الفينا يا والينا..قسم بالله مُكفينا..!!

كُل الفينا يا ريس..
خلاص كِملت ..
نشوف والعين بصيرة..
نلقى اليد قصيرة..
وما قادرين..
نحن بقينا..يا والينا..جد خايفين..
فى باب الخريف واقفين..
تصُب بُكرة..يجينا السيل..
يدمر لبيوتنا عديل..
معاهوا متاعنا عُنوة يشيل..
نشوف الويل وسهر الليل..
إنت تجينا..راكب الهيل..
نتلقاكا بالتهليل..
توعدنا وتفوت والينا..
خلاص لا قدرة لا حيلة..
والفينا..
قسم بالله مُكفينا..
واقعة الحيطة..والمطبخ..
جوة الحوش رويكيبة ..مُحال من مطرة تحمينا..
تملاً الموية كل ساحاتنا..والطُرقات..
زقاقات الفريق الضيقة ديك..
جوة بيوتنا بتجينا..
ما لقت الدريب مفتوح..
شان تمشيبوا لى برة..
زمااااان..إتسدت مجارينا..
اتردم القبيل مفتوح.
والحال الصِبِح مفضوح..
كل الدنيا عارفانا..
من أول مطيرة تصُب..
وبرقاً فى سمانا يلوح..
تقيف طيارة فيها إغاثة لينا تكُب..
ريحة الفيها.. يا ريس..
فى أسواقنا..بكرة تفوح..
أكيد حا تفوح..
خريفنا الفات..يا والينا..
قلت كلام وفيهوا وعود..تبنى سدود..
برضوا كبارى..فيها مجارى..
للسيل البجيكم جارى..
بيها يمر..
وما نسينا..وكيف ننسى..
جيتنا وقلت نتحمل نعديها خنِق..
عديناها يا ريس..
متاعنا البرة كلوا حِرِق..
والداخرنوا للزمن الصعيب..
تحت الموية برضوا غرق..
خريفنا وصل..عملتو شنو..؟
جيهة القبلة شفنا برق..
صعبة علينا يا ريس..
نتم التانية برضو خنق..