رفع الدعم عن الكربون

في أكتوبر من العام المنصرم 2015 كتب العبدلله مقالاً بعنوان (رسوم كربون) بعد أن أطلعه أحد المواطنين على إيصال 15 أليكتروني يوضح تفصيليا الرسوم الخاصة بترخيص عربته ، وقد سألني المواطن حينها وهو يمسك بالإيصال: يا أستاذ (الكربون) ده شنو الأي زول بيرخص عربيتو بيدفعوهو 30 ألف (رسوم عشانو؟) فأخبرته بأنني مثله تماما في غاية الإستغراش وقد قمنا بسؤال الشيخ (قوقل) علنا نطلع بنتيجة عن هذه الرسوم (الكربونية) لكننا لم نعثر على أي أثر لها مما يعني أنها نوع من أنواع الجبايات الإنقاذية !
بالأمس إتصل بي الأخ الصديق (عمر صالح) وهو يضحك في (غضب) ! وهو في قمة الإستغراش :
– يا أستاذ مشيت أرخص عربيتي موديل 2008 تتخيل دفعوني كم؟
– دفعوك كم يا عمر؟
– لو قلتا ليك ما ح تصدق .. دفعوني تلاته مليون وميه خمسة وأربعين جنيه !
– طيب يا عمر كدي رسل ليا التفاصيل وصور الإيصالات
لم يكن طلبي من الأخ عمر بإرسال التفاصيل إلا لمقارنتها مع تفاصيل مقال (رسوم كربون) أعلاه لنري أن قد طرأ أي طارئ في رسوم الترخيص خلال هذه الثلاث أشهر وقد صدق حدسي … فتعالو معي لنقارن :
• قبل 3 أشهر كان ترخيص سنوي ملاكي (كبير) هو 380 ألف والآن ترخيص سنوي ملاكي (صغير) – لاحظ (صغير) هي 405 ألف بزيادة 25 ألف
• قبل 3 أشهر كانت رسوم الطرق 75 ألف والآن رسوم الطرق أصبحت 100 ألف بزيادة 25 ألف
• قبل 3 أشهر كانت ضريبة أرباح الأعمال لملاكي كبير هي 450 ألف والآن ضريبة أرباح الأعمال لملاكي صغير 1800 ألف بزيادة 1350 ألف (يعني الملاكي كبير بقت بي كم؟)
• قبل 3 أشهر كان رسوم تحويل الملكية 100ألف والآن رسوم تحويل الملكية 130 ألف بزيادة 30 ألف
• قبل 3 أشهر كانت رسوم التشجير 5 ألف والآن رسوم التشجير 6 ألف بزيادة 1 ألف
• قبل 3 أشهر كانت رسوم (الكربون) 30 ألف والآن رسوم الكربون 35 ألف بزيادة 5 ألف
وقد قام (أخونا عمر) بدفع كل هذه الرسوم صاغراً بالإضافة إلى هذه الرسوم التي لم تشهد زيادة وهي :
دمغة 41 ألأف
دمغة تنمية 50 ألف (غير الدمغة الساي)
شرطة 03 ألف
دفاع مدني 130 ألف
ضريبة 200 ألف
فحص آلي 130ألف (بدون أي إيصال كان عجبك) !
عزيزي القارئ :
على الرغم من أن (المسؤولين) وهم يجيزون ميزانية 2016 قد أكدو بأنها خالية من الضرائب والرسوم إلا إنو الواقع الفوق ده بيقول عكس كده (بعدين تقولو عليهم كضابين … ما عندهم كلمة … بطريقتكم) !
طيب نجي نشوف بعض الرسوم الزادت دي وأصلها وفصلها :
رسوم الطرق :
هي الطرق ذاااتا وينا؟ الناس دي مش بتبالغ؟ العبدلله يتحدي أي مسؤول يعثر ليهو على شارع مافيهو حفرة؟ بما في ذلك شارع القصر ذات نفسو !
رسوم التشجير :
ما دخل التشجير بالعربات؟ وهل الزول العاوز يطلع (جواز سفر) أو رقم وطني أو أي ترخيص آخر لازم يدفع رسوم تشجير برضو ؟ وإذا كانت الإجابة بالنفي .. ليه رسوم التشجير دي بس (للعربات) ؟ يعني الناس (تقرش) عرباتا تحت الشجر وللا الفهم شنو؟ بعدين هي ذاااتا زادوها ليه؟ قرروا يزيدو الشجر مثلاً ؟ وللا الفهم شنووو وللا الحكاية (لهط وبس) !!
رسوم كربون :
رسوم الكربون زادت يا رجالة !! في ظرف 3 شهور زادت 5 ألف … بالطبع نحنا ما عارفين الكربون (أبو رسوم) ده هو شنوو …. لكن بس ورونا زدتو الرسوم بتاعتو ليه ؟ تكونو رفعتو عنو الدعم !!
كسرة :
السيد وزير المالية : رسوم الفحص الآلي تدفع بدون أي (إيصال ذاتو) .. كيف تتم مراجعتها؟ … حيرتووووونا والله !! … خلى الحبوب يااا ولد !!
كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووو)+(و+و+و+و)+و+(و)+و+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(وووو)+(و+و+و+و)+و+(و)+و+و