جبرا في لندن (3)

في صباح العاشرة (شوكة) كنت أقف أمام الضابط المناوب ، أجلسني وطلب لي كوباً من الشاي ثم قام برفع سماعة الهاتف قائلاً في لهجة آمرة :
– خلو الشاويش حسنين يجيني فوراً (بالإنجليزي طبعن)

لم تمض دقائق قليلة حتي دخل الشاويش حسنين مؤدياً التحية العسكرية لجناب الضابط الذي عرفه على شخصي قائلاً :
– سمعتا بي واوات (خط هيثرو)
– لدهشتي فقد قام الشاويش حسنين بتكملة الجملة (أخبار خط هيثرو شنوووووووو) !
– (الضابط وهو يشير لشخصي الضعيف): هذا هو الأستاذ جبرا … الراعي الرسمي للبحث عن الخط وقد جاء إلى هنا للتقصي عن قرب ومعرفة كيف تمت سرقة هذا الخط ومن هم الذين سرقوهو وكما تعلم شاويش حسنين فإن هذا الخط هو منحة من جلالة الملكة (حقتنا) لذلك يجب أن تساعد الأستاذ جبرا غاية المساعدة الممكنة من أجل إستعادته .
– (وهو يؤدي التحية) : حاااضر يا فندم
وذهبت ومعي الشاويش حسنين إلى غرفة التحري لأخذ أوأقوالي ، وبعد أن قام الشاويش حسنين بكتابة بياناتي الشخصية كمبلغ طلب مني الإدلاء بأقوالي ..
– شوف يا سعادة الشاويش حق الهبوط والإقلاع في مطار هيثرو ده ملك لحكومة السودان يعني ملك للشعب السوداني بالتالي لا يحق لكائن من كان أن يقوم ببيعة أو يتصرف فيهو !
– مستر جبرا هل تعلم إسم الشركة التي قامت بشرائه !
– أفو .. أفو يا خواجه طبعاً أعلم …
– ما إسمها إذن
– قبل ما أقول ليك إسم الشركة الباعو ليها الخط خليني يا حضرة الشاويش أشرح ليك هو خط هيثرو ده ذاااتو شنو .. وشنو الحاجة الإتباعت
– إتفضل مستر جبرا
– طيب أول حاجة نحنا ما بنتكلم عن المسار يعني (خط هيثرو- الخرطوم) ..لا لا الحاجة الإتسرقت دي هي حق طائات سودانير في الهبوط بمطار هيثرو، لأنو عندما زادت كمية خطوط الطيران التى تتعامل مع مطار هيثرو وأصبحت بواقع 4 طائرات في الدقيقه بين هابطه و مقلعه قامت إدارة المطاربتقسيم ال 24 ساعه (ساعات اليوم) علي عدد الطائرات بالثانيه و الدقيقه وقامت بتسمية هذه المسألة Airport Slots، وكان من نصيب ناقلنا الوطني (سودانير) 4 ساعات كل يوم تلاتاء من كل أسبوع هبوط في تمام الساعه 2 و 33 دقيقه للوصول وقيام الساعه 6 و 33 .
– أيوا مستر جبرا .. ده كلام واضح .. طيب مين إشترى حق الهبوط والإقلاع بتاعكم ؟
– حق الهبوط والإقلاع ده يا حضرة الصول تم بيعه لشركة بريطانية إسمها بي ام آي
– وهل لديك معلومات عن هذه الشركة؟
– نعم حضرة الشاويش .. شركة BMI British Midland International دي شركة طيران بريطانية خاصة، يرجع تاريخ إنشائها إلى 16 فبراير 1949 وكانت تسمى في ذلك الوقت شركة ديـربي المحدودة للطيران إلا أنها قد قامت في أكتوبر 1964 بتغيير إسمها إلى شركة الخطوط الجوية البريطانية ميدلاند (وهو الاسم الحالي للشركة)
– وهل تم البيع عن طريق وكيل؟
– نعم عن طريق وكيل حضرة الصول وهو شركة Airport Coordination Limited (ACL)
– جميل مستر جبرا لديك الكثير من المعلومات ولكن هل من ضمن معلوماتك التاريخ الذي قام فيه جماعتكم ببيع الخط
– والله يا حضرة الصول دي صعبة لكن البيعة دي تمت في النصف الأول لسنة 2008 تقريباً
– تمام مستر جبرا .. كده ممكن نحنا نعرف ليك مين باع الخط ده وكم قبض فلوس ومين وقع على عقد البيع !
– كيف يا خواجه .. عندكم (وداعيات) هنا ؟
– (وهو يضحك) : لا يوجد عندنا وداعيات مستر جبرا .. هل لديك أقوال أخرى أم نقوم بقفل المحضر
– لا لا ما عندي أقوال أخرى بس أموت وأعرفك ح تتوصل للحاجة دي كيف؟
– (وهو يقفل المحضر) : سوف تري .. الآن إنتهت مناوبتي .. أراك في مكتبي هنا غداً في العاشرة صباحا ..!!

كسرة :
في حلقة غداً نشوف الخواجة (حسنين) ده عاوز يعمل شنوووووو … أبقوا معنا … الفاتح جبرا .. من داخل مبني القسم الأوسط … شرطة لندن غرب … العاصمة البريطانية)

إنتبه :
يوجد واو جديد !!

كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووووووووووو)+و

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و