مشي بإهمال

تقول الأخبار أن أحد وكلاء النيابة بينما كان يسير في الشارع العام لم يعمل بمبدأ (نظرة لك والثانية عليك) فحملق في إحدي (الفتيات) دون خلق الله السابلة وأخذها إلى (القسم) بحجة أنها ترتدي زياً فاضحاً ولما مثلت الفتاة أمام المحكمة إتضح أن الزي (لا فاضح ولا حاجة) وهنا قام وكيل النيابة الشاكي بتعديل إتهامه إلى (المشي الفاضح) !

عزيزي المواطن .. عزيزتي المواطنة .. لأن من أغراض هذا العمود (التوعية) ما إستطعنا إلى ذلك فها نحن (نوعيك) حتى لا تتفاجأ فيغلي الدم في عروقك وتتعرض للإستفزاز الذي ربما يعرضك إلى فعل تندم عليه طويلاً ، فشوارع البلد قريبا سوف تكون مراقبة بالرادارلا للقبض على الذين يتجاوزون (السرعة المقررة) من سائقي السيارات فهؤلاء أمرهم هين إنما المعني بهذه الرادارات هو (ضبط الشارع) وحسم كل مواطن لا يلتزم بطريقة (المشي) التي تقررها الحكومة إنفاذا لمشروعها الحضاري الذي يهدف إلى (تنقية المجتمع) والعمل على إرضاء الله ورسوله ، نعم لا تتفاجأ وأنت تسير في معية زوجتك في أحد الشوارع الرئيسة بالسيناريو التالي :

• يا أخونا .. يا هوووي لو سمحتا
• (في إستغراش) : أيوه نعم في شنوووو؟
• إنتا ما عارف في شنووو؟
• طبعن ما عارف
• عارف ما عارف تمشو معانا القسم؟
• (في إستغراش أكثر) : قسم شنو؟ دي مرتي ولو عاوزين أجيب ليكم القسيمة؟ !
• في زول سألك من قسيمة؟ عارفنها مرتك !
• والمشكلة وين طيب
• مشيتا دي ما عاجباني !
بالطبع لم يكن المواطن المسكين يمكن أن يدور في خلده بأن الحكومة (خلت كل مشاكلا ومشاكل الناس) ووضعت (مواصفة) لطريقة مشي (النساء) والفتيات وأن كل (واحدة) لا تتبع ما جاء في هذه ا(المواصفة) وتضبط في أي حالة أخرى فسوف تعرض نفسها إلى بنود قانون المواصفات (الأخلاقي) في دولة (الهروب إلى الله) !
جاط صاحبنا وأمسك بتلابيب (الرجل) الذي إستعان بقوة من (مباحث المشي) التى قامت بوضع صاحبنا وزوجته في خلفية (البوكس) الذي إنطلق نحو القسم .
• سعادتك الراجل والمرا ديل كانو ماشين و(المرا دي) ما ماشة بالقانون؟
• كيفن يعني؟
• لا يا سعادتك أنا بقصد إنها ما ماشه بي قانون (المشي العام) ؟
• وثقت الحالة؟
• أيوه سعادتك الحالة (موثقة) .. أهو ده الفديو .. وممكن كمان تشوف الفديو الإتسجل بالرادار كمان
• (يمسك بالموبايل ويطالع الفديو ثم يوجه حديثه للمرأة) : إنتي ما عارفا المشي يمين وشمال ده مخالفة ؟
• (زوجها يتدخل) : المرا دي عاملة ولادة قيصرية وقالو ليها إتمشي!
• وكت عارفين ليه ما أخدتو ليها رخصة؟
• رخصة شنو يا جنابو؟ أنا عاوز أنزلا خط ؟
• شوف .. القانون واااضح .. أي مرا وللا بت لازم تمشي في خط مستقيم .. يعني شمال ويمين و(لولوة مافي) .. وبعدين ما ترفع (رجلها) وهي ماشة أكتر من (عشرين سنتي) .. ولمن تخت كراعا في الواطه تختها بضغط يوازي (55 نيوتن/م تربيع) ومسموح ليها تتلفت 3 لفتات في الدقيقة .. إنتو قايلننا مركبين ليكم الرادارات دي عبط ساكت؟
• يا جنابو دي (مرتي) وتمشي بالصورة البتعجبا وتريحا طالما (محتشمة) ؟
• اللبس حاجة والمشي حاجة تانية …
• كيف؟
• مادة (اللبس الغير محتشم) دي مادة براها .. ومادة (المشي الغير محتشم) دي مادة براها .. وكمان لو ما عاجبك عندنا مادة تانية (للضحك الغير محتشم) !
• وما عندكم مادة (للغف واللهط الغير محتشم)؟
• بتقول في شنووو؟
• لا بقول .. قانون محتشم !
• أيوه محتشم إنتوعاوزننا نخليكم (تمشوا على كيفكم؟) ثم موجهاً حديثه (للشرطي) :
• أفتح ليها (مشي بإهمال)

كسرة :
عزيزتي المواطنة أحرصي أن تكون مشيتك (مطابقة للمواصفات) !!

• كسرة تحرش : أخبار إنتهاء التحقيقات مع الدبلوماسي المتهم بالتحرش شنووووو؟ .. ليها تلاته شهور

•كسرة جديدة لنج : أخبار كتب فيتنام شنو(و) يا وزير المالية ووزيرة التربية والتعليم شنو(و) … (ليها أربعة شهور)

• كسرة ثابتة (قديمة): أخبار ملف خط هيثرو العند النائب العام شنو؟ 93 واو – (ليها سبع سنوات وتسعة شهور)؟

• كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو؟ 52 واو (ليها أربعة سنوات وأربعة شهور)

ساخر سبيل – الفاتح جبرا
صحيفة الجريدة