رسالة خاصة لأي زول عامل فيها عنتر لكن هو ما عنتر!

شوف ياخي لما ربنا يفتحها عليك ويوفقك وتسافر من البلد دي وتغترب ما تعديها نوم وتنظير وفلسفة وتكون عالة على اصحابك او معارفك او اقاربك وتقعد في الشقة لا شغل لا مشغلة ! واي شغلة اصحابك يجيبوها ليك تقول ليهم والله دي ما بتنفع معاي..انا فلان ود فلان خريج الجامعة الفلانية معقول اشتغل سواق دفار ب3000 ريال؟! معقول اشتغل محاسب ب2500 ريال ؟ معقول اشتغل مترجم ب4000 ريال بس؟ الاربعة الف دي بتعمل لي شنو؟!! والله اخير اقعد ساااي كدا وما اشتغل لي شغلة زي دي ؟ معقول اشتغل في مكتب شحن وتفريغ وعفش وكلام فارغ ! وبي كم ؟ ب3500 ريال ؟ ليييه وعشان شنو؟ اكون زي عامل اليومية يوميتو ب100 ريال؟!! احسن القعاد ساااي من شغلانة زي دي !

والغريبة بعدما الواحد اصحابو او معارفه يفتشوا ليهو الشغل هو قاعد في البيت اكل ومرعى وقلة صنعة ..ومقضيها الليل كلو فسبكة ساااي ..و اول ما النت يقطع يقبل على التلفزيون من قناة لقناة لحدي صلاة الصبح!!! والتلفزيون صوتو عالي ، والنور مولع وباقي الشباب العذابة المعاهو من الساعة 11م اتعشوا وناموا لانهم بصحوا بدري الساعة 6ص عشان يشوفوا اشغالهم وانت قاعد يادوب بتفكر تنوم وتتخمد !

ياخ كونك ما تلقى ليك شغلانية تناسب مؤهلاتك وتعجبك دا شئ بيخصك لكن ما من حقك تقلق بالناس دي وتزعجها بصوت التلفزيون او بالنور الشغال لحدي الصباح..خلي عندك ذوق في ناس ما بتعرف تنوم والنور مولع..وفي ناس تعبانة ومرهقة وما بتقدر تنوم والتلفزيون شغال ! الناس صبرت عليك كتير وما قادرين يتكلموا معاك عشان ما تزعل وتتحسس وتفتكر هم اتضايقوا منك لانك قاعد عاطل وبتاكل وتشرب وتلبس وتسكن على حسابهم !

ثم ثانياً ياخ الشغل ما عيب..ياخ اشتغل اي حاجة ولو مؤقتا وطلع مصاريف! مش كفاية بتاع البقالة الكرهتو حياتو وتشيل وتتشتري بالدين ولي يوم الليلة ليك شهور ما دفعت ليهو حقو؟!! ياخ بالغت والله . وبطريقتك دي حتقعد في الغربة دي عشرين سنة وانت فاشل ! المشكلة قعادك لو ما مضر نقول ما فيها حاجة لكن ما تنسى انت عليك واجبات والتزامات .. والالتزامات دي كلها بقروش.. تجديد الاقامة بي قروش؟ تجديد الجواز بقروش..تغيير المهنة بي قروش..وعشان تجدد او تحدث بياناتك..لما تمشي السفارة حتدفع..ايوا حتدفع زكاة وضرائب ومساهمة وطنية ورسوم ووووو! طيب من وين حتدفع وانت قاعد عاطل!

ياخ اهلك ذاتو جننونا بكترة الاتصالات..وكل مرة امك تضرب وتسالنا منك عملت شنو ؟ وعليكم الله ساعدوه..وعليكم الله اقيفوا معاهو باقي هو اشتر وومطرطش ساي وما عندو اي خبرة ومدلع والبلد هنا الحالة صعبة والمصاريف كتيرة !! كلموهو يا اولادي عليكم الله ..
—–

الكلام الفوق دا جزء من رسالة طويلة طلب احد اصدقائي ان انشرها لمناقشة ظاهرة الشباب المغتربين الجدد الذين يسافرون لدول الخليج والواحد فيهم بيقعد لفترة طويلة عاطل بدون شغل ..ومش كدا وبس وكمان بكون مزعج وضيف ثقيل على الناس القاعد معاهم ولا يحترمهم ولا يقدر تعبهم وارهاقهم ..واناني جدا وما بفكر الا في راحتو وبس..

صحيح في نوعية زي دي من الشباب الما عندهم خبرة في الحياة ولا عندهم قدرة على اتخاذ قرارات حاسمة في ما يتعلق بالعمل والمستقبل وينتظرون لفترات طويلة في انتظار وظيفة معينة ولو ما لقوها او ما لقوا عمل بمرتب بمواصفات معينة ما بشتغلوا وبقعدوا عواطلية ..ويا ريت لو عطالتهم دي على حسابهم ! للاسف على حساب اهلهم وعلى حساب اصحابهم وقاربهم..وفوق هذا وذاك على حساب زمنك في الاغتراب ..وهو في الحقيقة ليس اغتراب وانما عطالة دولية وازعاج عام وخاص للمعارف والاصحاب .

بقلم
تهاني عوض