⛔ شعب الله الطعماج.. برازيلي فرع أمبدة
⛔ شعب الله الطعماج.. برازيلي فرع أمبده 🤣🤣🤣
في السعودية عندهم تطبيق اسمو (أوبر) بتاع مشاوير… حاجه كدا زي ترحال الكان عندنا في السودان…
مع القرفه الحاصلة دي وعشان امنع النضمي الكتير مع سواقين العربات… مركب مكنة برازيلي ومسجل إسمي في التطبيق (روبيرتو فرناندو دا سيلفا)…. بركب مع سيد العربية و بعمل فيها ما بعرف اتكلم إلا أسباني…. فبتجاوز حنك الونسة دا لغايت ما أصل مكاني العاوز امشيهو… بحاسب وبتخارج….
المهم الليلة العربية الجاتني سايقها سوداني… جيت راكب شبكني هالووووو ماي فيرند… وير آر يو فروم؟
قلت ليهو فروم برازييييل…
شبكني يا سلاااااااااام أهلنا وحبيبنا
وقبل ما يسترسل معاي في الكلام شبكتو نو انجليش نو ارابك اسبانيول اسبانيول…. (يعني يا ابو الشباب انا لا بتكلم انجليزي لا بتكلم عربي… بس اسباني)…. فشنو عرف انو مافي طريقة اي تفاهم او ونسة مع الكائن دا لغايت ما أصل مشواري…..
المهم في السكة جاهو تلفون… صاحبنا رد على التلفون وقال الو يا حسن كيفك كيف اخبارك ان شاءالله بخير … سايق لي مشوار والله…. راكب معاي واحد برازيلي…. علي الطلاق تشوف وشو تحلف تقول التوم ود عمتك نفيسة 🤣🤣🤣🤣 رقييييق جعبات ما عندو🤣🤣🤣…. و اطرش ما بتكلم إلا أسباني
صاحبو اظن سألو قال ليهو جاي يعمل شنو في السعودية..
صاحبنا قال ليهو بي ضعفتو دي بكون مدرب لياقة بدنية في نادي… اقسم بالله تشوفو تقول نازح من مدني… 🤣🤣🤣
كدي عليك الله افتح الجزيره شوف الجنجويد ديل احتمال دخلو البرازيل وزولنا دا جا مكبرها من هناك 🤣🤣🤣
غايتو يا حسن انا شاكي الزول دا يكون برازيلي فرع أمبده 🤣🤣🤣🤣 اقفل اقفل في كاميرا برجع ليك بعدين….
واتلفت علي وبي ابتسامة عريضة هالووووو ماي فريند….
اااااااه الشعب السوداني البطل… شعب الله الطعماج
يوسف العركي
