بس أختشي ..!!

من فوق تعاين للخلوق..
عاجباك وظيفتك مُنتشي..
فيها قاعد ليك سنين..
غير الفشل ما شُفنا شي..
عاجبك الكُرسي الوثير..
والناس تناديك يا وزير..
إنت الكبير ..وكلام كتير..
من الفرح عايز تطير..
ما عرفت كيفن المشي..
في الواطة زي الجيت جديد..
أذكُر الماضي القريب..
خلينا نسأل كُنت وين..؟
قبال تجيك الثورة ..تنقِذ والمعاك..
لمن جنوبنا الغالي داك..
كان حقنا..
دارفورنا كانت في أمان..لا فتنة فيها ولا هلاك..
خلوة ومسيد..
لا تورا بورا يصولوا فيها ..
لا جالوا فيها الجنجويد..
لا فيها كانوا اليوناميد..
لا زول بيسرق يرتشي..
خليني أسأل من جديد..
إنت قايل حواء ما ولدت براك..؟
ولدت كتيير ..فاتوها ليك ..
إنت والشلة المعاك..
أرفع في دعمك تاني زيد..
باﻟﻠﻪ عليك بس إختشي..
ما إنت عامل فيها سيد..والغير عبيد..
فينا تأمُر ليك نجيب..
والمولى حتماً هو الشهيد..
لمن نقيف في يوم عصيب..
لا فِيهوا دعماً بترفع ..
لا الدُولة ليها هِناك نصيب..
لا ثُورة تنفع لا قريب..
والسِر هناك حا يتفشي..

بلا أقنعة – زاهر بخيت الفكي
صحيفة الجريدة