– يبدو أن المعركة الحقيقية هي مع حمدوك والمدنيين وليس مع الجنجويد .. هل من المنطق أن نصنع عدو (بحجة أنه متواطئ) ونصب عليه غضبنا باضعاف ما نصبه على الجنجويد (العدو الاصلي) ؟ هذا قد يثبت أن العدو الحقيقي هو المدنيين بشتى كياناتهم وليس الجنجويد !!
لاقاني التعليق دا في البوست الكتبته الصباح [١] عن تواطؤ حمدوك ورفاقه مع أجندة الدعم السريع وأولياؤه؛
أكيد لاقاكم زي التعليق دا كتير جدّا في الميديا والقروبات مع أيّ إشارة لتواطؤ الإجندة دا؛
فخلّونا نحسم النقاش دا كسباً لزمن الجميع ..
المعركة الحقيقيّة مع الإمارات؛
حمدوك\تقدم\صمود مجرّد واجهة سياسيّة، زي ما الدعم السريع نفسه مجرّد واجهة عسكريّة؛
الحاجة دي ما محتاجة لمجهر عشان تشوفها يعني؛
يكفيك تسأل نفسك بس حميدتي وحمدوك قاعدين وين طول فترة الحرب دي؟!
لكن طالما فتحنا الموضوغ دا، فخلّينا نعمل زووم آوت ونشوفه في سياق أكبر؛
الإمارات نفسها مجرّد واجهة؛
المعركة الحقيقيّة وراها إسرائيل؛
والبيحصل في السودان دا ليس بمعزل عن حرب إيران وحرب غزّة وضربة قطر؛
والحرب دي ما مستهدفة تنظيم الأخوان المسلمين، زي ما بتوهّموا عملاء قحت و\أو بيحاولوا يوهموا الناس؛
وإنّما هو مشروع إخضاع لكلّ دول المنطقة؛
ودا البيخلّي عدد من الدول دي تدعم الجيش السوداني بالبتقدر عليه، وتحاول تمنع سقوط الدولة السودانيّة؛
لأنّه سقوط السودان بيعني تساقط دول كثيرة بعده، زي قطع الضمنة: domino effect ..
وفي إطار أكبر كتييير، لو بتقدر توسّع زاوية نظرك أكتر، فإسرائيل نفسها مجرّد واجهة لمشروع “امبريالي” عالمي طويل الأجل؛
ما بقدر أسمّي ليه سيد، owner، فهو فكرة بتفرض سيادتها؛
وغياب السيد دا هو البخلق صعوبة لدى الكثيرين في استيعاب المنظر الكبير دا، لأنّه الناس متعوّدة تشخصن، صعب تتعامل في مستوى تجريد الفكرة بالطريقة دي.
كدا واضح؟!
كتبت كلام كتير أناقش تبعات المشهد دا، والمطلوب منّنا حياله؛
لكن ما لقيت طاقة ألملم أطرافه؛
فنكتفي بهذا القدر.
الفاشر سقطت في النهاية نتيجة تعذّر وصول الطيران الحربي إليها بسبب الدفاعات الجويّة المتقدّمة العملوها أولياء الميليشيا؛
تحيّل شنو الكان ح يحصل لو تعذّر وصول الطيران الحربي لسنجة، مدني، جبل موية، الأبيّض، الخرطوم نفسها، …
بعد كدا تذكّر إنّه حمدوك كان لافّي بي رقبته في جولة دوليّة لحشد الدعم من أجل حظر الطيران الحربي للجيش السوداني، بينما جداده مالي الميديا بالحديث عن استهداف الطيران للمدنيّين؛
الغريبة الطيران فجأة بطّل يستهدف المدنيّين في المناطق الطلعوا منّها الجنجويد!
الما شايف تواطؤ حمدوك والمعاه مع أجندة الميليشيا وأوليائها أحسن يركّب نضّارة!
#جنجويد_قحاتة
عبد الله جعفر
-
-
-
-
-
-
-
-
