رجل المرور المفروض يكتب لي مخالفة الكترونية بمبلغ ٥٠ جنيه، بعطيه ١٠جنيه فيتركني.. اليك الحل الناجع يا وزير المالية

السيد وزير المالية
بما انك أحكمت القبضة علي سارقي مال الشعب
بالتحصيل الالكتروني
وسارقي الدعم علي السلع
فإليك ببعض الثغرات
حتي ينعم هذا البلد ومواطنه بخير
اولا
انت عملت تحصيل إلكتروني لكل شي وهذا هو المطلوب وكبد الحقيقة ولكن
مثلا
١/رجل المرور المفروض يكتب لي مخالفة الكترونيا بي ٥٠ جنيه
بديهو ١٠جنيه في جيبوا بيخليني امشي
كده لا الدولة اتحصلت ولا انا استفدت صراحة لان العشرة جنيه مشت ليه شخصيا وده بيخلي الدولة تقصر معاي في بعض الخدمات
طيب الحل
انو جميع عربات المرور والتقاطعات تزود بي كاميرات مراقبة تكون في غرفة تحكم لا علم لي رجال المرور والمتحصلين بمكان وأفراد اداراتها
ثانيا رفع رواتب المتحصلين حتي يكون لهم نصيب من هذا الجمع ومرتبهم يكفيهم حتي لا تكون هناك حوجه للرشوة
ثالثا
ابتعاث لجان وأفراد مراقبة متخفيين بي ألات تصوير خفية وانتحال شخصية مواطن عادي ومحاولة رشوة او بالدارجي كده تحنيك المتحصل لمعرفة درجة امانته وعرض هذه الفيديوهات علي جميع المتحصلين وفصل المخالفين للقانون بل سجنهم لخيانة الأمانة
رابعا
تزويد جميع نقاط التحصيل بنظام الدفع الالكتروني يعني ممكن بي بطاقة البنك ادفع المخالفة المرورية او رسوم العبور او اي رسوم حكومية
خامسا والاهم
محاكمة كل من ثبت انه خالف اي نظام تحصيل او خان امانه في السنوات الماضية ونقل محاكمته في الصحف حتي يكون عظة لمن يفكر في اكل أموال هذا الشعب
٢/ البنوك
وقف جميع انواع الرهن العقاري
جعل مكتب فيدرالي لتحصيل نقاط العملاء
وربط جميع المعاملات المصرفية مربوطه بهذا النظام
او ما يسمي بالكرديت ريكورد او بيرو
علي ان تتم جميع القروض حتي الشخصية منها بنظام هذه النقاط وحسب التزام العميل بالدفعيات
وإجبار البنوك برفع التقارير عن دفعيات العملاء وحركات حسابهم كل ٣ شهور
اجبار البنوك علي تكون شريك في التنميه وليس تاجر في السوق كما هو الحال الان بالنسبة للبنوك في السودان

٣/ مخالفات ركن السيارات ( الباركينق)
٩٠٪ من زحمة الطرق في الخرطوم او السودان بصورة عامه سببه انو العربات دي موقفه غلط
في بعض الدول ومنها تركيا في استانبول شاهدت ساحبات تابعة للبلدية بترفع السيارة المخالفة في دقيقة او اقل ولا تحتاج لي مساحة حتي تسحب السيارة وكأنها فورت كليف بالجنبة وفي ثواني بتكون شالت العربية
المهم تقوم تخصص ٤٠ فدان في أطراف العاصمة وتعمل فيها حوش كبير وتشتري ١٠ سحاب من النوع البيرفع في ثواني ده
ويحوموا في الشوارع ان شاء الله قدام بيتك موقف غلط يرفعوا سيارتك الي الحوش
تمشي تدفع ٥٠٠ج تستلم سيارتك
كده بتدخل ملايين لي خزينة الدولة
بس لا تنسي انو السحابات تكون مزودة بي كاميرا وكذلك الحوش وأماكن صف السيارات داخله حتي لا تتم سرقة ممتلكات اصحاب هذه السيارات اثناء نقلها او تخزينها

بقلم: نعمان حسين