الرابطة السوریة في السودان
صباح الجمعة وفي طريقي للفرن اشتري رغيف الفطور ، لقيت مجموعة كبيرة من الشباب السورين لابسين تي شيرتات بيضاء موحدة وانيقة ، لقيتم في شارع المشتل في الرياض – وعادة الشارع بكون خالي من الناس في صباح الجمعة – وكانو في قمة النشاط والحيوية بنظفوا ويزينوا الشارع ووترتوار الزلط بي بوهية والوان جذابة ، ورسومات لعلم السودان في الاعمدة وجايبين معاهم كراكات وعربات لتنظيف اطراف الزلط من الغبار والتراب …
بعد ما قضيت اغراضي رجعت بي نفس الشارع ونزلت سلمت عليهم . وحييتهم علي العمل الجميل القايمين بيهو .. سألتهم عن ماهية الرابطة السورية في السودان ، قالوا هي رابطة تعني بمعالجة مشاكل وهموم السوريين في السودان .. والشغل القايمين بيهو هسة عبارة عن تفاعلهم مع المجتمع السوداني ومحاولة منهم لرد الجميل للسودانيين لحسن الاستقبال والمعاملة الطيبة التي وجدوها في بلدهم الثاني ….
أثناء ما كانو بشرحوا لي مهام الرابطة مر بينا شاب سوداني في قمة الغضب ، والزعل ظاهر في تقاطيع وشو ، كان زعلان من الشغل القايمين بيهو الاخوة السوريين وكان بشتم فيهم وبقول ( ناس منافقين والسياسة كلها نفاق في نفاق .. تتمسكنوا لما تتمكنوا تورونا الوش التاني )… حاولت اسأله عن سبب هجومه عليهم ، لكن ما رد علي ، لأنه من نظرته اعتقد اني شغال معاهم ، واصل سيره وهو يردد نفس الكلام لي باقي الشباب الشغالين … من طريقة كلامه ونظرة السورين ليهو عرفت انهم ما فهموا قصدوا من الكلام …
مهما يكون رأي الشاب الساخط منهم ومن تفاعلهم مع المجتمع ونظرته ليهم بانهم منافقين وكساريين تلج ، الا اني اعجبت من عملهم غاية الاعجاب واتمنيت لو كنت معاهم بدل ما يجي اجنبي ينضف لي بلدي ..
ورأبي ان الشاب اخطأ في حقهم وحاسبهم علي نياتهم …..
ما هو رأيك انت هل هو نفاق ذي ما قال الشاب الساخط ، ام هو تفاعل مع المجتمع ومحاولة لرد الجميل ذي ما قالوا ؟؟
بقلم
سالم الأمين
-
-
-
-
-
-
-
-
