ما الطيبة برضو مُسكنات..

[JUSTIFY]ليه يعنى ما أسأل أنا..؟
ورينى يا أغرب طبيب..
زايد منى كيف..؟
خلصت برضوا الجامعات..
ما رغبت زيك أكون أنا..
اخترت غيرا تخصُصات..
ناقص شنو..؟
شان تنهر تهيج فينى ..يا (سمح) الصفات..
أنا برضى سودانى الأصل..
أُمى الخُدودا مُشلخات..
أبويا ملمحوا زى أبوك..
تلقاهوا راكز وفى ثبات..
شايلوا سكين فى الضراع..
طاقية والشال فى الكتف..
دائماً عيونوا مُحمرات..
من السهر فى خدمة (الغير) يا (حكيم)..
كرعيهو ديمة مُغبرات ..
يفلح يحش فى ارضوا شان ياكل حلال..
سموهوا أهلوا أخو البنات..
من حقى أسأل ..
عن حقوق مكفولة لى ..
أسألنى من حقك كمان عن واجبات..
وفر لى يا سيدى العلاج..
فى كل حين..
بالحسنى أطلب يا ضنين..
أسألنى من دفع الرسوم ..
بى بسمة قابل للمريض..
ما الطيبة برضو مُسكنات..
بيها يرتاح العليل..
تلقاهوا صابر وفى سُكات..
لا يشكى من وخز الإبر..
أو من مقص..
أو شاشة فى جوة البطن منسية بس..
عاملة كم من مشكلات..
أو جرعة زايدة مخدرات..
أو بين يديكا أبوهوا مات..
لابد يسامحك لو قبيل لاقيتوا باسم..
لا شرطة بينكم لا خلاف..
لا قصة دايرة مُحاكمات..[/JUSTIFY]