكامك مطاعة
الصباح..رباح – آخر لحظة
[EMAIL]akhirlahzasd@yahoo.com[/EMAIL]
