رضاك يا امريكا ..!!

والعام جديد يا سيدي أستُرنا إتولانا
بارِك في الأرِض أرسل عليها سمانا
سائليين للإله قادر خزاينُو ملانة
تصبِح بلدي قبلة مولاي يعظِم شانا

بصراحة الصراع شِبعنا منو كفانا
أوقفوا للحرِب لا تعمِّروا الجبخانة
نجمع للكلاش الجيم مُسدس ودانة
والحامل السلاح ما يلقى بينّا مكانة

راجعين لى ورا والناس مشت قدام
تركوها الحروب واستبدلوها سلام
لا قالوا صحابة هُم لا منهجُم اسلام
شِعارُم كان عمل ما زي شعارنا كلام

شوف الغيرنا شايلين للمعاول يبنوا
عمّرو للوطن ما كانوا مِعوّل هدموا
فلحوها الأرض كم حرثوا فيها يدفنوا
ما حاكوا حشّاش الزروع بي دِقنُوا

مليون ميل مُربع كانت مساحة أرضوا
حلايب تابعة لينا الفشقة وأبيي برضوا
انفصل الجنوب بالفرحة قاموا يعَرضُوا
قايليين بالفصل أمريكا ناسا بيرضوا

اقترب الفجُر والبشريات جات لاحت
في يوم السعد يوم الغمامة انزاحت
فارقنا الفساد زالت روايحوا الفاحت
فاضية بلدنا من ناس قريعتي الراحت

من سرقة وفساد تصبح بلدنا نضيفة
تروق أجوانا تصفى من غُبار أو زيفة
لا لصاً فيها يسفح لا نشالاً إيدو خفيفة
لا قلم إنكسر لا صادروها صحيفة

بلا أقنعة – زاهر بخيت الفكي
صحيفة الجريدة