قصص طريفة لعلماء سودانيين تثير رواد فيسبوك

طلاب جامعة عاملين رحلة في مزرعة في الدامر ضبحوا خروف ، عمك كدا لابس عراقي وسروال شايل اربيل بيلم بيهو تحت الشجر وينضف وكان بيقيف يعاين ليهم ويبتسم ? وتاني يواصل شغلوا فبقوا يتكلمو عنوا بالإنجليزي شان مايفهم (الزول دا شاف الضبيحة مابيزح تاني ويقعدو يضحكو) وعمك يعاين ليهم ويبتسم ، بعد اللحمة طلعت نادوهو وجا دخل يدو شال كم لقمة وقال ليهم أكلكم طاعم يا اولادي ومشى واصل شغلو ، آخر اليوم جاهم الاستاذ بتاع الجامعة وشاف عمك شغال قال ليهم ياسلام ياخ بالله مش احسن من غناكم دا كان تنادوا البروف دا تتونسو معاهو وتستفيدوا فقالو ليهو انحنا افتكرناهو غفير المزرعة فقال ليهم معقول مابتعرفوا بروف عبدالله الطيب مدير جامعة الخرطوم ، جماعتك اتهجمو ? قال ليهم هو مدينا المزرعة للجامعة لرحلات الطلاب الدرسوا زراعة وبيحب يهتم بي مزرعتو براهو ، جماعتك مشو يعتذروا للبروف القال (أجيد الإنجليزية وبعض من العربية ) عرفوا إنو جا أكل معاهم شان مايحسسم إنو سمع وفهم ودا تواضع وكسر نفس ماعادي من رجل قامة ماعادي شوف ناس( أنا عندي ماستر ديل )?
بروف محمد عبدالله الريح لابس عراقيهو وبيغسل في عربيتو قدام البيت بالخرطوش جاواحد زيارة لي دكتور جارو في الحي فقال ليهو بالله بعد تنتهي من العربية دي غسل لي عربيتي ، بكل تواضع قال ليهو جدا واداهو مفتاح عربيتو ، بعد طلع مع جارو لقو البروف بيغسل في العربية فجارو اتهجم وجرى مسك الخرطوش واعتذر للبروف ، اها دكتور الريح قال ليهو مافي مشكلة دي خدمة بسيطة والموية راااقده وقعد يضحك? اها سيد العربية دخل في ضفورو ??

عميد اسكول جامعة الخرطوم جا ماري في النشاط لقى الشباب بياكلو ويتونسو والبيلعبو بلياردو والبشربو في الشاي ، الاكياس وعلب البارد والموية مجدعه المنظر غاظوا فحبا يديهم درس لقى كيس مجدوع شالو وختا شنطتو ودنقر في الاكياس وعلب البارد يلقط ويخت جوه الكيس في طالبين اتهجموا ? لا يابروف خليك نحنا بنلمها ، ولا اشتغل بيهم قال ليهم وهو مواصل (لا لا امشوا اتونسوا ) دقيقتين كان اي زول في حوش الكلية خلى البيعمل فيهو ودور نضافة ومعاهم البروف لمن عرق ، بعد انتهوا عاينوا كلهم للشكل النهائي بعد النضافة ، لقوا الكلية في غاية الجمال بس كانت مدفونة بالنفايات ،خاطبن بي كلمتين ،( شكرا ليكم عشان بقيتوا بيتكم نضيف ، العمال بينضفو الصباح وبمشو عليكم تحافظوا على النضافة باقي اليوم ومافي زول يجدع حاجة في الواطة لانو الباسكت موجودة) ? ، الطلبة صفقوا للعميد ??بي حب شديد لانو درس مجاني في الحياة ولانو متواضع ، ? .
بروف عبدالرحمن عبدالقيوم عالم فيزيائي عايش من 40 سنة في أمريكا متعاون في وكالة ناسا للفضاء أضخم جهة علمية في العالم لمن يجي إجازة البلد بيحلب البقرة ويحش القش ويقعد يتونس مع الناس في قيزان الرملة وياكل الكسرة والقراصة ، دا تواضع العلماء ?
اي زول تلقاهو منفوخ ومكشر كدا دا (عندو نقص) لانو الفطرة الطبيعية للانسان انو مبتسم اجتماعي وانساني
ياخ في نوع كدا تلقاهو مشى الخليج قعد 6 شهور يرجع لاوي لسانو وبقى يشنف كل حاجة في بلدو التقول كان مولود هناك وديل مالن مثلا ؟!

(متداول على فيسبوك)