لمت غروبها وسافرت ..
بانت نجوم متفرقات زي الدموع ..
فى خد حبيب ودع حبيبتو السافرت ..
والليل ضفائر حزنو مداها الألم ..
زي التقول عارف النهاية القاربت ..
شفتا الفريق ضامي الفرح
فى دار حبيب ضميتو في قلبي الحنين
ماتت خطاي ضاع الأمل
واحترتا في خوفي الدفين
عاينتا لقيت الحبيب في عرشوا
في تاجو الحزين
حولوا العيون فيها الفرح
بس الفرح في عيونوا ما قادر يبين
والدمعة في عينيك تودع طيف حبيب
خليتو لي قدر السنين
*فى الثقافة العامة ارتبط (اللون الأبيض) بالفرح !!
* وارتبط اللون الأسود بالحزن !!
* ولكن الثقافة السودانية لها فلسفة أخرى !!
* اختارت الثقافة السودانية اللون الأبيض ليعبر عن الفرح والحزن فى نفس الوقت !!
* (الزفاف) هو أبيض اللون !!
* و(توب الحبس) عند المرأة التى يتوفى زوجها أبيض اللون !!
* (السودانيين) لهم نظرة تقول إن الذى يكثر من ارتداء (الأبيض) هو إنسان نظيف !!
* أمس الأول أطلعت على دراسة أثبتت أن الذين يرتدون اللون الأبيض باستمرار إنما هم يعانون من ( وسخ فى القلب) !!
* هذه الدراسة الأمريكية طبقت ذلك بياناً بالعمل على كثير من الأشخاص الذين لا يرتدون إلا الأبيض !!
* الدراسة شكك فيها كثير من الناس وقالوا إنها ظالمة وغير منطقية !!
* الذى أود أن أقوله باختصار شديد هو : (المظاهر خداعة) !!
* أسود ولا أبيض المظاهر خداعة جداً !!
* إذا صح أن هناك حملة (لحلاقة الشعر المفلفل بالقوة ) فإن هذا قرار صائب جداً !!
* البداية يجب أن تكون بالفنانين وأصحاب الفنانين !!
* أى فنان شاب تجد حوله مجموعة مذهلة من العطالة أصحاب الشعر المفلفل !!
* الواحد يكون من (شلة الفنان) وبعد شهرين هو ذاتو يبقى فنان ويعمل ليهو شلة !!
* الحكاية بقت ماشة كده !!
* شوية (جل) وشوية (بدرة) و(علبة سجائر) وشوية (عطالة من حولك) وشوية (وقاحة) وتبقى فنان !!
* الشغلانية ما دايرة أكتر من كده !!
* قبل شهر من الآن احتفل إتحاد المرأة فى ندوة خصصها للتوب السودانى !!
* اتحاد المرأة فى احتفاله اختار (راجل) لكى يغنى فى الحفل !!
* فنان الاحتفال كان هو عثمان الأطرش !!
*هذا الذى حدث ذكرنى المقولة الساخرة التى أطلقها ظريف أم درمان عندما قال: (عليَّ بالطلاق اتحاد المرأة ده ما بقى فاشل إلا بعد ما دخلنو النسوان ديل)!!
* اتخيل اتحاد امرأة فشل بعد دخول المرأة للاتحاد !!
* يعنى الاتحاد كانوا بيديروهو رجال ولا شنو !!
* البلد دى فيها مفارقات كده تحيرك !!
* مثلاً قناة (أم درمان) الفضائية مقرها فى الخرطوم !!
* وكلية (شرق) النيل تقع (غرب) النيل !!
* وموقف (المواصلات) ما فيهو مواصلات !!
* واتحاد المرأة بيغنى فيهو راجل !!
* حاجات كده عجيبة !!
* أكثر شئ جعلنى حزين فى عيد الأم هو الشاعرات !!
* فى عيد الأم لم يجد الناس أى قصيدة مؤثرة تتحدث عن الأم كتبتها شاعرة !!
* مافى !!
* البلد دى ما فيها شاعرات ولا شنو !!
* غايتو التجانى حاج موسى شبع من الهدايا والتكريم فى عيد الأم !!
* البنات الشاعرات ما فاضيات عشان يكتبن فى الأم !!
* كتابتهن كلها عن الحبيب والحب !!
* حاجة تكسف !!
* خلو بالكم.. أنا قلت ما فى قصيدة مؤثرة عن الأم كتبتها شاعرة !!
* وتانى أكرر.. (قصيدة مؤثرة) !!
* عشان ما بكرة أى شاعرة تجيب لى قصيدة فى الأم !!
* حقو تعملوا (عيد الأب) عشان نشوف برضو التجانى حاج موسى سيخطف الأضواء ولا فى بنات شاعرات كتبن عن الأب ؟؟
* الفيكن اتعرفت !!
* ناس (برى) بتحبو !!
* وناس (مايو) بيخشو للزول فى قلبو !!
* يا أستاذة : إحنا بنحب سلطة (الأسود) البيضاء !!
*و..و..!!
* بعاين ما الشبه باين وعايدة القمرة لي أصلا !!
-
-
-
-
-
-
-
-
