الكلمة الشاذة
أستخرج الكلمة الشاذة مما يأتي :
1 – مطار الخرطوم – كبري المك نمر- ميناء بورتسودان – ميناء سواكن
2- النشل – التزوير – الهجرة غير الشرعية – الخلوة غير الشرعية
3- خروف السماية – المدينة الرياضية – قماش البنطلون – المنديل
4- الأساس – الثانوي- المعهد – الجامعة
5- جواز السفر – الجنسية – البطاقة الشخصية – رخصة القيادة
6- التمباك – البنقو – الهيروين – الدواء
7- مقابرباصات الوالي – مقابر أحمد شرفي – مقابرفاروق – مقابر البكري
8- الحج – الزكاة – العمرة– الصلاة
9- الموظف – لاعب الكرة – المسؤول – المطرب
10- الصحيفة – الكاتب – لاعب الكرة – الزمن
11- الطيب ود ضحوية – طه الضرير – بتاع الضرائب – الطيب صالح
12- السوق المركزي – سوق المواسير – سوق سعد قشرة – سوق عفراء
13- الحرير – التترون – السكروتة – الصوف
14- تلاجة العامل – تلاجة الموظف- تلاجة المزارع – تلاجة المسؤول
15- الكوع – الركبة – عضم الشيطان – الإبهام
16- الحرب العالمية الأولى – حرب أكتوبر – شارع مدني – حرب البسوس
17- الصلصة – الطحنية – الشيبس – الوزير
18- السلطة التشريعية – السلطة التنفيذية – السلطة القضائية – المواطن
19- اللخمة – الزحمة – الهجمة – اللحمة
20- المواتر – اللاندكروزر- البرادو – الدراجة الهوائية
21- الملاريا – الطلقة – تصريحات المسئولين – اللغم
22- الذبابة – الأميباء – كريات الدم – الرغيفة
23- بيت العرس – بيت الشعر – بيت الأدب – بيت البكا
24- قاعة المحكمة – قاعة البرلمان – قاعة السينما – قاعة الدراسة
25- الفيل – وحيد القرن – الخروف – المسئول
الإجابات :
1- ميناء سواكن لأنو المكان الوحيد فيهم الذي لم تقبض فيه مخدرات
2- الخلوة غير الشرعية فهي الوحيده فيهم التي لم يجرمها القانون (ذي ما قالو) !
3- المنديل لنه الوحيد الذي لا يمكن تقسيمه وتجزئته فيهم
4- الأساس لأنه لا يوجد فيه تعاطي للمخدرات
5- رخصة القيادة : فهي الوحيده عليها غرامة أذا لم تكن سارية المفعول
6- الدواء فهو الوحيد فيهم البكتل طوالي (إنعدام صلاحية وكده)
7- مقابر باصات الوالي – أحمد شرفي – فاروق – الجمرية
8- الصلاة فهي الشعيرة الوحيدة التي لم يطالها الفساد
9- الموظف : كووولهم بيسافروا إلا هو (يا عيني !)
10- الزمن فهو لا يمكن إيقافه
11- كوولهم همباته إلا الطيب صالح
12- سوق عفراء لأنو الوحيد بيناتهم الما فيهو ريحة مقرفة !
13- الصوف : فهو الوحيد الذي لا يرتديه مشائخ الصوفية
14- تلاجة المسؤول : عشان بيكون عندها (أخت) غالباً ديب فريزر وكده !
15- الأبهام (الباقين ما ممكن تلحسهم)
16- حرب البسوس : (أقلاهم قتلى) .. ولسه ياما عدد ضحايا الطريق يزيد!
17- الوزير : كووولهم عندهم إنتهاء صلاحية إلا هو (الموت بس) !
18- المواطن : (عشان التلاته الباقين ديل هم حاجة واحدة وكدة)
19- اللحمة : لأنو الزول ممكن يكون مزحوم وملخوم أو مهجوم لكن ما ممكن يكون ملحوم
20- الدراجة الهوائية : لأنها الوحيدة التي لا تظهر في مواكب المسؤولين
21- الملاريا : عشان الزول ممكن يطلع منها وكده !
22- الذبابة : لأنها الوحيدة بينهم التي يمكن رؤيتها بالعين المجردة
23- بيت البكاء : لأنو الوحيد الذي تتم فيه مناقشة الكورة والسياسة والوضع الراهن
24- قاعة البرلمان : عشان الوحيدة التي يحلو فيها النوم
25- الخروف : الأنو جلدو ما تخين كما البقية
كسرة :
السؤال : إستخرج الكلمة الشاذة من هذه الكلمات :
مصر – ليبيا – السودان – تونس
الإجابة : السودان عشان هو البلد الوحيد فى البلدان دى المطبق الشريعة .. (عارفكم إخترتو ياتو إجابة يا وحشين)
كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)+و+و
