وصيتي ليك .. يا ولدي لا ..!!

يا ولدي لا..
لو وظفوك في أمرِ عام..
خليك أمين
يا ولدي حاذر واحترِس
من الفساد
ظُلم العباد
خليك عفيف ما تختلس..
لا تقرب المال الحرام..
لو راودوك أوعاك تلين..
أغروك بالجاه والعِرس..
أوباما كامري ومرسيدس..
لا تستكين
أوعاك تلين..
لو ضايقوك ما تبتئس..
إيّاكَ واموال الغلابا..
أهلك الفُقرا التَعابا..
تلحق الناس القبيل سالت لُعابا..
لما شافوا المال ده سايب..
غير رقابة..
ما تغُشك أبراجاً عِلت..
ناطحة يا ولدي السحابة..
يسيل لُعابك زيّهم..
هُم الزمان أشباه صحابة..
صاموا إتنين والخميس..
جاهدوا الروح بى صلابة..
في الجنوب كانوا الأشاوش..
حاربوهم قاتلوهم بى ضراوة..
طاردوهم غابة غابة..
حجوا بيت الله الحرام ..
(في كُلِ عام)
للمولى أسأل واستعين..
إيّاك والفعل النجس..
يغُشك إبليس اللعين..
ليك يفترس..
ينصب عليك شِراكو..
السلطة والمال واللبس..
خليك أمين..
ما تختلس..

بلا أقنعة – زاهر بخيت الفكي
صحيفة الجريدة