عبد اللطيف البوني
في مسجد المستشفى
(ياخوانا من فضلكم اغلقوا الموبايلات دي أكان نقدر ناخد لينا غمدة) (غمدة ؟؟ غمدة بتاع شنو أكان داير غمدة أمشي بيتكم نحن ممارضين لينا ناس عيانين ممكن في أي لحظة يحصل ليهم شئ كيف الزول الممارض الجوة يتصل بينا أكان حصل شئ؟؟لازم تكون الموبايلات مفتوحة) (طيب ياجماعة حل وسط ممكن الموبايلات تكون موضوعة في الصامت وفي الجيب أكان ولع الزول يقوم يرد) (لاصامت ولاغيروا نحن هنا استاندباي لازم نكون جاهزين في أي لحظة).
(يابن العم مامعقول شخريك عالي جداً والله يجيب الضهبان ما ممكن توطيهو شوية أكان ناخد معاك غمدة؟) (يوطيهو أصلوا هو راديو ولا تقسيمة بتاعت عربية؟ الشخري دا عملية لا إرادية ناس تشخر ذي الرتينة تسسسس وناس ذي اللوري الوحلان تعلي وتوطي) (والله قالوا الشغلانة دي مرض حقو الزول البيشخر دا يدخل يرقد في العنبر مع المريض بتاعو عشان يتعالج) (يا جماعة والله عندكم طاقات مهولة على استنسال المواضيع يا جماعة أدونا فرصة خلونا نغيب عن الوجود المؤذي دا) (اوووو جابت ليها مثقفاتية وبعد شوية حانسمع المحايثة الانكفائية في الاستدارة البنيوية في الاسترابة الماورائية).
(ياجماعة والله أنا شاعر بكتمة شديدة والله أنا ماقادر اتنفس دا اختناق عدييل) (دا شي طبيعي لانو الناس كتيرة والمساحة ضيقة فثاني اكسيد الكربون اتغلب على الأوكسجين يعني الأوكسجين أصبح قليلاً) (طبعا دا الاختناق الكتل شهداء عنبر جودة القال فيهم صلاح أحمد إبراهيم القصيدة الشهيرة (عشرون دستة من البشر) (اوووو ياجماعة الحكاية جابت ليها علوم وتاريخ وأدب وسريالية ياجماعة نحن قاعدين في القرنداوتيل ولا منحشرين في مسجد لظرف خاص؟؟ ياجماعة الزول الشاعر باختناق يمرق برة ياخد نفس ويجئ راجع و الداير يتمغى يمرق برة يتمغى ويجئ راجع بس ياجماعة بطلوا الكلام الكتير دا خلونا ناخد لينا هجعة والله أنا باكر عندي امتحان وأمي راقدة جوة ومعاها أختي هي الأصرت أكون قريب منهن طبعا معاها حق الظروف ما معروفة أكان حصل قدر الله تمشي على وين ؟؟ ) (اوووو الحكاية جابت ليها موت للناس الجوة على الطلاق بعد شوية حاتجيبوه لينا هنا في المسجد دا فأحسن تدوها صنة شوية). حاطب ليل- السوداني
[email]tahersati@hotmail.com[/email]
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة