كوش نيوز .. أخبار السودان بين يديك

ونسه مع الرشيد



شارك الموضوع :

[JUSTIFY]

ونسه مع الرشيد

أصر عليّ الهلالاب أن أحضر أو أشاهد مباراة الهلال مع النسور حتى ألحظ الطفرة الهلالية في وجود النابي وبعد التعادل مع زينت الروسي و….. و…… فقررت التنازل والجلوس إلى المشاهدة.. قالوا الكورة في النيلين فتحت النيلين لقيتا ألوان طويلة.. قرأت في القومي أنني يجب أن أوجه الطبق كم درجة كده.. طيب مادام الحكاية داير ليها لف طبق ماتجيبوها مع النيلين في الشروق أو في النيل الأزرق.. ونشوفا بدون (لف طبق)، لكن ديل بحبوا يعذبونا.. قلت ولا ألف طبق ولا يحزنون سمعت الوصف في الرادي الإذاعة القومية والشباب.. لقيتو الرشيد بدوي.. وبصراحة الرشيد ونسني ونسة ظريفة كان مرات ولدقايق يونس فينا.. واضح إنو الكورة ماكان فيها حاجة يوصفوها.. الشوط الأول كلو مافيهو (كورنر)، يعني الكورة لافه في نص الملعب .. ودي مامحتاجه لي وصف لأنو الكورة أقوان والأقوان بجيبا الهجوم.. شدة ما أتكيفت شلت الرادي ومشيت لي ست القهوة بتاعتي.. وبمزاج شربت القهوة وسمعت الرشيد.. خلاني أشرب اتنين قهوة وواحد شاي.. أنا عجبتني الونسة شديد.. خاصة الجزئية بتاعة اللاعبين المحترفين.. الرشيد قعد يعد في المحترفين اللاعبين المباراة دي بس وأنا أعد معاهو.. طلعوا تمانيه لاعبين في فريقين واحد قمه وواحد قاع.. طبعاً مافي فريق بغلب هلال ومريخ لأنهم بجووا الكوره مهزومين نفسياً، بالله الفريق بجيب قون في الهلال، ولا المريخ من قولة تيت بعد ده يطلع مغلوب أربعة واحد.. ودي الهزيمة النفسية النسور كانوا لاعبين بي طريقة أربعة خمسة واحد.. تصور دايرين يجيبوا قون

في الهلال بمهاجم واحد.. واضح إنهم دايرين مايخش فيهم قون ده نهاية الطموح.. وبديهي الداير الكوره تنتهي صفر صفر بطلع مغلوب واحد..

نرجع تاني لي حكاية تمدد المحترفين.. الرشيد قال في الدوري الممتاز عددهم 58 وكلهم من جنسيات أفريقيه تقريباً، تاني يا الرشيد بعد سنه ح تتسع حكاية المحترفين ويجيبوهم من شرق آسيا ومن الدول العربية.. فتاني يا الرشيد ح تذيع الكوره هلال مريخ.. أو أي فريقين بالطريقة دي

تسفاي اداها لي جورج.. لعبا لي آية الله.. قطعاً صمويل أداها لي كانو.. صفر الحكم البنغلاديشي رحمتو بعد رفع الراية رجل الخط الأريتري دربباو.. أتلعبت الكورة من يايا لي سيدروف لي إيتو.. ولازم من هسه انت والمعلقين المعاك تذاكروا الأسماء الأفريقية سريع والأسماء الشرق آسيوية بي مهلة.. وبالطريقة دي ح يكون رؤوساء الأندية من الدول العربية فيكون رئيس نادي الهلال الشيخ بندر بن العتبي.. ورئيس نادي المريخ الشيخ شعلان بن بندر.. وذلك لتفريخ محترفين أفارقة يغزون فرق العالم.. عندئذٍ لن يكون الإنتصار في الملعب بل ببيع أكبر كم من المحترفين الذين كانوا مواسير ولكن تمت سباكتهم..

المهم الرشيد ونسنا ليك جنس ونسه وبرضو عرفنا الحاصل شنو.. الونسه ما أثرت على الوصف.. ورغم إنو مرات الرشيد بسربع كتير لكن عرفنا الحاصل كلو.. يعني كان وصف تفصيلي بي ونستو كمان.. قال ماعارف لف الطبق كم درجة كده.. بعدين الكوره السمعناها دي.. كان ده مستوى الهلال.. أخير يبطل الشماته على المريخ لأنو الراجيهو نفس اللقاهو المريخ..
[/JUSTIFY]

الصباح..رباح – آخر لحظة
[EMAIL]akhirlahzasd@yahoo.com[/EMAIL]

شارك الموضوع :

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *

This site uses Akismet to reduce spam. Learn how your comment data is processed.

سودافاكس