فيسبوك

يا جماعة والله كل العدس واحد، كان عدس الكيزان ولا عدس القحاطة


( كلووو عدس )
انا مندهش حقيقي والله بالناس المحتفلة بمسلسل ( السلام ) الحاصل في جوبا ده ، حقيقي مندهش والله ، اول شئ الناس الموقعة في الاتفاق ده ديل هم نفس الناس الكانوا في يوم من الايام قاعدين مع الكيزان في القصر و في البرلمان و في الحكومة التنفيذية ، يعني مافي فرق بين عدس الفراشة و عدس الوابل ، كلوووو عدس ، الفرق في الدعاية بس .
الحاصل في جوبا ده يا جماعة لا يمكن اننا نسميهو ( سلام ) لانو الموقعين ديل جربنا توقيعاتهم قبل كده و ما شفنا اي سلام ، و كمان لا يمكن اننا نقول عليهو ( شامل ) لانو الحركات العندها وجود عسكري حقيقي على الارض ذي عبد العزيز الحلو و عبد الواحد ما موجودين ، ممكن نقول عليها ( اتفاقية ) و بس .
لانو فعلا الجماعة ديل اتفقوا مع بعض ، اتفقوا على مصالحهم ، اتفقوا على المحاصصة ، و من حقهم يحتفلوا و يفرحوا و يزغردوا بحلة العدس بتاعتهم دي ، يلا انت كمواطن عادي او ثائر حقيقي او مواطن نازح ماااافي سبب واااحد بخليك تحتفل و تفرح بمسلسل قبل كده شاهدته و بي حلة عدس ما ح تضوقها و لا ح تشم قدحتها زااااتو .
يا جماعة والله كل العدس وااااحد ، كان عدس الكيزان ولا عدس القحاطة ، كل الحكاية عبارة عن عدس عااااادي و من نفس المزرعة و نفس التاجر و نفس المورد و ح يتم طبخه بنفس الطريقة المعروفة لطبخ العدس ، لكن عشان يحمسوك انت المواطن العادي و الجيعان جدا للسلام لاااااازم يروجو ليهو بالدعاية دي و يقولوا ليك عدس الوابل ما محتاج توابل .
الخطير في الموضوع انو حلة العدس دي عشان تطلع طاعمة محتاجة لبصلة كبيرة يحمروها ليها و مااااافي بصلة غير البصلة بتاعت ( الخلاء ) اللبست بدلة و كرفتة و اصبحت نائب مجلس سيادة و وقعت على اتفاقية حلة العدس بي يدها بدون ما تعرف انو هي ح تكون اول ضحايا حلة العدس دي .
نزار العقيلي



اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *