سيد الطيب: القطعوا الاتصالات في كل السودان ياهم ذاتم الارتكبوا الجرائم في دارفور

شنو اي زول نزل بوست عن انقطاع الانترنت والاتصالات الهاتفية في السودان تجو ناطين ليه كان قاطع في دارفور من 10 شهور؟ دي مزايدة جديدة كمان ولا نوع جديد من الابتزاز الرخيص؟
لا وكمان وصلت مرحلة فلنقاي تابع لحركة مناوي جاي في صفحتي يقول لي يا عنصري ليه ما اتكلمت عن انقطاع النت في دارفور

بالله شوف الناس دي وصلت ياتو مرحلة في الوضاعة

ياخ اخر خطاب لفكي جبريل ممثل دارفور في اعتصام الموز وحكومة انقلاب 25 أكتوبر 2021 بتكلم عن الاستنفار من اجل تحرير الجزيرة ما جاب سيرة انقطاع النت في دارفور بالغلط.
اخر خطاب لرئيسك مني اركو مناوي قاعد يحكي في نكات ويطاعن في ناس الحرية والتغيير وما جاب سيرة انقطاع الانترنت ولا في شكل قصة من قصصه البايخه.

نحن ما قاعدين ننحاز لي اقليم ولا جهة ولا قبيلة وإلا ما كان هتفنا ضد المخلوع البشير والمؤتمر الوطني المنحل يا عنصري ومغرور كل البلد دارفور.
الفرق بينا وبينك اننا ما قاعدين ندي فرصة لي زول يقول هو ممثلنا الجغرافي ونقدسه لو اشتغل لمصلحة المنطقة او استغل المنصب لمصلحته الشخصية.
بنعتبر التوم هجو ممثل الوسط بنعتبرو زكاة الاقليم

الجاكومي ممثل الشمال هل تعلم انو ما لقى اي فرصة غير يمشي القاهرة يلولي عيال صلاح قوش ننني ننني..

حصل يوم سمعت بي واحد مننا طلع قال استهداف الجاكومي استهداف للشمال، او استهداف التوم هجو استهداف للوسط

بتدافع عن ارجوازات زي مناوي وخائن زي فكي جبرين استرخص حتى دم اخوه من اجل المنصب وجاي تتبكى وتقول ما اتكلمتوا عن انقطاع الانترنت.

بنتكلم عن انقطاع الانترنت لما قطعتو سوا في فض الاعتصام وفي انقلاب 25 أكتوبر وبنتكلم عن انقطاع الانترنت الان لانو مرتبط بحياة الناس وما رفاهية بالنسبة لينا.

القطعوا الاتصالات في كل السودان ياهم ذاتم الارتكبوا الجرائم في دارفور وياهم ذاتم الكنت قاعد معاهم في اعتصام الموز بتهدد في المواطنين السودانين بنقل الحرب للخرطوم وبتهتف ليهم الليلة ما بنرجع الا البيان يطلع.

حا تفضل لي متين حاسي بالدونية والنقص والسودانين كلهم ضحايا حروب واتساووا في النزوح واللجوء والتشرد وفقدان الامن والامان؟

قبل ما تحوم في صفحات الناس وتلومهم امشي لي شيخك الشوم فكي جبريل وامشي لي رئيسك الارجوز مناوي قول ليهم بدل عايزين تستنفروا للجزيرة وتحكوا نكات لي ناس بورتسودان اتكلموا عن دارفور شوية لانكم قاعدين في السلطة الانقلابية باسمها وعندكم معسكرات نازحين الناس بتموت فيها بالجوع. واتذكر كل اجزاءه لنا وطن يا فلنقاي لذلك نرفض الحرب لانها اكبر جريمة ترتكب في حق الشعب.

* تعريف الفلنقاي: هو الشخص الذي يخدم السلطان بمقابل مادي أو معنوي بدون التفكير في الآثار والمضار الأخلاقية والوطنية والإنسانية لما يقوم به.

سيد الطيب