عندما يتأخر المرتب

المرتب أو الماهية طالها التدهور ونقصت خلال الشهور الماضية (النص بالنص) يعني الزول الكان بيصرف ألف جنيه (مليون بالقديم) مرتبو أصبح 500 جنيه وده يا جماعة لأنو الأسعار زادت بنسبة مية في المية (أو كمان أكتر في بعض السلع) وذلك نسبة لتدهور السعر الموازي للجنيه السوداني أمام السعر (المزازي) للين الياباني أمام السعر (التركوازي) للدولار الأمريكاني ..
وإنخفاض قيمة الجنيه خلت الناس يا جماعة بقت مزنوقة شديد والمرتب الكان بيخلص يوم خمسة في الشهر هسه بعد الزيادات دي بقي يخلص قبل ما تستلمو لأنو بيكون (في أحسن الحالات) كلو عبارة عن ديون وإلتزامات يستوي في ذلك الزول المرتبو 500 جنية أو الزول المرتبو 5000 جنيه .. لكن مع هذا الرهق تعالو نقرأ بل نشاهد ماذا يمكن أن يفعلة هذا المرتب (بى تفاهتو) لو إتأخر شوية يعني فات يوم 8 في الشهر .. طبعاً لو كنتا عندك (سنام) تاكل منو مفيش مشكلة لكن المشكلة تكون من الجماعة (أبو من غير سنام ) .. يعني الرزق اليوم باليوم !
قبل أن تخرج من المنزل تبدأ في رسم خارطة طريق لتكتشف أن هنالك شارع واحد (آمن) هو الشارع الذى توجد فيه (الجزارة) وذلك بعد أن قفلت حسابك مع الجزار واصبحت إنت والأولاد (نباتيين) رغم أن للثروة الحيوانية وزارة ووزير وشنو ما بعرف !
تبدأ في ترديد الإسطوانة الثابتة التي سمعها البقال والخضرجي وبتاع اللبن وسيد البيت لسنوات طويلة :
– والله يا جماعة لحدت هسه ما صرفوا لينا
– والله أول ما أصرف أجيب ليكم القروش
– يا جماعة لو صرفنا مش كنتا جيتكم؟

عندما يتأخر المرتب تكون حبوب الضغط خلصت وإنتهت فتبدأ في تناول البدائل العشبية التي من المفترض أن تخفض من ضغط الدم ، شئ (قرفة) شئ (كركدي) وشئ شنو ما بعرف إلا أنها تفشل تماماً في تخفيض الضغط العالي لأنو (الفلس) ما معاهو كلام !
كما تنتهى حبوب السكري (وسكر السكرين) فتبدأ في شراب الشاي بالسكر العادي (إذا توفر) وإذا لم يتوفر فما عليك إلا شراب الشاي مسيخ والدعاء بأن يحفظ الله أمنا الحكومة التي لا زالت تجتهد في أن تجعل حياتنا ماسخة أكتر من موية (الترمس) !
تبدأ في ترشيد (الترشيد) الكهربائي الكنتا عاملو في البيت (حتي لا تحرم من الكهرباء وكده) فتقوم بإستخدام لمبه 50 شمعه لقراءة العناوين الرئيسية عندما تقرأ الصحف مساء ثم تطفيها وتولع أخري ذات 100 شمعة لقراءة التفاصيل .
تبدأ في التعامل مع الفكة الحديد بكثرة .. زيت بي جنيه ونص .. فول بجنيهين ونص (طبعن لازم تشتري بالكاش لأنك زائغ من سيد البقالة)!
تقوم بركن العربية (لو عندك عربية) وتبدأ في ركوب الحافلات لتكتشف أن هنالك شئ أسمو (كرسي النص) وما أدراك ما كرسي النص ينزل راكب من الكنبة الأخيرة الحافلة كوووولها تنزل !
تزوغ من حضور المناسبات الفيها (كشف) حتى لا ينكشف حالك المكشوف أصلاً.
تتنامى وتزدهر لديك ملكة (فن الإقناع) : يا أولاد والله الكسرة بالموية والشطة وزيت السمسم دي أحسن منها مافي ولذيذة وصحية وبتنهضم بسهولة ! وعندما يتم الإقناع وتبدأ في خطوات التنفيذ تجد إنو (4 طماطميات بعشرة ألف) غير الكسرة ذاااتا والبصل والزيت (لو فضل فينا زيت) !
تتوقف عن شراء اللبن بعد أن (يفطك) سيد اللبن فتبدأ في إقناع أولادك بأن هذه الأيام ينتشر فيروس (جنون اللبن) ولازم ناخد هدنة منو لحدت ما (المرتب) أقصد الفيروس يمشى !
تتوقف عن إستخدام (مكوة الكهرباء) لكي الملابس وتلجأ (للفحم) لتكتشف أن (الفحم) لا يقل سواداً عن الكهرباء !
تبدأ في (قرص) السيجارة إذا كنت من المدخنين لإعادة إستخدامها أكثر من مرة مما يجعل نسبة التدخين لديك تنخفض وهنا تتجلى الحكمة وراء المثل الذي يقول (رب ضارة نافعة) !
عندما يتأخر مرتبك تنخفض لديك الرغبة في الإستماع إلي الموسيقى والغناء (مع الفلس ده المستمع ليها شنو)

كسرة :

عندما يتأخر مرتبك تبتسم عندما يتقدم نحوك متسول طالباً (حاجة لله) لأنك محتاج لنفس (الحاجة) لكن بس هو ما عارف سااااكت !!

كسرة ثابتة :
أخبار ملف خط هيثرو العند النائب العام شنو(ووو وو ووو)؟
[/JUSTIFY]

الفاتح جبرا
ساخر سبيل
[email]gabra-media@hotmail.com[/email]