ما ممكن تكون (نمر) فى الأفراح (ونعامة) على الأتراح والمحافل الحكومية وغيرها.. ولا شنو؟!!
والى الخرطوم الشايل شوفو وغازيهو فى الصالات والأفراح والليالى الملاح على إعتبارها السبب الرئيسى والأساسى فى الإنتشار المريع لوباء الكورونا القاتل شفتو متواجد فى الحشد الكبير لتشييع الإمام زى ما كان متواجد فى الحشد الأكبر للإحتفال بالسلام!!!
وشفتا دفارات الولاية بتصادر فى كراسى الصالات بينما النفايات تتكدس من حولنا وتكاد تغرقنا فى بحر من القذارة والنتانة والتردى البيئى بحجة عدم توفر ناقلات!!
وكأنو الكوليرا والدسنتاريا والملاريا بقوا مابيقتلوا زول وموقعين إتفاقية مع سعادتو!!
الأكيد إننا ضد التجمعات البتشكل خطورة… لكن كمان المبادئ لا تتجزأ… والمعالجات مفروض تكون شاملة…. ومراعاة ظروف الناس وأكل عيشهم وتجهيزاتهم لليلة العمر مطلوبة.
هسه مشاكل العرابين ووقف الحال الحاصل مع الفئة دى البيحلها منو؟!!
الفنانين والعازفين والمصورين والصالات والسيرفس وناس المكياج وغيرهم وغيرهم ديل كلهم ناس عايشين باليومية وعددهم ماشوية وحالهم واقف ومن رعاياك!!!!
المسؤولية تكون كاملة ياسعادتك… مافى ولاية أمر نص كم.
وما ممكن تكون ( نمر) فى الأفراح ( ونعامة) على الأتراح والمحافل الحكومية وغيرها…. ولا شنو؟!!
داليا الياس
