يا مصنفاااات

في العام 1991م كنت مسؤولاً عن أكاديمية خاصة تعنى بتدريس علوم الكمبيوتر أذكر أنني وبينما كنت في مكتبي قمت بسماع جلبه في الخارج فرفعت سماعة (الإنتركوم ) الداخلي لأقوم مستفسراً السكرتارية عن السبب والتي أخبرتني بأن هنالك (شمطة) بين أحد الموظفين وجماعة يدعون أنهم من مجلس المصنفات الفنية والأدبية فطلبت منها أن تدعوهم لمقابلتي وقد كان !
كانت الجماعة مكونة من ثلاثة موظفين شباب ، بعد الترحيب بهم سالتهم ما المشكلة فقالوا أنهم ينتمون إلى المجلس القومي للمصنفات الفنية والأدبية وبما أننا نقع ضمن دأئرة إختصاصاتهم (كما أفادوا) فعلينا دفع رسوم قدرها كذا !
أخبرتهم بكل أدب وإحترام بأننا لا يمكن أن نتبع لهم لأننا وببساطة نتبع للتعليم العالي (وقتها) وأن (دراسة الكمبيوتر) لا علاقة لها مطلقاً بمجلسهم الذي يعنى بالمصنفات الفنية والأدبية حيث أن (الأكاديمية) لا تعني لا بالفن وللا بالادب ، ولما رأيت أن الشباب (الكلام ده ما واقع ايهم في راسهم) قلت لهم :
• خلاس وروني مديركم منو وأنا بكرة أجي اقابلو ونحل المشكلة !

وقد كان أن ذهبت في اليوم التالي وقابلت (السيد المدير) الذي سردت له ما كان من أمر زيارة (أولادو) وناقشته نقاشاً مستفيضا حول عدم إمكانية أن نتبع كمؤسسة تعليمية لمجلسه ، وقد فهم الرجل وعزي ذلك لعدم (فهم) المجلس لمسألة (الكمبيوتر) الذي كان شيئاً جديداً في ذلك الوقت ، وهنا (قمتا رجالة مني ساااكت) بتقديم عدد عشرين منحة دراسية لمنسوبي المجلس لإزالة أميتهم التقنية وقد كان أن تم إستيعابهم ..
القصة أعلاة أوردتها بعد أن أعادتني لها قصة مشابهه ومن نفس (المجلس) فقد إتصل بي عدد من أصحاب (خدمات الطباعة) بالكمبيوتر (بأم درمان) ممن يقومون بطباعة (كروت الافراح) و(بوسترات المناسبات (من مؤتمرات وخلافه) وهم يشتكون مر الشكوى من (ناس المصنفات الادبية) الذين يطالبوهم بدفع رسوم للمجلس (كده بس) قدرها 1500 جنيه ..

• يا أستاذ المشكلة مافي الدفع !
• طيب في شنووو؟
• المشكلة إنو يجونا ناس المصنفات (الولائية) يقولو ليك يا تدفع يا نشيل العدة (الكمبيوترات) ! ويفوتو كده يجوك ناس المصنفات (الإتحادية) ومعاهم مستشارهم القانوني وبرضو يقولو ليك يا تدفع يا نشيل العدة !!
• كيف الكلام ده؟
• أيوه يا استاذ زي ما بنقول ليك .. الاثنين يقولوا ليك انت تبعنا نحنا .. ناس المصنفات الولائية يقولوا ليك ماعندك علاقه بي ناس المصنفات الإتحادية وتجينا وتدفع عندنا .. وكل واحد فيهم يقول ليك طلع مرسوم بيقول انت تابع لينا .. يعني الاثنين عاوزين يقلعوا باسم المصنفات الفنية والادبية .. مع العلم إنو نحنا ما عندنا علاقة كلو كلو بالمصنفات دي لا بنطبع كتب لا دواوين شعر .. لا قصايد . لا بنسجل (غناء) !!

يا جماعة الخير :
معقولة المصنفات الفنية والأدبية دي من حوالى (ربع قرن) لما حصلت الحادثة الأولى وحتى اللحظة ما عارفا (المعاها والما معاها) ؟ وتشيل وتتسلبط في (الناس) سااااكت؟ هل يا جماعة الخير (كروت المناسبات) دي ليها علاقة بالمصنفات؟ وبعدين لو قلنا ليها علاقة طيب شوفو لينا قصة (التبعية دي) ما معقول أولادنا ديل (يدفعو هنا وهناك) وللا شنووو؟ لمتين يستمر أكل أموال الناس بالباطل كده (وتقطعوا في أرزاق الناس) ؟ ولمتين كل زول (ما عارف شغلو) ؟؟ !!

كسرة :
البلد دي شي مغتس حجرا غير أكل أموال الناس بالباطل ده ماااافي ، وفي إنتظار رد الإخوة في المصنفات مع إنو قصة (جهة) ترد عليك دي بقت (مستحيلة وكده) والدليل الكسرات التحت دي !!

• كسرة ثابتة (جديدة لنج) :
أخبار إجابة رئيس الجهاز القضائي بالخرطوم على (الإستئناف أبو يوم) شنو (و) !

• كسرة ثابتة (قديمة):أخبار ملف خط هيثرو العند النائب العام شنو؟86 واو – (ليها سبعة سنوات وشهرين)؟

• كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو؟ 44 واو (ليها ثلاث سنوات وتسعة شهور)

ساخر سبيل – الفاتح جبرا
صحيفة الجريدة