رمضان أحمد السيد
يا حليل خليفة
• اشتقنا لي خليفة.
• اتذكرنا ليك خليفة وقت يقوم كدا يقطع الكورة ويجري بيها في الملعب …(الجن الاحمر) ما بقلعها منو.
• خليفة بمسك ليك الكورة ما بفكها إلّا لي (بشه).
• ما بدي زول.
• ولا بلعب مع زول.
• بشه بس.
• شطبتوه..وخليتنونا قاعدين نتلفت.
• تاني منو البطفش ليك الكورة.
• تاني منو البكورك لينا مع الحكم.
• وتاني منو البرفع الكورة للسماء.
• يا حليل خليفة.
• الهلال في ثلاثة مباريات تعادل مرتين وانتصر مرة واحدة في الدوري الممتاز.
• هسع دي حركات بعملها فريق عندو (بص).
• انتوا لو ما عندكم تقدير لجمهور الهلال – قدروا (البص) السمح دا.
• البص دا ما بص تعادلات.
• لو عاوزين تعملوا لينا تعادلاتكم دي ..شيلوا منهم (البص) يا الكاردنيال ..وجيبوا ليهم (هايس).
• الهايس ذاتو على تعادلاتكم دي كتيرة.
• ويا حليل خليفة.
• قلبو كان حار زي صاج الزلابية.
• لعبوا عنيف زي سباق الحصان.
• اصلو ما بتسمع بيه عندو (اصابة).
• يقعد في الكنبة (41) يوم ..ويومك البتحتاج ليه ..بتلقاه زي الحصان ..ما عندو اي مشكلة.
• حتى درع الاستقلال حصل عليه الهلال بعد ان تعادل امام المريخ وناله عبر (القرعة).
• انتوا صدقتوا انكم شلتوا (الدرع).
• فاكرين انكم حققتوا ليكم (بطولة).
• الموضوع دا تم عبر (القرعة)…زي توزيع الاراضي.
• يعني ما في واحد من ناس الهلال يحاول يقنعنا ان (بوتاكو) لعب دور كبير في (القرعة) دي.
• القرعة لا فيها عكسيات.
• ولا فيها اقوان.
• ويا حليل خليفة.
• خليفة الكان قلبو زي الاسد ..أول لاعب بحضر للتمارين ..وآخر واحد بطلع من الملعب.
• خليفة الكان ما ساهل ..وكان بحوم الملعب كلو ..ما بخلي ليه شبر فيه ما بوسمو بي لعبة منو.
• نحن وقت الهلال استغنى عن خليفة وشطبه ..وجابوا لينا (اسماء) المحترفين ديل..قلنا خلاص تاني ما بنحتاج لي خليفة.
• قلنا خليفة ح نعمل بيه شنو؟.
• خلاص اتجاوزنا محطة خليفة ..جابوا لينا (اطراف) زي الطيارات.
• لخمونا ليك بـ (كروز)..جابوا لينا كروز ينطط في مواقع التواصل الاجتماعي ونحن نشيل ونصدق.
• اتارينا نحن كنا بنشكر في لاعب ماشى الترجي.
• خليتونا نصلح المواضيع للترجي التونسي.
• عليكم الله لو ما ساكت كدا نحن دخلنا بالترجي شنو؟.
• بقينا في السودان زي رابطة مشجعين الترجي التونسي في الخرطوم.
• دخلنا ليك كروز في كشف الهلال ..سجلناه ولبسناه القميص نمرة (8).
• وبقينا نتخيلو ليكم في تمارين الهلال.
• ونشوفوا مع ناس سيدي بيه ووليد علاءالدين.
• لمن خلاص عشمنا وصدقنا حكاية (كروز) دي ..قالوا لينا كروز دا ما بقدر ينضم للهلال في هذه الفترة ..عشان عندو مباراة مهمة.
• والنادي الذي يلعب فيه كروز في البرازيل ما بفرط في هذا التوقيت في (كروز).
• والجماهير ذاتها معتصمة في البرازيل ..عشان خاطر (كروز).
• صدقناهم.
• قلنا كروز دا لاعب خطير ..ما بفكوه ساكت.
• كمان كروز عاوزنو يكون زي (اكرا).
• اكرا الجابوه من داخلية مدرسة ثانوية دا.
• نحن ما عندنا لاعب بدخل كشوفات الهلال بالسهولة دي.
• قلنا ما مشكلة بننتظر كروز في يونيو القادم ..طالما الكاردينال حسم أي حاجة.
• يونيو ما بعيد.
• هسع الايام بتلف ودور.
• اها في طيبة اكتر من كدا ..في قناعة اكتر من القناعة دي.
• منتظرين (كروز) في يونيو ..جابوا لينا الخبر قالوا (كروز) ينضم للترجي التونسي.
• الخبر وقع لينا زي خبر (الوفاة).
• اتصدمنا في الدنيا دي جنس صدمة.
• رجعنا عشان المريخاب ما يشمتوا فينا وقلنا ..نحن ذاتو زول رابط ليه شعرة في راسو بالصورة دي ما بنفع معانا.
• نحن صعبين.
• نحن شفوت.
• ولعب الخمج دا ما بنفع معانا.
• قالوا ليكم نحن عندنا فيلم سينمائي عاوزين نسجلو.
• طيرتوا مننا (خليفة) ساكت ..غشيتونا بي (كروز).
• بوتاكو بيلعب مباراة والتانية بقولوا عندو (اصابة).
• يا بوتاكو نحن جايبنكم للبترول.
• جايبنك يا بوتاكو مهندس صوت.
• شنو الحركات البتعمل لينا فيها دي.
• زول يتصاب في اول مباراة في الدوري الممتاز ..خليفة لعب في الهلال خمسة مواسم ..ما سمعنا مرة واحدة قالوا لينا خليفة مصاب.
• وكيبي.
• كيبي مالو؟.
• كيبي جاب ليه قون باللفة كدا في المريخ ..ووقت جينا للمباريات الرسمية قال لينا انا مصاب.
• شنو كلكم اتصبتوا لينا في الاسبوع الاول للممتاز؟.
• قالوا ليكم الهلال دا مستوصف.
• في زول قال ليكم نحن جايبنكم السودان عشان نعالجكم.
• كيبي وبوتاكو ..ما مشكلة ..ترى ديل لعبوا مباراة واتعوقوا قدام عيونا.
• انتوا ما شفتوا سلمانو كونتايه.
• اها سليمان كوناتيه دا ما في زول سألو.
• ما في زول قال ليه حاجة.
• كوناتيه دا اتعوق في فترة الاعداد.
• واظن اننا لمن تنتهى الدورة الاولى وتأتي فترة التسجيلات القادمة ما ح نشوف السيد (كوناتيه).
• يعني خسارات دولارات ساكت.
• اها عليكم الله الحركات دي (خليفة) كان بعملها.
• خليفة كان ما بخسر الهلال دولار واحد ..ولا بقول مصاب.
• خليفة ما شاءالله لو طلع فيه (قندران)..بتحامل على نفسو وما بقول مصاب.
• يا بوتاكو ..انت قايل خليفة دا ما عندو رباط صليبي.
• انت يا كوناتيه فاكرين خليفة دا ما عندو عضلة ضامة.
• يا كيبي ..القال ليكم منو ان خليفة جسمو من حديد ما ممكن يتعرض للاصابة.
• شنو عملتوها لينا كلها اصابات.
• هسع لو في زول قال لينا بوتاكو دا اتصاب وين؟.
• نقول ليه شنو؟.
• في شارع التحدي.
• في مباراة الهلال والاهلي شندي ما شفنا أي التحام معاك.
• ولا شفنا لينا التحام أو لعبة خطرة مع (كيبي) في مباراة شندي.
• البخليكم تتعوقوا شنو؟.
• الغريبة ان الهلال استعد في هذا الموسم ..اعظم استعداد ..مسعكرات على مستوى عالي.
• زمان كانوا بشكوا من فترة الاعداد وبقولوا ان فترة الاعداد كانت قصيرة.
• هسع بتشكوا من شنو؟.
• خليفة بدون فترة اعداد ..كانت لياقتو للسماء.
• وكان ما بتعرض للاصابة.
• وكان بجري في الملعب زي الحصان.
• يا حليل خليفة.
• خليفة الما ساهل.
• خليفة الجنب.
• خليفة لو لقى اللقاهو ناس بوتاكو ديل ..كان طلع هداف الدوري الممتاز.
• خليفة كان جوكر.
• عاوزو طرف يمين بلعب.
• عاوزو طرف شمال بيلعب.
• عاوزو في النص بيلعب.
• اصلو ما عندو مشكلة.
• محل ما توديه بيلعب.
• تعال شوف ناس بوتاكو ..الواحد خانتو ما قادر يكمل فيها (90) دقيقة.
• نحن الكلام دا لا بنفع معانا.
• ولا بنغشكم.
• ……..
و
• فشل الهلال في تحقيق انتصار على الخرطوم الوطني ..مقدمة الى خسائر كتيرة لا قدر الله قد يتعرض لها الهلال في هذا الموسم.
• مباريات الولايات بهذا الحال لن يتمكن الهلال من تحقيق انتصار فيها.
• والبطولة الافريقية ..الخطر سوف يهدد الهلال.
• الله يجيب لينا يونيو ..ويسعفوا الهلال بتسجيلات على مستوى.
• ما تسجيلات زي التسجيلات الاخيرة والتى كانت في الصحف فقط.
• و…
• السيدة (ل)…كهربتنا قاطعة ..تفتكري الموضوع عندو علاقة بـ (داعش).
• و..
• وقرّض على كدا.
[/JUSTIFY]
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة