داليا الياس: نصيحة.. (المابيعرف.. ماتدوهو يغرف)

الجماعة الأساساً عاشوا حياتهم كلها مطبعين فى بلدان التطبيع… عاملين هسه رايحين ولابدين لحدى مايشوفوا الشعب شايت وين ومشيلين (البرهان) وش القباحة!!
علماً بأنهم عارفين الرصة ومباركين الخطوة لكن ملاوزين كالعادة من الشارع والفيس بوك!!
المرة الفاتت إتفقوا معاهو على لقاء (نتنياهو) ولما سألوهم نكروهو حطب وإتغابوا فيهو العرفة فى أجبن حركة ممكن تصدر من مسؤول!!
وهسه كمان متابعين وموافقين وعارفين إنو ده الحل الأنسب للحاصل فى البلد من جوع وتردى … ومخرجهم الوحيد من قلة الحيلة الهم فيها….لكن منتظرين الطبخة تنجض ويجوا يغرفوا ويعملوا فيها أسياد الشى.
بس نصيحة : ( المابيعرف…ماتدوهو يغرف)
وعدم العرفة بقى واضح لامن فاضح!!
ويالبرهان (كل هاكافود) …. أحترم فيك كونك دقيت صدرك وشلتا الشيلة بواقعية .

داليا الياس