زاهر بخيت الفكي

بالثابتة جابونى القِسِم..!!


دنقرت راس الكُل معاى..
كل العشيرة ظلمتها..
عماتى والخالات..
أعمامى والخال قالوا رأى..
بلحيل سديد..
عارف وليدك كان وحيد..
تِربايتو فى وسط البنات..
قالوا الوليد..
ما زال صغير..
معقولة كيف أسكن براى..
فى شقة مدفوعة الإيجار..
فيها كُل المُغريات..
قال للأهل..
داير وليدى يكون سعيد..
دفع المقدم أبوى وفات..
فتح الحساب مليان رصيد..
قايل وليدو أظن رشيد..
ندمان أبويا ندم شديد..
شاف الفشل ..
شاف الضياع..
كل البناهو إتهد ضاع..
يا ريتو قال الليلة مات..
جابنى شان أكبر وازيد..
أنهل من العلم المزيد..
أطلع مهندس أو طبيب..
أو حتى ليهوا أكون مُعيد..
خيبت ظنك يا أبوى..
غشانى إبليس اللعين..
باريت رفاق الأمسيات..
كل همهُم يا بويا هُم..
نعيشا لحظات من وهم..
فعلت كل المُنكرات..
المُوبقات..
أصناف كتيرة مُخدرات..
كل الكحول المُسكرات..
كمان بنات..
بالثابتة جابونى القِسِم..
نادونى بى كامل الإسِم..
دنقرت راس الكُل معاى..