حنرجع لرفع الدعم الكامل ربما بعد وصول الدولار 500 جنيه

طيب بقي عندنا بنزين الليتر بي ١٢٠ جنيه، وبنزين في محطات تانية بي نص التمن، طيب انا البخليني اكب بي ١٢٠ شنو ما دام في بي نص التمن؟ ولو كنت بتاع باترول زاتو، اخلص شغلي والمسا السهرة في صف الليتر ابو ٥٦ دا، ما في النهاية بتاع البرادو دا برضو ما حيقاوم إمكانية التوفير ودا حقو وحاجة قانونية.

طيب كدا بي منطق السوق البسيط الشركات الجايبة بنزين محرر دي مبيعاتها انضربت، وبرضو حيحصل سوق اسود من المدعوم اقل من المحرر.
وايضا لو المدعوم اتوفر غير انو حيقضي على الشركات البتبيع بالسعر الحر، حيفتح الباب واسع امام نشاط المهربين.
القصة بالطريقة دي ما نافعة، لازم تحرير كامل لمنع التضخم وانخفاض سعر العملة.
دا حل لفترة قد لا تتعدى شهر ولا اتنين.
وزارة المالية بتضيع زمن ثمين، لانو الكلام دا لو حصل قبل سنة كان الامور استقرت والدولار اقل من ١٠٠جنيه.
وحنرجع لرفع الدعم الكامل ربما بعد وصول الدولار ٥٠٠، وعندها اقناع الشارع سيكون اصعب لكثرة تجارب الرفع الجزئي الفاشلة.
صراحة محبط شديد.
#رفع_الدعم

Aymen Osman