جعفر عباس يكتب.. بعض القواعد لفهم الرجل: (إعادة لمادة مصدرها امرأة)

1- لا تسألي الرجل (عايز تأكل شنو الليلة؟ )، بإجماع العلماء؛ فالرجل على أتم استعداد أن يحفر نفق في جبل جرانيت باستخدام الملعقة، ولا إنك تسأليه السؤال ده. (الرجل تختي قدامو الأكل وياكل والسلام).
2- الرجل بطبعه فاقد الإحساس بالزمن، والتخطيط الإستراتيجي طويل الأجل بالنسبة له التفكير في مصاريف بكرة.. الوجبة القادمة .. قسط المدارس الشهر ده.. لكن حكاية يشتري قطعة أرض، أو يدخر قروش عشان يعمل مشروع للتقاعد… ده ما وارد… فما تهري في نفسك ساي يختي وتنبحي. وفري انتي واعمليها صناديق وختات وانقذي الموقف
3- الراجل إل ينتبه ليك وانتي متريحة بريحة جديدة ده راجل معدل وراثيا ما أصلي. الراجل الأصلي ما بيشم أصلا.
4- احنا النسوان بنكون متيقظين بنسبة 100% بعد الصحيان بعشر دقايق. الراجل في جميع مراحل نموه من ساعة ما يصحى من النوم و لغاية ما يوصل الحضانة أو المدرسة أو الجامعة أو الشغل ولمدة ساعتين تلاتة بيبقى زي الراشنو بي بيف باف .. بس بكمية لا تكفي لقتله.
5- – لما يمرض بالصداع أو بنزلة خفيفة الحياة والطاقة بتتسحب من الرجال وبكون عايز البيت كلو واقف بيخدم فيهو
6- الغالبية العظمي من الرجال بُكم (بضم الباء والكاف) .. و ال بيتكلم فيهم ما بيتكلم في البيت .. فأي محاولة لتغيير مجري الطبيعة حتؤدي إلي كوارث إحنا في غنى عنها
7- تغيير مكان الجزلان أو الدبلة أو النضارة أو الساعه أو الموبايل بالنسبة للراجل ده مشروع بالتعاون مع اليونسكو .. فما بالك بتغيير مكان دولاب أو كرسي أو كنبة .. عايزة الراجل يقعد لك في البيت ما تحولي حاجة من مكانها الله يرضى عليك
8- الكوليسترول و الدهون جزء أساسي من مكونات خلايا الرجل .. فما في داعي للكلام الجارح بتاع الكرش و الريجيم والبياخة بتاعتكم دي يا نسوان
9– لو عايزة تعرفي زوجك بيحبك قدر شنو استنيهو اول ما يجي داخل من برة وما شايف قدامه من الزهج وختي ليهو الأكل قدامه وخليهو يرفع اول لقمة.. وأسأليهو مباشرة عملت لي شنو في الموضوع داك؟ لو بقيتي حية ترزقي يبقي بيموت فيك .. لو لا قدر الله السؤال طلع القشة التي قصمت ظهر البعير .. يبقي يا ريت الموضوع يقيف على الطرد برة البيت .. أو عاهة مستديمة.
10- بالنسبة للراجل السوداني فيه فجوة زمنية غير محسوبة من ساعات الخليقة اسمها صباح الجمعة .. اقتراحات الفطور برة البيت و نتمشى ونغير جو و الشوبينق و الكلام ده تعمليهو مع صحباتك يختي .. الفترة من ليل الخميس حتي ظهر الجمعة اعتبري الراجل فيها في رحلة روحانية تصوفية لإكتشاف الذات زي الوقوف قدام التلاجة بالظبط
13- حسب الدراسات الأخيرة رجال الجيل ده بالذات مابيعمروا كتير وبيموتوا في عمر صغير والنسوان بيعمرن اكتر منهم .. الحقوا عيشوا يومين حلويين و كفاية نقة و طلبات عشان تطولي عمره الافتراضي شوية.. هو أصلا كده كده بره الضمان
(تعقيب من عندي: هذه آخرة تكبير رأس المرأة: كنداكة ومهيرة فهل يسكت الرجال أحفاد بعانخي وترهاقا وعثمان دقنة على هذا التطاول؟ نشيف)