كنت مشغول من الصباح وما لقيت طريقة افتح الفيسبوك وجيت قبل شوية فتحتو لقيت العشرات من التاقات و الرسائل على شاكلة ( كباشي في فتيل ) ( القبض على الكباشي ) ( لجان مقاومة كرري تداهم اجتماع للكباشي مع فلول النظام ) .
المهم طبعا اتخلعت من العناوين وبعد البحث اكتشفت انو ما كان في اجتماع وانو كانوا مجموعة من الصحفيين ومعاهم عضو في حزب الامة وكانت زيارة ومعايدة للصحفي جمال عنقرة قريب كباشي لانو كان مريض ، ولا في فتيل ولا طشت وكل الحصل فوضى وشتائم وسب و قذف وعوارة و ضياع لهيبة الدولة وانفراط لعقد الامن الاجتماعي بصورة خطيرة جدا” .
الكباشي طلع من البيت راسه مرفوع وجلابيته نضيفة وعربيته تلمع لا فيها شق ولا طق
لكن القاعدين جوة الفتيل الحقيقي هم الشعب السوداني ، الشعب كلووو قاعد جوة فتيل الفوضى و فتيل الفتنة و فتيل الاوساخ المتراكمة و فتيل السيول و فتيل الغلاء و فتيل المرض .
البلد عايشة في حالة تدهور مريع و إنفلات امني غير مسبوق و فشل اقتصادي كبير مع حالة بتاعت إسهال سياسي وامني و بعد ده كلوووو في ناس جاية تقول كباشي في فتيل
عليكم دينكم انتو نصااااح ؟؟ القاعد جوة الفتيل منو ؟؟
الشعب ولا الكباشي ؟؟؟
نزار العقيلي
-
-
-
-
-
-
-
-
