خسارة الخال يا خسارة..!!

قِلة أدب وكمان جسارة..
يا ولدي لو تسمح تقيف..
شان أسألك والفيزياء كيف..؟
كيف شكلو كان الامتحان..؟
جاوبني جواب ما ظريف..
والله يا (خال) كان عوارة..
الامتحان بالجد صعب..
والقصة يا (خال) ما شطارة..
خسارة (الخال) يا خسارة..
في الشمال شايل قلم..
باليمين ماسك سيجارة..
دُخانا طالع في السماء..
في الواطة يتطاير شرارا..
خسارة (الخال) يا خسارة..
ود أختي لا خِجِل استحى..
لا مني ضاراها السجارة..
حليل زمان التربية..
حليل زمان كانت وزارة..
زمن الكبير كان مُحترم..
كُل الكُبار يبقولي عم..
حافظ مقامات الأدب في رأسي صم..
قُبال يقول يفتحلو فم..
بسراع أجاوب بي فهم..
فاهم تمام لغة الإشارة..
خسارة الخال يا خسارة..
ود أختي شافع ما كبير..
قدامي ينفُخ في سيجارة..
أبوك يلملم في القروش..
القاسية زي دم الحجامة..
من بدري يمرق لي ظلاما..
كم جاع عشانك ياما ياما..
رضيان وعايش بالبصارة..
شان تقرأ تنجح بي جدارة..
ما حاسي بالشقى والتعب..
بالزمان الصار كعب..
جسارة بس قلة أدب..
والامتحان يا خال صعب..
خسارة الخال يا خسارة..

بلا أقنعة – زاهر بخيت الفكي
صحيفة الجريدة