خسارة الظن الحسن ..!!

إن شاء الله خير..
وريّنا يا سيدي الحصل..؟
موبايلك الراقي الجديد..
لقيتوا مُغلق يا الفحل..
في الأربِع الفات العِصير..
ضربت ليك يا زول كتير..
ما لاقي رد إن شاء الله خير..
سوداني خارج الخدمة كان..
والزين كمان يا زول قفل..
ما عرفت ليك كيفن أصل..؟
أوجدت ليك سيدي العُذر..
سألت نفسي ومافي رد..
جايز يكون بره البلد..؟
يا ربي هل تربالنا مشغول بي عمل..؟
يمكن يكون فات للأهل..؟
للزومة والمشوار بعيد..؟
حكاية ما لقيت ليها حل..
موبايلي لي رقمك يعيد..
فجاءة النظام بي إتصل..
قال لي خلاص ود الفحل..أصبح متاح
يا زول سلام والداعي خير..؟
وريّنا يا سيدي الحصل.؟
ردّ السلام بى صوت خفيت..
والله يا ود حاج بخيت
بالجد أنّا زعلان شديد..
بعد العمل للحافلة جيت..
الشنطة في يدي الشمال ..
عصاية في اليد اليمين أتوكأ بيها عشان أصل..
ساعدني شاب راقي وصبوح..
أفسح ليَّ جنبو كمان محل..
قال ليَّ جيب الشنطة جاي ما تتعبك عمي الفحل..
ناولني ليها بعد نزل..
والحسرة كانت في الحصل..
الشاب نشل ..موبايلي يا صاحبي الجديد..
أرقامي ضاعت كُلها في الشاب كمان ضاع الأمل..
خسارة خاب ظني الحسن ..
ظني في الشاب النشل تلفوني براحة ونزل..
زعلني ياخي جنس زعل..

بلا أقنعة – زاهر بخيت الفكي
صحيفة الجريدة