حنان حسن: اي بوتيك ادخلو صاحبه او الشغال فيه يحاول يتلصق او يلمس او يقول صراحة لو (ريحتيني) شيلي العاوزاهو مجان

ف حاجة غايظاني شديد..
م عارفة لو عندنا الشجاعة نعترف بالبحصل فالاسواق ولا لا..
هل حصل ي حواء قبل كدا سمحتي لبتاع بوتيك يلمسك..عشان يبيع ليك بسعر أقل ولا مجان؟
بتتصرفي كيف ؟؟

مشيت سوق كوووبير ومشهور ف بحري. .اي بوتيك ادخلو..حرفيا اي بوتيك..صاحبو او الشغال فيو بحاول يتلصق او يلمس او يقولا صراحة لو( ريحتيني) شيلي العاوزاهو مجان؟؟
وبتصرفوا كدا عادي كانو دا الطبيعي

عشان كدا سألت السؤال المعين فوق
شكل البوتيك معمول بطريقة غريبة ومقفل كدا
يصروا عليك خشي جوة وبتاع
وين الشرطة من القصص دي؟؟
وين المحلية بس همكم تشيلوا الرسوم وتتخارجوا؟
طبعا فالاخر م اشتريت ولا حاجة مرقت مصدومة قعدت ف بنبر ست شاي شربت ٩ قهوة مرة ومشيت..

حنان حسن