قصيدة « النبقة»
الفقرا انقسموا النبقة
النبقه القعدت تبكي
قالتلهم كيفن؟
وأنا ما بحوق في السن!
والناس ضروسا تروس
مجنونه دايره تدوس
ما تقولو لي معليش
كيفن أكفي الديش
أياني حتة نبقه..أنا
ماني فدان عيش
***
والنبقه حزنت خالص
حلمت تكون أكبر
ويبقي العطاء ممدود..
بس حبه تصبح أكتر
أهو حاجه تدي وتثمر
واتمددت حبه.. وشالت
قشر أخضر
واتحولت تبشه
والفقرا حضنوا التبشه
التبشه حاصت دهشه
الناس دي راجيه الهبشه
غرقانه ماسكه في دهشه
الناس دي عقلها طشه
شايلين سكاكينن
واقفين ألف أحمر
كايسين شبع منظر
التبشه زادت خوف
بس جاريه قامت صوف
لحقوها توفك تووف
قالتلهم معقول
وأنا ما بشبع زول
والناس بطونن فاضيه
ما تقولو لي معليش مادام
نفوسن راضيه
كيفن أكفي القوم
وأياني حبة تبشه..أنا ماني
شوال دوم
والتبشه حزنت خالص
حلمت تزيد أو تكبر
كده حاجه أحسن وأنضر
ياخ ما مهم المنظر
التبشه قالت تكبر
اتمددت حبه واتحولت شمامه
والفقرا جاها زحاما
شايلين مناجل ياما
المرأة رابطه حزاما
والطفل جري قداما
وشيوخ حفت أقداما
انبهطت الشمامه
قالتلهم كيفن..؟
شمامه تكفي قيامه؟؟؟
وحلمت تكون أزيد
حاجه بعطاء متجدد
اتمددت نامت.. صبحت بقت بطيخه
قالت كدي وانفتحت
اللبه والبذره والقشره ذاتا اتحتت
والبذره لما انزرعت
رجعت عنيده وحزنت
قامت بقت من تاني
من تاني عادت نبقه ..
ومن تاني رجعت تبكي
وقالتلهم كيفن؟
وأنا ما بحوق في السن!!
والناس ضروسا تروس مجنونه دايره تدوس..
الصباح..رباح – آخر لحظة
[EMAIL]akhirlahzasd@yahoo.com[/EMAIL]
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة