كيفن بتتساوى الكُتوف..؟

صادق معاك..
عارفك تمام جُواكا زول..
من جِينة فيها كريم صفات..
مُزدانة بالخُلقِ الجميل..
صادق معاك..
لمّن قبيل ..
صادفت لحظات من صفاك..
أنا قُلت ليك..
يا صاحبي حاذر واحترس..
أعمل حسابك للظروف..
وانا كُلي خوف..
من بُكرة تسقُط من سماك..
والعين تشوف..
كيفن بتتساوى الكُتوف..؟
بين زول تِعِب من الوقوف..
في محطةِ الصبُر الهلاك..
في البص وقوف..
والعيش صُفوف..
والنفايات التلال..
بالريحة أزكمت الأنوف..
بين زول كمان مُرتاح شديد..
بين الدول يسعى ويطوف..
والجيب تقيل ..
لليورو شايل بالألوف..
أخوانّا ديل ما مستواك..
ساكنين بروج ناطحة السحاب ..
ما تجري ياخي ورا السراب..
بالسرقة والغش منّهم..
تنهب وتصبح زيّهُم..
يا ريت تصَدِّق لينا قول..
قبل الشباب يرحل يزول..
باكِر تغيب شمسك تميل..
يا صاحبي والمشوار طويل..
دايرلو زاد.. داير دليل.
استهدى بالمولى الجليل..
صادق معاك ..لمّن قبيل..
أنا قُلت ليك..
ما مُستواك..

بلا أقنعة – زاهر بخيت الفكي
صحيفة الجريدة