جنون كهربائي (أرشيف)

عندما دخلت عليه كان في حالة هياج شديد .. يرتدي )فنيلة داخلية( فقط وسروال طويل .. تبدو عليه علامات الإرهاق وبعض مظاهر الجنون .. كانت الغرفة شبه مظلمة ودرجة حرارتها كما الفرن (مولعة نار) كان يهذي بعبارات غير مفهومة وما أن شاهدني حتى أمسك بتلابيبي قائلاً :

– معقول بس البيحصل ده؟
– قول بسم الله يا (عوض) في شنو؟
– عامل يعني عرفتني هسه؟
– (وقلبي ينفطر حزناً عليه) : كيف يا (عوض) يعني ما أعرفك؟ كدي انتا حاول روق وأهدأ شوية
– (وهو يشد شعر راسه) : أنا ما (عوض) … أنا ما (عوض) .. أنا طيره ومباري السيرة (ثم ينظر لي في غضب) .. طيرة ومباري شنوووو؟
– (في خوف) : ومباري السيرة
– ما أن أكملت له عبارته حتي أخذ يقوم بحركات راقصة ويعرض كأنه في سيرة حقيقية حيث اخذ (ينقز) ويهز رافعاً يده اليمني لأعلي كمن يمسك بعصاة يرفعها تارة ويخفضها أخري وهو يضرب الأرض برجله بقوة ثم فجأة يتوقف ثم ينظر للأفق ويلتفت محركاً رأسه يمنة ويسرى وكانه يخاطب أحد الحشود المليونية .. هنا قاطعته قائلاً :
– يا (عوض) ياخي الظاهر إنتا متوتر شوية .. أجيب ليك كباية ليمون ؟
– أنا ما عاوز ليمون .. ما عاوز ليمون .. أنا عاوز كهرباء
– لكن يا (عوض) كهرباء يدوك ساااي كده .. ما لازم أول نقابل دكتور نفساني
لم يابه (عوض) لحديثي أذ أنني إعتقدت أنه يقصد الكهرباء البيدوها للعيانين في الراس لمن يعانوا من الإضطرابات العصبية لولا أنه توقف مرة أخري وهو ينظر للأفق و(يكشّف) ويلتفت محركاً رأسه يمنة ويسرى وكانه يخاطب أحد الحشود المليونية ثم يصيح بأعلى صوته:
– ايها الشعب السوداني الفضل .. سوف يكون العام القادم هو آخر أعوام إنقطاع الإمداد الكهربائي وسوف تنعمون بإذن الله بإمداد كهربائي مستقر وتودعون إلى غير رجعة القطوعات المبرمجة وغير المبرمجة .. فالآن الآن أيها الشعب السوداني الفضل قد إكتمل إنشاء أكبر سد في أفريقيا والقارات المجاورة .. (وهو ينظر للجماهير المتوهمة) ويهتف :
– السد السد .. الرد الرد
– السد شنووو؟
– (متوهمأ أن تتم له الجماهير الجمله) .. ثم مواصلاً .. نعم .. كووولكم ح تكتفو من الكهرباء وكمان ح نصدر الفائض للدول المجاورة .. مافيش تاني قطوعات بالمرة ..
ثم اخذ (ينقز) ويهز رافعاً يده اليمني لأعلي كمن يمسك بعصاة يرفعها تارة ويخفضها أخري وهو يضرب الأرض برجله بقوة ثم فجأة يتوقف ثم ينظر للأفق ويلتفت محركاً رأسه يمنة ويسرى ثم فجأة ينخرط في موجة بكاء حار وقد إمتلات الفنيلة الداخلية التي كان يرتديها بالعرق فقام بخلعها ثم (مصرها) وهو يواصل النحيب بصورة جعلتني أخاطبه في شفقة ورثاء :
– ما معقول يا (عوض) البتسويهو في نفسك ده ياخي .. خليني كدي أجيب ليكا موية غسل وشك ده وروق شوية ملعون ياخي ابو الكهرباء على أبو القطوعات ذاااتا
– (في أسي) : بالله انا مش طيرة ومباري السيرة؟ كل سنة وأنا اصدق كلام المسؤولين .. كل سنة يقولو ليا السنة الجاية قطوعات مافي .. والسخانة طلعت عين أبو أهل الخلفونا و كل سنة نحنا في العذاب ده ؟
– معليش يا (عوض) ما تشيل هم الأمور ح تمشي وأي حاجه ح تتصلح والسنة دي ح تكون آخر سنة تكون فيها قطوعات وكمان آخر سنة الخريف يجي فيها (فجأتن) بإذن واحد احد
ما أن سمع (عوض) عبارة (السنة دي آخر سنة) حتى أرغى وأزبد وهاج وماج وأخذ يخاطبني مهدداً رافعاً سبابته متوعداً :
– أوعك تقول كده .. أوعك تقول كده
– ليه يا (عوض) ياااخي؟
– قرفنا من الكلام ده .. الكهرباء دي عايزه كم عشان تتصلح .. عايزه كم ؟ خلاس مرارتنا إنفقعت … إنفقعت … إنفقعت .. ثم بدأ فاصلاً من البكاء والنحيب ..
وهنا دخلت عليا زوجتي في الغرفة وصرخت :
– قطعان الكهرباء ده طلع ليكا في راسك .. شنو مطلع فنيلتك وواقف قدام المرايا .. سجم أمي وكمان بتكلم في روحك؟ ألحق شوف ليكا طريقة رسل مقالك بتاع بكرة ..

كسرة :
غايتو أهو مشينا (نت كافيه) في منطقة (الشهداء) لحقنا ليكم المقال المطبعة !!
كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووووووووووو)+و +(و)

 كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+(و)

كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنوووووووو؟ : (و) ….