مافى حتى كديسة واحدة !!

* يبدو أن وزير الاعلام (أحمد بلال) كان (هاى) عندما صرح للصحفيين بأن نظامهم الذى أوشك على الانهيار يستطيع أن يحكم (ثلاثين عاما) أخرى إذا استمر فى مكافحة الفساد والقطط السمان .. ولا أدرى عن أى مكافحة فساد وقطط سمان يتحدث المتورك (بلال)، ونحن لم نر حتى الآن أى مشهد لمحاكمة فاسد فى هذا المسلسل الذى اوشك على نهايته غير تقديم متهم واحد لمحكمة الفساد هو مدير المتحف القومى فى قضية سرقة شجرة صندل من المتحف تبلغ قيمتها حوالى ثلاثة ملايين جنيه سودانى!!

* ومع اعترافى بأهمية هذه الشجرة التى زرعت فى خمسينيات القرن الماضى، واستحقاق سارقها لعقوبة مغلظة كونها مالا عاما، فضلا عن الجرأة التى سرقت بها بقطعها بمنشار كهربائى فى وضح النهار، وتقطيعها الى أجزاء صغيرة إذ يبلغ طولها (6 أمتار)، ثم نقلها الى خارج المتحف وعدم معرفة مصيرها حتى الآن، إلا أنها لا تساوى شيئا أمام قصور كافورى ودبى وماليزيا ومليارات الدولارات التى سرقت من مال الشعب، ووضعت فى حسابات خارجية !!

* شجرة صندل شنو، وقطط سمان شنو يا بلال ،عينكم للفيلة الكبار والتماسيح والضباع، تقولوا لينا قطط سمان؟ .. وياريت لو القطط السمان دى وديتوها محكمة وحاكمتوها أو حتى وريتونا الحصل معاها شنو .. ياخى لحدى هسة من ما بدت المسرحية دى أو المسلسل الكوميدى السخيف ده، (مافى حتى كديسة واحدة بيها نِصَبَّر شوية)، مع كامل اعتذارى لمبدعنا الكبير الفنان أحمد الجابرى (رحمه الله) على تغيير كلمة (رسالة) كما فى الأغنية الى (كديسة)، لكن تقول شنو لى زول يقول ليك بدون خجلة “حكومتنا حتستمر ثلاثين سنة أخرى لو استمرت فى مكافحة الفساد، وهو يعلم علم اليقين بأنها مجرد مسرحية سخيفة، ومسلسل سئ الحبكة والإخراج وإلا لبدأ مكافحو الفساد بأنفسهم وأقاربهم .. ولا شنو يا سيد بلال .. !!

* عليكم الله أقروا الكلام ده : ” وفى منحى آخر ناشد بلال رئيس الجمهورية بالاستمرار فى حربه على الفساد والقطط السمان، وقال إن الشعب السودانى صبر كثيرا على الحكومة، ونستطيع أن نحكم تلاتين عاما أخرى إذا استمرت الحكومة فى محاربة الفساد، محذرا من نفاذ صبر الشعب، مشددا على أن الاتحادى سيظل يمد يده الطاهرة ويتحدث بلسان عفيف، ولا مجال للهروب من المركب غرقت أو لم تغرق”، مضيفا: ” نحن أصحاب مواثيق وعهود، لا نَطعن من الخلف، ولن نهرب” ..!!

* بالله عليكم الله شوفوا الزول ده بيلعب صالح ورقه كيف .. (حكومتنا ، وسنمد يدنا، ولن نهرب، وما بنطعن من الخلف، ونحنا أصحاب مواثيق وعهود) .. والله بعد النفاق ده كله كان ما عينوك فى الحكومة الجاية يكونوا يتلوموا معاك .. حَرَّم لو جرير بن عطية اليربوعى عاصرك كان أكل نيم، الله شافو، لكن المحيرنى حكاية يدكم الطاهرة ولسانكم العفيف ده، يا زول إنت بى جَدك، ولا بتهظر؟!!

* غايتو يا ود بلال يا بتهظر، يا الحالة كانت (هاى شديد) .. والدليل حكاية (نحن أحرار وأصحاب قرار) الرديت بيها على مزاعم صحيفة (الراية) القطرية، انو السعودية والامارات ضاغطينكم وشارطين عليكم شروط عشان يملوا قرعتكم .. مسؤول من الخير يا ود بلال .. إنتو ناس قطر فاكنكم عكس الهوا مالكم ؟!

* زمان يا ود بلال اخوانك ديل كانوا قادين مخنا بى حكاية (من لا يملك قوته لا يملك قراره)، وهسة إنت شابكنا انحنا احرار وأصحاب قرار، وما عندكم (102 مليون دولار) حق صيانة المصفاة، ولافين تشحتوا وما فى زول شغال بيكم، أحرار شنو وأصحاب قرار شنو، دى على منو .. ما قلت ليك (جرير) كان فطس من الجوع لو عاش فى زمنك ؟!

مناظير – زهير السراج
صحيفة الجريدة