شركات الاتصالات أوقفوا عبث المحتالين
اتصلت على واحده قريبتنا قبيل وأنا في المكتب وقالت لي هاك الرقم ده حول فيهو مبلغ من المال والمبلغ كان كبير جدا فسألتها ده منو صاحب الرقم ده قالت لي ديل ناس MTN قالو اني فزتا بجائزة ولازم احول ليهم القروش دي اول ، طبعا انا صراحه كنتا بسمع بالحنك ده لكن ابدا ماقايلو حقيقي ، فسألتها هما اصلا عايزين يدوك قروش هدية حايقولوا ليك كيف رسلي قروش ، قالت لي والله ماعارفه هما قالو كده
المهم بعداك فهمتها انو ده نوع من الاحتيال وماترسلي ليهم إي قروش
لما رجعتا البيت ونحنا بنتغدا عرفتا من ناس البيت انو الموضوع ده منتشر جدا وبيعرفوا ناس بالأسماء حصلت ليهم القصه دي وراحت عليهم تحويشة العمر
واحد قروش اولادو بتاعت الدراسه شالها رسلها ليهم
وواحده استلفت 5 الف جنية من جارتها وراحت عليها
وقصص كتيره سمعتها بنفس السيناريو
انا اصلا مابلوم اهلنا الطيبين لانو والله الحاله العليهم تخليهم يخشو جحر العقرب لو فيهو قروش
الشركات الارباحها طالعه من البسطاء ديل ياخ ماحاسين انو عندكم مسئولية تجاه الموضوع ده ، ولو ماسمعتو بيهو بتكون دي مشكله كبيره
ميزانية إعلان تجاري واحد كفيله بتصميم حملة لمجابهه المحتالين ديل
الخرطوم: أمجد البصيري
