الوطن كل يوم بضيق..!!

نحن جينا..
جينا شايلين…
هم وطن واسع عريق..
ضاق علينا..
فيهوا فارقنا الرفيق..
وانزوينا..
فى ركن قاصى وبعيد..
بلا صديق..
تُهنا ضلينا الطريق..
وما اهتدينا..
هيا نبحث عن هوية..
بيها تتحل القضية..
القضية بقت عصية..
الوطن كل يوم بضيق..
أشركونا..
فى حوار صادق عميق..
ما برانا..
الجميع لابد معانا..
نترك الإحن القواسى..
المصائب والمآسى..
لى بعضنا نعود نواسى..
هيا نتحاور حقيقة..
شان وطن خارت قواهوا..
فات جنوبوا الغالى منوا..
شال أراضيهوا ومياهوا..
شال شباب ناضر جميل..
فيهوا كم سالت دماهوا..
شوفوا دارفور العريقة..
لا (جنينة) ..ولا حديقة..
دمروها..
صارت أكوام من تراب..
أشعلوها..
ما انطفت ..فيها الحريقة..
والحقيقة..
كل وطنا صبح يباب..
هيا نبحث عن طريقة..
بيها يكتمل الحوار..
نوقف الحرب اللعينة..
نحترم حق الجوار..
نشرك الكل فى حوارنا..
كل شبابنا..
نسمع الناس الكُبار..
والصغار..يلقوهوا بكرة..
وطن رائع جميل..
لا نزاع بيناتنا تانى..ولا دمار..
بلا أقنعة..